Закли ряхIмула забли
Ванза баркатлабиру,
Заблис гIергъи зурхIябли
Ванза-зак варакьдиру.

Гьунарли ца адамла
ГIялам халкь хIулбуркIахъу,
ГIяхIбаркьуна илала
Миллатуни уржахъу.

Вава-кьарли берхъибси ду­бура чедибяхъили, мирхъи варъа лебси ваваличицун бирар кабиръуси. Адамлисра сунес пайдаласи ва гIяхIил сай кьабулвируси мерличи вашес дигахъу. Тяп илгъуна бахълис багьуд­лумала «варъа бержес» кьа­дарбиубси мерли бетаурси саби рес­публикализибра халасигъуна библиотекара. Хаслира сту­ден­тунас бири ил чула бегIтала юрт­ван дигусили бетаурси. Илаб чула хъа­либаргла члентиван гъамти хIян­чизартани халаси иштяхIличил му­радра бирусирину.

КегIебти чарх-бекIличилси, шалати дяхI-някъличилси ва жагати куц-кабизличилси малхIямси хьунул адам чераибмад дила уркIи ясирбуцибсири. Наб илцадра дурхъали детаурти жузала дунъялизир ил зубарти-ургар цIуба арцла бацван пархрикIусиван билзулри. РиштIахIейчирадли жузачи уркIи битIикIуси нуни илкьяйдали республикала А.С.Пушкинна уличилси библиотекализирси адаб-хIяяла чихъти къиликъунани машгьуррарибси хIурхъан Баху МяхIяммадовнани дяхI шалали кьабулрирухIели, читальный заллизиб имцIали замана буркIескариира ДГУ-лизир ручIес рехIрихьибхIейчирадли. Занятиеби тамандиубмад цархIилти студентуначил рарх ила гьуни бурцусири ва акьуси бархIира илар рираси савлиличирадли библиотекала бузерила бархIи таманбиайчи. Халаси читальный зал гарчли бицIили бири итхIели жузи дучIантани. Библиотекала халаси юрт мирхъила тIакьаван бучIусири ва Баху МяхIяммадовнани бекIдеш дируси коллективли лебилра къайгъначил гIеббурцутири.

БелчIуди хъараахъурли гIергъира чуй­нара гьарракIира кIинайс Расул ХIямзатовла уличилси республикала Миллатла библиотекализи. Ил­хIе­­­лира Баху Мажидова сабурличил ба­­кIибтачил лякьиррикIусили, буся­гIя­тал сунечи дугьаизурсила мурад биру­сили ва духуси гIякьлу бурес гIела ритI­хIей­кIусили,… лералри. Тяп гIяхIцад дус­ми гьаларван. Ил мургьи-арцла ваяхI варакьдируси гIярбукIанван жузачил бируси хIянчи дурабуркIахъес Че­вяхI­си­ни рархьибсиван билзи ца­ца­хIели. Ук­темдеш-хамдеш агарси ва адамтачи дигили рицIибси илини гьа­рил виштIасила ва халасила цаван хIур­мат­бири, имцIаси гъай хIебури, бурибси гьарил девра кагибси бири.

Гьаларван редакцияла хъарбаркь хIясибли, материал белкIес или шагьарлизи дурарухъунра. Мас-хазнала мягIдайчи адам хабарагарли вяхIигуси сай бикIули бирар дубурланти. Баху МяхIяммадовнани цалабяхъибси рухIлашалси бахъ давлачебси хазна чебаибхIели, илди гъай гьандикиб ва иличиб гIур халаси давла-мас биэс бирусив или пикрирухъунра. Хасси папкализи жагали кадихьибти ХIурматла Грамотаби, декIар-декIарти дусмала ва миллатунала мезанала газетабазир дурадухъунти макьалаби (кьи­цIдарибти), суратуни ва цархIилти документуни, мухчабази кадихьибти шабагъатуни ва илдала удостоверениеби дахъалри илала. КъантIли буралли, даршдусла байхъала манзиллизиб Баху МяхIяммадовнала ва илала мурул МяхIяммадхIяжи ГIялибековла бузерила сархибдешуначила ва гIямрула бетуцуначила баянти сарри илди. Иличибра чебяхIси ва дурхъаси давла Баху МяхIяммадовнала уркIи-рухIлизибра минабиублири. Ил ихтилатрикIескариибхIели, ну, би­кIу­ливан, гьигь тIашаили лехI­ри­зурра.

