Гьар бархIи савли нушачил варх печатьла Юртлизибси нушала газетала редакциялизив ца дебали гIяхIси урши вируси сай. Илала неш ПатIимат ГIябдулжалиловна нушала газетала жавабла секретарьли рузуси сари. Нешра уршира печатьла Юртлизи барх башути саби. Урши нешла кабинетлизив хIери баайчи ууси сай, хIерейс илавадли школализи вашуси сай, бархIехъ дурсри тамандиубхIели, школализивад гIурра нушачи чарулхъуси сай. Уршили, нешла кабинетлизи кайили, сунела дурсри хIядурдирути сари.

Нуни, газетала корреспондент сайливан, жавабла секретарьличи къуллукъ ахъили, илала кабинетлизи айцIухIели, нешла столла ца шайчи кайили лукIуси яра учIуси виштIаси урши мурталра чейули вирус. Гьачам, гьабил дус бииши, илала неш кабинетлизир агархIели, нуни ил уршиличил гъамли тянишиэс пикрибарира.

ИтхIели ил уршира нурацун сарри халаси печатьла Юртла гехIъибил дерхIличир дирути мурул адамти. Газета бучIантас гьанбиркур бургар, итхIели чичилра лякьирухъес имкан агарси ну гъай далуси попугай асес хьулухъниличила. Наб попугай асес бетхIеур. Амма ца гIяхIси уршиличил тянишиубра ва юлдашикира.

Ит бархIи илини, сунела тетрадь абхьили, илизи дугьби лукIулри. Нуни биалли, илала тетрадь набзи сасира ва, иларти белкIаначи хIерикIули, викIулра:

— ХIу чумъибил класслизив учIусири?

— Цаибил, — викIар ил.

— ВяхI! Илцадра жагати хатI дирутив гъари цаибил классла учIанна? Къучакъ! – викIулра ну. – ХIед чи бикIара?

— Адам.

— Нура адам сайра, — викIулра. – Наб Мурад бикIар. У се саби хIела?

— Адам, — гIурра тикрарбариб илини.

— Адам бикIуси адамрив?

Уршили бекI гьакIбариб.

Нуни илис Адам бикIнира балулри. Дахадаевла районна Кьункьила шилизивадси илала хала дудеш ГIябдулжалил Казимовра валусири. (Гьанна илра, нуван, ишав, шагьарлизив, хIерирули сай). Биалра, ну дурхIялизи, сунечила селра хIебалусиван, гъайикIулри.

— Ну дибгашан Мурад сайра, — викIулра ну. – ХIела хала дудеш Жалилличи дила саламти духа.

— Хала дудешлис ГIябдулжалил бикIар, — иб илини.

— ГIе, гIе, ГIябдулжалил Казимович, — викIулра ну, Кьункьила колхозла вахъхIила бекI бухгалтер, нушала районнизив бахъли валуси хIурматла адам нуйчивра халаси виъниличила гьанбикили. — ХIела хала дудешличи духа дила саламти.

— Архис, — къантIдарибтири дурути верхIел дус виубси уршили: белики, илис хъули хIянчи  таманбарес гIягIнили бурги…

Ишдус майла 15-личив нушала Адам 10 дус вируси сай. Адамла 10 дусла юбилей хамис бархIи бетарули саби. Биалра, баласра нуни, ил бархIи бархIехъ ил мубаракварес хала дудеш ГIябдулжалилра хала неш Мариятра илдачи лябкьян. Гьайгьайрагу, илдани Адамлис савгъатунира лерху.

— ХIела дудешлис чи бикIара? – хьарбаира нуни гьачам Адамлизи.

— ХIусен бикIар. Илини гьарахъларад машинаби дикути сари.

— Гьа-а-а, аргъира. Баркьудила адам, — викIулра ну.

— Предприниматель, — ишабра балбариб Адамли нуни буруси.

— Предприниматель урус мезли саби, даргала мезли – баркьудила адам бикIар. ХIу дарган виъни хIуни балусив? – хьарбиулра илизи гIурра.

— Балулра, — викIар ил. – Гульнара Алаутдиновнара дарган сари.

— Ил чи сари?

— Дила учительница.

Адам МяхIячкъалала урчIемъибил лицейлизив хIябъибил класслизив учIули сай. Илала учительницас Гульнара Алаутдиновна бикIар. Адамла ва илала нешла гъай хIясибли, дебали гIяхIси учительница руили сари Гульнара Алаутдиновна. Тетрадуназирти Адамла хатI чедаибси дила бекIлизира илгъуна пикри бакIиб: дебали гIяхIси бехIбихьудла классунала учительли ахIи илцадра жагали лукIахъес дурхIни бурсихIебиру. Ну авцIали дус урус мезла учительли ва вецIал дус школала директорли узули калунсира, ил багьандан мугIяллимла хIянчи илини учIахъусила тетрадь хIясибли нуни кьиматлабирес вирус.

— ХIу отличник ургуд? – хьарикIулра ну Адамлизи, мякьлар неш агархIели.

Отличник сайра викIес илис циила къиянбулхъусиван бизурну, нуни суал цархIил тяхIярли гьалабихьира:

— ХIела имцIати кьиматуни «шулаби» дургар, цачумал «авлара» лерли?

ИлхIели Адамли гIячихъли бекI гьакIбариб. Наб гIяхIбизур илала буцалачебдеш: гьеч пикри аги Адамла набзи къунба угьес.

Адамла сунечив халаси МяхIяммадрасул бикIуси узира лев, сунечир риштIаси Амина бикIуси рузира. Амма илди нушачи башути ахIен. Ца Адамцун сай нушачи вашуси.

«ХIу чи ветаэс дигулри?» — хьарбаибсири нуни Адамлизи гьачам. «Мушлукья», — викIар ил.

Адам азадли мушулбашутала тренировкабачи вашули виъни нуни иличибли багьурси  саби. Илини гIяхIси спортла жура чеббикIили саби. Ну илала гьарбилзниличира вирхулра: дагъистанлантигу дунъяличиб бегIлара цIакьти мушлукьяби. Адам илдала къяяназивадси ца ветарниличира вирхулра ну.

Чуйнара дила белкIаназив гьанушибси сай нуни шилизив дила унрали вируси Дагъиста халкьла поэт Сулайбан Рабаданов. Рахли Адамлизивад нушагъуна лукIуси адам  ветаалли, илини нура гьануршура ургус сунела хабуртазив. Наб дебали дигахъаси или биубли.

Адам, савли жаняхIлизи ацIибмад, набзи  салам гес ва някъ буцес дила кабинетлизи ухIнайхъуси сай. Рахли хIянчила вакIес иличив кьаниасли, ну илизи салам бедес вашусира. Илкьяйдали, кьанни вакIибси — гьалав вакIибсиличи.

Нешла кабинетлизив Адам хIергасли, дирхаирая, бусягIят дила уркIила хIял барсбирули бирар. Ишди бурхIназивра, Адам зягIипиркули, дила уркIила хIял кIина-хIяйна буун. Ахирличибра бурасли, Адамлизивад гIяхIси адам ветарар.

ХIяжимурад Ражабов