Ассаламу гIялайкум, хIурматла газета бучIанти!
ХIуша гьачамалра пикридухъунтираяв сен нушаб ишди яра итдилти уми лугулил? Яра хIушала умала сегъуна мягIна лебсил?
ХIера, наб ГIябдуряхIман бикIар, гIярабла мезличибала шурбаталли, «Кьудратла ВегIла лагъ» ибси мягIна иргъахъули саби. Илкьяйда бикIутири дила хала дудешлисра, сунесра «Согъри» ибси девра имцIабарили, математикализир ва шахматуназир диахъубти сархибдешуни багьандан, машгьурси гIялим ГIябдуряхIман Сугъурила хIурматлис. Буралли, дила хала дудеш шахматунала шайчирти декIар-декIарти абзаназив чуйнара чемпион ветаурсири, илала багьудлуми каснила кIел дипломра лерри. ГIяхIцад дусмазиб илини математикала мугIяллимли халаси хIянчи барибсири, багьудила шайчибси илала пай илцадра халасири, хIятта ишбархIира ил сунени бучIахъули калунтани дигиличил гьануршули вирар. Илгъуна хала дудешла букьурли ветаурси набзиб гъамтала уркIи бухъахъес сегъуналра ихтияр лебсив? Дила пикрили, агара.
Нушала пергер диннизир дахъал лер жагати уми, чулара мягIналичила бахъли хIебалути: МяхIяммад, ГIумар, ГIябдуллагь, ГIяли, ГIусман ва цархIилти. Илди умала мягIна хIебалнили кьадри-кьимат камдирахъули ахIенну, нушала багьудиагардешличила бурули саби. Сунес бедибси уличи лайикьикес багьандан, адамлис илала мягIналра багьес чебиркур. БегIлара гIяхIси — илала мягIнала балули, иличи вегIра лайикьикес, цугикес къайгънавиркьни. Илдигъунти къиликъуни сари ишбархIи нушала жамигIятлисра хIедиути. Нуша хъалибарглис ва арагIебли умматлис гIяхIдеш бирнила бетуцлизирад гьарахъдикилра. Гьар бархIила гIямрула шившитIай нуша сунела арилизи дуцилра, амма гьачамлис тамай лерил рухIла ва адаб-хIяяла къиликъуназирад мяхIрумдиубли ахIенра.
МяхIяммад яра Ибрагьим или сунес ируси адамли держла бужухIели яра папрус пIагьбирухIели нушала жамигIятлис мурт гIядатласи баркьудили бетаурси? Сен ГIялис ва ГIумарлис макрукьядеш дирес цIаххIебилзуси? Муртличибад бехIбихьибти илцадра жагати уми лайикьагарти баркьудлумачил дарх дузахъес? БегIлара урехиласи, ишбархIи адамтани илдазиб селра тамашаласи чехIебиъни. Нуша илцадра илдигъунти хабуртачи баришкадиублира, хIятта нушала регионна бусурмантас ил гIядатласи кьяйдали бетаурсиван. Амма илди гIядатлати баркьудлуми ахIен ва араси адамлис илди сеналра илдигъунти сари или гьанра хIебиркур!
ХIурматла бегIти! Дила хIушази тилади леб. ДурхIнас жагати уми, хаслира – идбагунала ва асхIябтала уми, дедлугухIели, илдази чус сегъунти машгьурти адамтала уми дедибтил, севан илдала уркIи-хIял хIялалтирил, баркьудлуми дигестирил буреная. Нушала пергер диннизибадти игитуназибад нушани гIибрат касесли сабигу. Илгъуна хIянчи дурабуркIеная дурхIни биштIали лебай, илди бара гъайбикIес бехIбихьибхIейчибад. ДурхIнас бяркъ бедлугуси замана цалра минут уббатес асухIебирар. Гьайгьайрагу, илгъуна бетуцли кIинайс сабухъунира луга. Ин ша Аллагь.
ГIябдуряхIман ИсмягIилов
