Хайдакьла районна бекI ГIялим Темирбулатовли октябрьла 11-личиб шимала администрациябала бургачил, муниципалитетла учреждениебала ва цахIнабикунала хIянчизартачил совещание дураберкIиб.
ВатIайс дебали къиянси манзиллизир чула жан мяхIкамхIедирули, пачалихъла хъарбаркьуни тамандирули, бархьдеш, азаддеш ва паргъатдеш багьандан бургъутас кумекбирни, дявила гьав гIеббурцни ва илдала хъалибаргунас кумек гIеббиахъни лебил жамигIятла чебла саби. «Нуша ишар гъайдикIули, дузули, хIянчурбачи дашули вяшдикIухIели, итаб нушала дурхIни гьанкI ва багьла агарли душмантазирад нуша дерцахъес тIашли саби. Илди нушала Игитуни саби! Илди гIеббурцес нушаб хIяжатли саби. Бургъантала хъалибаргунас хIяжатси кумек гIеббиахъни ва челукьути масъулти ирзни нушала чебла саби. Гьайгьайрагу, хъалибаргла сегъунтилра хIяжатдешуни агни балути бургъантасра чула хъарбаркьуни тамандарес ва илдачицун пикрибикIесра гьамадли бирар», — викIи районна бекI.
ГI.Темирбулатовли бурили кьяйда, районнизиб «Хайдакь» бикIуси гIяхIбаркьла фонд абхьниличила буриб. Фондли дучибти арц СВО-ла бутIакьянчибас кумеклис дурхьути сари. «Фондла реквизитуни социальный сетаназир ва районна газетализир гьаладихьили дирар. Гьарил кумекбарес дигусини, илди баянти хIясибли фондлизи арц дархьес вирар.
Совещаниела дазурбазиб шимала бургани лебилра хIукуматла хIянчизартала ца бархIила арц ва шимала бургала вецI-вецIал азир къуруш тIашкаэс ва СВО-ла бутIакьянчибас кумеклис дурхьес ибси пикри гьалабихьиб. Учибикибтани ил пикри цаагили кьабулбариб. Районна бекIли илдас халаси баркалла багьахъур ва хайдакьланти мурталра малхIямти хIял-тIабигIятличил декIарбулхъути саби или буриб. Сунела заместитель З.Нагьбаровличи илини хъарбариб штабла хIянчизартьачил вачуртала мераначи ва кафебази архIя дураберкIахъес ва мерличибти предпринимательтала пикри ил гIяхIбаркьла балбуцличи битIакIахъес. «Нушала предпринимательти гIяхIти баркьудлумала шайчиб кавлути ахIен,ил багьандан фондла бузериличила илдази бурес хIяжатли саби. Цаси баркьудилизи илданира чула пай кабирхьниличи вирхулра», — викIи ГIялим МяхIяммадович.
Хайдакьла районна администрацияла пресс-служба
