Адамлис багьудлумала гIевдухьли детарути сари шимазирти школаби. Илаб саби адамти бегI гьалаб бучIес, лукIес бурсибирути.

Гьаланачирал кабихьибси хьулчилизибад дигахъу лацла дебадешра. ХIера, тяп илкьяйдали бетарули саби адамла гIямрулизибра. Школализир дедибти багьудлуми арагIерли гIямрулизир багаладирули дирар. Ил багьандан школали нушала гIямрулизиб халаси мерра бурцуси саби.

Даршал дусла тарихла бухъяндеш ахъили саби гьанна Ахъушала районна бегIлара гIяхIтигъунти школабазибад цали бетаурси МухIела лицейлира. Илала бяхIяназир мурхьти багьудлумира касили, гIямрула бягIуси дякьличи дурабухъун бахъал выпускникуни. Илди-ургаб камли ахIен машгьуртира.

Ахъибти дусмала лагличи чарвяхъили хIеръалли, лицейлизиб бучIули калунтала ва бучIутала сархибдешуни чедиули сари. Илдала кумекличил школала гIямрула лерилра бутIнира гьаргдирар, илдачил дарх – кадикибти дарсдешунала, сагати гIядатунала манзилтира.

Сецад дусми ардукьялра, сецад дарсдешуни кадикалра, мурталра школала пахрули кавлути саби адамти, чулара бамсриагарси бузериличил, санигIятличи дигиличил, устадешличил школа вавалибяхъяхъес, гьалартала къяянази дурабухъахъес чули бирусигъуна къайгъи дакIубирути.

Школа таманбарибтанира сеналра илар деркIибти дусми, чула мугIяллимти хъумуртули хIебирар, даим илдас баркалла бикIар. ХIера, гьалабванра белчIудила сагаси дуслис школали Ризван Рабадановла шайзибад савгъат касиб.

Бузерила илгъуна асилси гьуни ахъибси лицей ва илаб дурхIни бяркъличи биркахъули бузути мугIяллимти уркIи-уркIилабад мубаракбирехIе. Мурталра гьаладяхI дашулицун калабая!

Нушала корр.