Гьарил кагъар мяхIкамли някълизи кайсни нуни хIясиббарибхIели, ил рикIар: «Наб сегъуналра кагъар гъярбарибси яра жуз мяхIкамхIебируси анцIбукьуни хIейгахъаси…»
Мажидова Баху МяхIяммадовна Сергокъалала районна ГIяяли­зи­ма­хьилизир 1937 ибил дуслизир акIубси сари. РиштIали лерай бегIтазирадли мяхIрумриубси ил Сер­гокъалала школа-интернатлизир ручIули калунсири. Халаси узи ГIяб­ду­саламличи хъаррикибсири. Бахус сунела неш Хамисли дявилизивадли чархIевхъунси узи МяхIям­мад­ли­чила мурталра дурути хабурти гьан­диркули сари. Дяви таманбиубли гIергъира Хамис сунела урши ча­рулхъ­ниличи рирхули кали сари. Се­пайда,…

1950 ибил дусличирадли Буйнакъскла школа-интернатлизир ру­чIес­карииб. 1955 ибил дуслизир Буйнакъскла хьунул адамтала педучилищелизи карерхур. 1959 ибил дуслизиб илаб багьуди хъараахъурли гIергъи, Лавашала районна Хажалмахьила урга даражала школализир мугIяллимли рузескарииб.

— Ну илар рузухIели Газим-Бег БяхIян­дов учIули левсири, — гьанбиркахъули сари Баху МяхIям­ма­дов­нани, — ил ункъли учIуси ва гIякь­лучевси ур­­ши сайри. Ил 9-ибил клас­слизи ва­шу­­хIели назмурта лукIес вехIи­хьиб­сири.

ГIур Лавашала районна комсомолла комитетла кIиибил секретарьли рузи ил. ИтхIели районнизир бегIлара багьудичерси ва гIякьлули хIурмат ахъбуцибси жагьси хьунул адам черриркIусири ил къуллукъличи каратес. Илкьяйдали абзурли районна шимала жагьил рурсбас ил гьар секIайзир мисалли риэсра хIяжатсири. Сунечи бихьибси игьдибар марбариб итхIели илини. Амма рурсили сунела багьудлуми чедицIахъес ибси пикри бархьбалтули ахIенри ва 1963 ибил дуслизир Дагъиста пединститутла географияла факультетлизи карерхур. Иларра хIурхъан рурси ункъли ручIусири. Дубурлантала гIядатуни дузахънилизир ва кагибти баркь-бацличирли институтла студенткабас мисалли ретаурсири.

Институтла хIябъибил курслизир ручIуси Бахуни МяхIячкъалализибси «Авиаагрегат» заводла гьавкья ялчи МяхIяммадхIяжи ГIялибековличил кьисмат цабарибсири. Сунела гьамадли ахIенси гIямрула гьунчив илгъуна пергер адам къаршиикни илини сунела гьарли-марси игъбарлизи халбирулира сари. Ил шуцIали дусличибра имцIали сунечи хъарси хIянчи ахъси даражаличиб дурабуркIуси машгьурси хIянчизар сайри. ХIялалси ва гIибратчебси бузери ахъли кьиматлабирули, ил Бузерила Асилдешла III ибил даражала орденничил ва «Авиацияла промышленностьла отличник» ибси михъирличи биршуси лишанничил шабагъатлаварибси сай.

ГIяхIти кьиматуначил белчIуди хъа­раахъурли гIергъи, А.Пушкинна ули­чилси республикала библиотекализир 1968 ибил дуслизир Б.Ма­жи­дова библиографли рузескарииб.

