МугIяллимла бузери бегIлара къиянти ва жавабкарти санигIятуназибад ца саби. ЗягIипси адамли сунела гIямру тухтурлизи аманатдируливан, багьуди касес бакIибти дурхIнала рухIлашалси дунъяра, гIямрура нушани учительлизи аманатдирулра. Гьар бархIи дурхIнала уркIбази гьуни бургули, илдас багьудлумала дунъялизи умхьни дедлугуси адам сай мугIяллим. Илгъуна мугIяллимличила саби иш белкIра. ГIялисултIанова Гулжанат МяхIяммадовна гьар бархIи гьаларяхI рашуси, бамсри хIебалули рузуси, багьудичерси мугIяллим сари. Гьалабра нушани иличила макьала белкIунсири, чуйна белкIалра илдигъунти пергерти адамтачила лайикьли саби.
Гулжанат МяхIяммадовна МяхIячкъалала А.М.Мирзабековла уличилси №56 ибил школа-гимназиялизир бехIбихьудла классунала мугIяллимли рузули сари. Илала бузерила санигIятлашалти устадеш дусличи дус чеахъдикIули ва дугадикIули сари. 30 дусличирра имцIали дурхIнас сунела диги, мурхьти багьудлуми дедлугули, уркIи кабихьили рузули сари ил. Гулжанат МяхIяммадовнани дарс кабирхьухIели, илис дебали дурхIни дигахъни чебаэсли саби. Дарсличир гъайрикIухIели, ил гьарил девличи чекарилзули рирар, цалра дурхIя сунела хIерудила дурав хIелта, гьарилличи пикри бяхIчииу.
Бурес чебиркур, Гулжанат МяхIяммадовна кIел сменализир рузули сари, гIянручI ва бархIехъ. Гьарил класслизиб бучIахъути дурхIнала лугIи 40-42-личи ва имцIалира абиркули саби. ДурхIни школализи халаси дигиличил ва иштяхIличил башули саби. Учительлис бекIлибиубсигъуна биалли, дус кабикайчи дурхIназир белчIудиличи диги калахъни саби.
Гулжанатли школа Тверская областьлизиб таманбарибсири ва Бадюлинна уличилси Торжокла педагогикала училищелизи карерхурсири. Ил «шула» кьиматуначил хъараахъурли гIергъи, бегI гьалар Гулжанат Хайдакьла районна Хадагила шила биштIаси школализир рузес рехIрихьибсири. Россияла белчIудила заведение таманаибси, ункъли ручIули калунси студенткас шила школализир рузесра гьамадлири. Илини 10-12 дурхIя сабри бучIахъути. Баягъи школализир рузули, Гулжанат 8 дус калун. ГIурра 8 дус гьатIи, ил сари акIубси Жинабила шилизир рузиб.
Училище белчIи гIергъи Гулжанат хъариубсири. Шилизиб 16 дус хIянчира барили сарира, декретла отпусклис гIергъи шагьарлизи гечриубсири. Гулжанат МяхIяммадовна 2014 ибил дусличирад МяхIячкъалала №56 ибил школа-гимназиялизир рузули сари. Ил гIяхIси, жигарчерси учительница риънила дурарад пергерси нешра, хьунулра сари. Сунела мурул МяхIяммадиминичил барх илини 4 биштIати абилкьули сари: 3 рурси, ца урши. Халалгъуна рурси хъариубси сари. Гулжанат МяхIяммадовна хала нешра ретаурли сари.
Гулжанат МяхIяммадовна сари рузес рехIрихьибти цаибти бурхIначирадал сунела бузерилизир творчестволашалти имканти пайдаладируси педагог сари. Чисалра дигIянси ахIен ишбархIи школабазир электронный тяхIярла сагадешуни духIнакайъни. Гулжанат МяхIяммадовнани илдигъунти дарсдешуни итмадан дяркъур, илдачи бурсикариуб ва гьар бархIиласи учительла бузерилизир пайдаладирес рехIрихьиб. Илала дурарадра Интернетла сурсатуназир Гулжанат МяхIяммадовна гьаркьяси, жигарчерси учительница сарливан машгьурриуб. БучIанти руркъути электронный тяхIярла сайтаназир арагIебли Россияла даражаличир дурадуркIути творческий абзаназир, декIар-декIарти конкурсуназир илини гьаман бутIакьяндеш дирули, чедибдеш сархули сари. Сабухъчебси бузерилис пагьмучерси учительница Россияла даражала ХIурматла кагъуртачи, грамотабачи, дипломтачи ва шабагъатуначи лайикьрикили сари.
