Школала директор дурхIнас кIиибси юртли бетаурси школала вегIбекI сай, суненира школа гьалабяхI башахъес цIакьани дяхIчииуси ва школала гIямрулизир жигарла бутIакьяндеш дируси. Школализиб бучIути дурхIни бяркъличи бушес багьандан, педагогикалашалти багьудлумицун даибти ахIен, илди (дурхIни) дигахъесра хIяжатси саби. Школала директор дурхIнала уркIи иргъуси, тIалабкарси, бархьдеш гIеббурцуси, гьар бархIи мягIничерти масъулти ирзуси ва халати жавабкардеш дихуси адам сай. Илдигъунтала лугIилизи кархули сай иш макьалала игит МяхIяммад ГIябдуллаевра.
ГIябдуллаев МяхIяммад БяхIмудович акIубси сай 1953 ибил дусла августла 29-личив Ахъушала районна МухIела шилизив. Шила школа таманбарили, 1970 ибил дуслизив ДГУ-лизи керхурсири ва, 1975 ибил дуслизиб вуз ункъли хъараахъурсири.
1972-1974-ибти дусмазиб ДГУ-лизибси халкьла багьудила организатортала факультет таманбариб.
Сунела бузерила цаибти гунзри МяхIяммад ГIябдуллаевли 1975 ибил дуслизир Куръимахьила 8 классла школализир кацIибтири. Илаб дус мугIяллимла хIянчи барили, Кавкамахьила 8 дусла школала директорла белчIудила-бяркъла шайчивси заместительла къуллукъ бузахъес вехIихьибсири. 1981 ибил дуслизив АметеркIмахьила урга даражала школализи шурватурсири ва директорла къуллукъ хъарбарибсири.
1987 ибил дуслизив С.Кьурбановла уличилси совхозла парткомла секретарьли викIибсири. Илаб М.ГIябдуллаевли 4 дус хIянчи бариб. Илини Северный Кавказлизиб партияла чебяхIси школара таманбарибси саби, илкьяйдали Дагъиста социально-политический институтра хъараахъурсири. 1981-2001-ибти дусмазив Ростовла областьлизив бехIбихьудла школала заведующийлира узули калун.
2001-ибил дуслизив сагадан АметеркIмахьила школализи живариб ва, 10 дус директорла къуллукъ бузахъули калун.
Чинав узалра МяхIяммад ГIябдуллаевли дурхIнала, илдала бегIтала ва барх бузутала хIурмат-кьимат сархиб. Сунечи хъарси ункъли таманбирни, хIялалли узни багьандан, ил «РСФСР-ла халкьла багьудила отличник» (1985 ибил дус), «Халкьла педагог» (2005-ибил дус), «2005-ибил дусла директор», «ДР-ла урибси мугIяллим» (2012 ибил дус) ибти умачи лайикьикиб. 2013 ибил дуслизив Дагъистан Республикала хIурматла педагог ветаур, ил ДР-ла багьудила Министерстволи чуйнара ХIурматла Грамотабачил шабагъатлаварибси сай. Лерилра илди сархибдешунани М.ГIябдуллаев баркьудилис марси адам виънилис бикьридеш дирули сари.
МяхIяммад ГIябдуллаевли багьудилизирцунра ахIи, спортлизирра гIяхIти хIясилти чедаахъибти сари. Ахъушала районна волейболла шайчив чемпион ветаурсири, районна бегIлара гIяхIси вратарь сайри, илкьяйдали 1989 ибил дуслизиб Москвализиб бетерхурси халкьани-ургабси спартакиадализирра бутIакьяндеш дарибтири.
ИшбархIира МяхIяммад ГIябдуллаев АметеркIмахьила школализив директорли узули сай ва ил гьаркьятала къяянази дураэс лерилра цIакьани дяхIчииули сай. Сунела бузерилизир илис сархибдешуни дулгехIе.
МяхIяммад ГIябдуллаевли ручIахъули калунси Паризат Булкъадаровани сунела мугIяллимлис иш назму хасбирули сари:
МухIела шила шантас ветаурси мургьи-арц
Калаби хIу мурталра БерхIи кьяйда ухули.
Милиги хIебагьурси сартан сайри дубурла
Ванали гъайикIуси кьяли БерхIила нурла.
Дагьрили хIу велкъунси адам сайри кабизла,
БучIутас бяркъ лугуси мугIяллимри гьарбизла,
Даим бажардилизив биштIатас къуллукъбарес
ГIяйибгу, дила узи, уркIира хумарбарес.
ШинкIадиубли хIулби, нургъби кIантIдухъаллира,
Разидешлацун илди, диаб сари мурталра.
Багьудлумачил даим бегIбирид уршби-рурсби
Калаби хIу нушала, мургьи, дагьри лушули.
ХIерели — ванал БерхIи, дугели — Бацла шала
ХIед даим адулхъули, уркIи разибирули.
ПатIимат Мирзаева