Ил хIянчиличир халаси гъира ва ахъси устадеш дакIудариб илини. Ил багьандан рузес рехIрихьили кIел дус дикибхIели, Баху МяхIяммадовначи краеведениела ва миллатла литературала отдел хъарбариб. Илкьяйдали ил отделла заведующая ретаур. Иларра мугIяллимли ва комсомолла райкомлизир рузули, касибси бузерила устадеш ункъли багаладиуб. Илини мурталра декIар-декIарти далдуцуни дурадуркIутири ва даргалацунра ахIи, респуб­ликала лерилра миллатунала твор­чест­волизиб, гIилмулизиб ва цар­хIил­ти кьялубазиб сабухъчебли бу­зути адамтала бузериличи иш­тяхI-гъира имцIадирахъули, суне­ни дурадуркIути далдуцуназир бу­тIа­кьяндеш дирахъес илди жибирутири. Творчествола вечертира илини ахъси даражаличир дурадуркIутири.

– Нуни лебилрара-сера нушала рес­публикала машгьурти поэтунала, писательтала, журналистунала чула юбилейтачил дархдасахъи, творчест­вола вечерти дурадуркIутири, — буру­ли сари Баху Мажидовани, — амма сецад тиладирикIули хьалли, чула хIяб нурли бицIабну, Гъа­зи­мяхIяммад Юсуповра Газим-Бег БяхIяндовра илдигъунти ве­чер­­ти дурадеркIахъес разибикиб­ти ахIенри. ГъазимяхIяммад ЖабрагIилович викIусири, балбуцличир гапла гъайра дурили, библиотекала унабурхI ахъибхIели, юбилярличила чеббугьути чебиухIели, нуни илгъуна секIал дебали балхIебикибсилизи халбирули вирус. Илдигъунти адамти се багьандан далдуцуначи башутилра аргъес хIейрулра или.

Газим-Бегла биалли, сай агарвиубли гIергъи, илала кулпетра гъамтира жибарили, 60 дус виъниличил бархбасахъи, творчествола вечер дураберкIибсири.

ГIур илини «Литературала Хамис бар­хIи» ибси балбуц дурабур­кIес­­­карииб. Дагъиста миллатунала хал­кьанала творчество барсур дав­ла­чеббикIахънилис илгъуна бар­кьу­дили халаси кумек бирусири. Пик­ри­дирути масъултала асарчебдеш им­цIабикIахъули, илдазир бу­тIа­кьян­деш дирахъес чула сани­гIя­туни, бу­зе­рила сархибдешуни хIясибли маш­гьур­би­убти гIялимти, политикуни, жа­мигIятла хIяракатчиби, куль­турала ва искусствола хIянчи­зар­ти жибирути­ри. Илкьяйдали хIянчи тIаш­батнили, дагъис­танлантала гьалаб Мил­латла библи­отекала хIурмат ахъ­бирахъусири. Илгъуна бетуцлизиб белгиси мер бурцули саби бахълизи мягI­ни-хIял иргъахъути гIягI­ниахълуми пай­даладирнилира.

Россияла гIилмуртала Академияла Да­гъиста гIилмула Центрли дурад­ур­кIути конференциябачир, симпо­зиумтачир ва республикала цархIилти организациябазир детурхути далдуцуназир Баху Мажидовани мурталра бутIакьяндеш дирутири, мягI­ничерти масъулти ахъдуцили, гъай­рулхъусири.

Илини жамигIятла гIямрулизирра мурталра жигарла бутIакьяндеш дирутири. Библиотекала партияла организациялис 15 дус гьуни чебиахъусири. 1987 ибил дусличирадли библиотекала хIянчизартала профсоюзла комитетла председательли рузули 30 дус калунсири. 1975-1979-ибти дусмазир МяхIячкъала шагьарла Ленинский районна Советла депутат сарри.