ИшбархIи школабазир электронный тяхIярла дневникуни (МЭШ), журналти, духIнакайънила хIяракатли бучIути дурхIнала багьудлумачи, челябкьлаличи вайси асар бирниличила, яра илгъуна тяхIярлизир сунени чедиути гIяхIлашалти дарсдешуначила бурахъес тиладибарибхIели, Гулжанат МяхIяммадовнани жаваб чарбатур:
— Учительлис илгъуна тяхIяр дебали халаси кункдешлизи халбирулра. СенахIенну учительлис селра бицIахъес, белкIес хIяжатли ахIен, электронный дневниклизи кьимат кабатес вирули сай ва лебил хIеруди белчIудиличи, дурхIначицун бяхIчиаэс имканбикIули саби. БегIтала урехи алкIули саби бучIути дурхIнас жузи, тетрадуни, белчIудила гIягIниахъулуми къадагъадарили, гьар секIал электронный тяхIярличи шурдулхъан или. ЦархIилван буралли, дурхIни чIянкIли компьютерла кумекличилцун бучIахъути саби или гьанбиркули саби илдас. Жузи чилилра къадагъадарес вируси ахIен, хIушала дурхIни 14 дус биайчи. Илис гIергъи, дурхIнала хьул хIясибли, илдас жузи дарх дихес хIейгули биалли, сегъуна тяхIяр дигулил, учIуси дурхIяли декIарбиру. КьакьадикIес хIяжатдеш агара. Буралли, электронный дневникуни ишбархIи ахIен дакIудухъунти. Илди цацадехIти школабазир, Дагъистайзир 2014 ибил дусличирра пайдаладирес дехIдихьибтири, гьатIира жявли диэсра асубирар, ну иша рузес ил дуслизир сарри ракIибсири. ИтхIелил нушани кьиматуни электронный дневникуназира кадалтутири, илар отчетуни дирутири. Дневник.ру-лизир учительла публикацияби, вегIла автордешлиур делкIунти статьяби, дарсла планти, класслизир дурадуркIути сягIятуни (классные часы) кадирхъутири.
Учительлис белчIудилизиб электронный тяхIяр пайдалабирниличибли дебали гIяхIси портфолио хIядурбарес имканбикIули саби. СенахIенну илар дурадуркIути декIар-декIарти абзаначир бутIакьяндеш дирухIели, учительлис шабагъатунира сархибдешунира имцIали дирахъес вирули сай.
Гулжанат МяхIяммадовнала пикрили, учительлис сунес дигута виркьес асухIебирар, заманаличил варх, ца ганзлизив вашес багьандан гьаладихьибти ишхIелла белчIудила тIалабуни сари илдира, сарира детурхахъес чараагарти. Илкьяйдали учительлис сархибдешунала, чедибдешунала ахъанайтачи ваэс гьамадбирули саби. Гулжанат МяхIяммадовнани лерилра сагати тяхIурти сунела бузерилизир пайдаладирули, гIяхIти хIясилти чедиахъули сари.
БархIи ахъайчи школализир рузули, рамсурли хъули чаррухъунхIели, Гулжанат МяхIяммадовна хъалибаргли гьар шайчирад гIеррурцули сари: беркала хIядурбиру, лерилра хъа хIянчи бекIдиру. Гулжанат МяхIяммадовнала биштIаси хозяйствора леб: гIяргIни, дагъни, кIуркIурти, хъа гIярми ва цархIилтира. Илдани Гулжанат МяхIяммадовнас кьаркьа бамсри чебарбукахъес ва мурталра ахъси гьавличир риахъес кумекбирули саби.
«Виубцад муруй кумекбирули вирар, дила баркьудлизир гIеррурцулра. Дила хъалибаргла кумек агарли, гьайгьарагу, тамай хIянчилизи рухIнаахъес наб къиянни бири», — рикIули сари ил.
Гьалабра бурибсири, Гулжанат МяхIяммадовнала адам гIяхIлашал тамашавирахъуси къиликъличила. Илини гьаннара мурталра кьяйдали, сунени бучIахъути дурхIни гьар бархIи кIина, класслизи абицIухIели, ва хъули гьуниббалтухIели, кIапIбуцили, илдачи хъябруцриркуси сари.
ДурхIназир мугIяллимла санигIятличи диги, хIурмат адилкьес чебси саби бегIтачира, сенахIенну иличирли дурхIнала бяркълашалти адуцала гIяхIдулхъниличи гIяхIси асар бируси саби. ДурхIначил уркIи гьаргли ихтилатрикIниличил, илдала бухIнабадси шаласи дунъя гьаргбарес гьуцIли риъниличил Гулжанат МяхIяммадовнани педагогла, мугIяллимла хIурматла у тамай марбирули сари.
Бара гьалабван шалгIеббухъунси учительла БархIиличил бархбасахъи, Гулжанат МяхIяммадовна «Замана» газетала шайзирад мубаракрирулра ва илис сунела чебяхIси бузерилизир гьатIира дахъал сархибдешуни, къаркъагъуна арадеш, хъалибарглизиб талихI, баракат дулгулра. Мурталра разили, гIямрули шадрирули, хIулкIули калаби хIу!
П.Сулайбанова