— ИтхIели нушала хIянчизартала дебали камси алапа бирусири. Ил ахъбуцахъес багьандан нуни республикала хIякимтачи чумра кагъар делкIунра, Москвализи бархли тиладила кагъар бархьира, амма сегъуналра гIяхIдеш бетхIеур. Республикала Пре­зидентличи рукьяхъесра ихтияр лу­гули ахIенри, – гьанбиркахъули са­ри Баху МяхIяммадовнани. — Гьачам библиотекализиб балбуц ду­ра­бур­кIухIели ДР-ла Президент Муху Гим­батовичли илизир бу­тIа­кьяндеш дирни балуси ну ил лявкьухIели, библиотекала ганзухъуначи илала гьала тIашкаризурра ва набчи лехIизахъес илизи тиладибарира. Иш хьунул адам мехIурриубли рургар бикIутира лебри иличил барх бакIибти-ургаб ва ну тяйдириахъес балбизур, амма ну шикьхIерухъунра. Нуни дила челукьусиличила баянти дурес рехIрихьира. «Муху Гимбатович, нуни хIябал минутли дила челукьусиличила бурис. Тилади саби, дила гъайличи лехIизи. Чина-дигара лукIули хьалли, нушала алапа ахъбурцули ахIен. ИмцIатигъунти хIянчизартани чула дурхIни дурхIнала анхълизилра букес имканти агара. Нура лехIкахъили руасли, чилилра нушачи пикри бяхIчихIейу. Ил багьандан нушаб кумекбарахъес тиладибирулра…». ИлхIели Муху Гимбатовичли буриб иш хьунул адамлис ну кавшес ва сари ребкIес дигули ахIен. Илала челукьуси се-биалра лебли хIебиалри, илкьяйда тIашкахIерилзи или иб. Илини набчи заллизи ракIахъес хъарбариб. Нуни илизи чебетаахъили аргъахъира алапа камлихIели, сегъунти къияндешуначи дяхIигулрал нуша.

ИлхIейчирадли жумягI дикили гIергъи, нушала алапа 70 процентла кьадарлизиб ахъбуцибсири. Нушала библиотекалацунра ахIи, республикала цархIилти библиотекарьтасра илгъуна гIяхIдеш чебетаиб. Муху Гимбатович 80 дус виубхIели, нуни лебилра республикала хIянчизартала шайзивадли мубаракварибсири.
Ну рузуси манзиллизиб урегал куль­турала министр ва урегал биб­ли­отекала директор барсбиубтири. Ил­дачил цахIнабси бузери­ли­зи ахъили, библиотека гьа­лабяхI арбукес къайгъили­зир­сири нура.
Ну багьандан чизилра гьачамалра тиладибарибси ахIенри, амма дила хIянчизарти багьандан мурталра къайгъилизи риркусири. Квартира бедахъес ва цархIилти масъулти арзахъес кумек гIеббиахъусири. Лебтасалра квартираби дедес имканти агарси манзиллизиб хIябал хъа квартира декIарбарахъибсири ва илаб общежитиелизиртигъунти шуртIри акIахъубли, нушала хIянчизарти хIербирутири.
КIинайс республикала Р.ХIямзатовла уличилси Миллатла библиотека бикIусири Баху МяхIяммадовна рузуси учреждениелис. Илар 2013 ибил дусличи бикайчи рузули калун ил.
1995 ибил дуслизиб илис «Дагъистан Республикала культурала рурибси хIянчизар» ибси у бедибсири. Дахъал дусмазиб профсоюзлизиб чебетаибси хIянчи барни багьандан ва профсоюзла хIянчизартала бекIахъудила-яшавла ихтиюрти далтахънилизи гIяхIси пай кабихьни багьандан 2002-ибил дуслизир Б.Ма­жи­дова Россияла культурала хIянчизартала профсоюзла ХIурматла Грамоталичил шабагъатларарибси сари.
Шамилла уличилси премиябала шайчибси халкьани-ургабси комитетли, имам Шамил 200 дус виъниличил бархбасахъи ва Дагъиста халкьани-ургар гьалмагъдеш им­цIа­дикIахъ­нилизибси хIяракат багьандан, илкьяйдали Баху Мажидова дипломличил ва у белкIунси мургьила медальличил шабагъатларариб.
Баху МяхIяммадовнас «Россияла культурала рурибси хIянчизар» ибси ахъси у беднилира бикьридеш дирули сари ил бахълис мисалли ретаурли рузниличила.
Миллатла библиотекализиб бируси хIянчи гIядатла бузерила хъарбаркьванцунра ахIи, ил Баху МяхIяммадовнани Дагъистан Республикала халкьанала мекелли дурхъаси хазна, хъумартес асухIебируси тарихла бетуц, хала бегIтачибадли нушачи баибси культурала давла сабливан жузала фонд мяхIкамбарес, чебирцIахъес сунечиб ва сунечил барх бузутачиб чебси биънилизи халбирусири. Ил фондлизир дагъистанлантала гIямрула лерилра шалубачила урус мезли делкIунтира республикала миллатунала 14-дехI мезли делкIунтира жузи лерни багьандан, лерилра илди пайдаладирулира, гIяхIси даражаличир калахъес хIяжатли биъниличилара Бахуни бекIдеш дируси отделлизир дарести дахъал сари. Миллатла литературала фондлис ва илаб бузутас бекIдеш дируси ил сарри.
Ну библиотекализи рашуси манзиллизибадал илала чебаъ лебгIеб жагаси саби, гьарил кам­­си секIалра сунела мерличиб бирар. Биб­ли­о­текализи вакIибсилис чебетаибси къуллукъ гIеб­­биахъути Баху МяхIяммадовнара или­­чил барх бузутира халаси хIурматличил пай­­­­да­ла­би­кIу­тири. Лерилра дусмазир илар ду­ра­­дур­кIути дал­дуцуначи адамти халаси иш­тяхI­ли­чил башули бирар.
— Гьанна хъулирхIелира ну дила бузерила мер­личирхIеливан билзули саби, — бурули сари Баху МяхIяммадовнани, — ГIяхIмадхан Абу-Бакар, Сулайбан Рабаданов, Расул ХIямзатов, Фа­зу ГIялиева ва цархIилти творчестволи зубарта­чи баахъибти пагьмукарти дила хIулбала гьалаб лебтиван билзули саби. ГIе, илдачил ну гьаннара далдуцуни дурадуркIули, лякьиррикIулра. Дугели муэртазир рархли илдачил гьунириулра…
Бархьси саби, Баху МяхIяммадовнани гIяхIцад дусмазир республикала машгьуртигъунти адамтачил дахъал далдуцуни дурадеркIибти сари. Ил илдачил уржили гьаларяхI рашули, жагьилти гIеббурцули калунси сари. Амма ца секIал тамашахIебаресил ахIен, ил сунела пикрумазир ва гIямрула лебилра бетуцлизир гьаннара илдачил рарх творчествола ахъанайтачир къунзрикIули сари. Илди гьанна гIяхIцад дусмазиб ахиратла хъули арбякьи биалра, дубурлан хьунул адамла уркIилизиб мицIирли саби. Илкьяйдали Бахула бузерила гьуни буцибтанира илди чучил барх дунъя ласлизиб лебай мицIирли хIербиру. Ил багьандан бургар пагьмурти дубкIути ахIен бикIутира. Илди наслубачирад-наслубачи диахъути пергерти адамтала пагьмуртира камли ахIен викIалра хатIа бетхIерар.
Дубуртар Улкала тах шагьарлизибси халали ахIенси квартирализир хIу цундешлизир хIер­ри­рули ахIенри, хIурматла Баху Мя­хIям­мадовна, хIечил ихтилатбикIули ва хIу гIерр­ур­цу­ли хIела уркIилис дурхъати адамти барх­ли леб. Гьарли-марли, пайда­агарти мицIирти-ургавийчив адам илкьяйдали черяхIти гьанбикунани вегIла лигала мехIелизи минабарибти чебяхIти адамтачил хIерирни гьалаб саби. Пикрумазив виалра…

 

ПатIимат Кьурбанова