ХIяжимяхIяммадов Булат ХIяжимуродович акIубси сай 2005-ибил дуслизив, Ахъушала шилизив, хIурматла хъалибарглизив. Булатли 2022 ибил дуслизив Ахъушала хIябъибил урга даражала школа таманбарили гIергъи, ДГУ-ла гьалабси юридический колледжлизи керхур. 2024 ибил дуслизиб колледжла «Организация социального обеспечения» бикIуси факультет таманбарили, ВатIайс къуллукъбарес арякьун.
Булатли ВатIайс къуллукъбирули сай Ставрополь шагьарлизибси 41600-ибил дявила частьлизиб. Илини къуллукъбируси частьлизирад чумал Баркаллала кагъар, Грамота дакIили сари илала бегIти ХIяжимурад ГIямаровичличи ва Зумруд Исякьовначи.
Кагъарлизир частьла командирла къуллукъуни заманалис дузахъуси А.Кузнецовла шайзирад баркаллала дугьби лер: «Баркалла багьахъес дигулра ишгъуна духуси, гIяхIгъабза, ВатIайс марси урши айкьнилис ва гIяхIси бяркъ беднилис. ВатIайс къуллукъбируси заманала ухIнав Булатли сай гIяхIси шайчивадцун чеахъиб, жавабкарси, чеветаибси, духуси, дявила санигIятличи дигичевси, ил багьес гъирачевси. Сай ургъуси частьлизибти цархIилти солдатунала ургаб Булатли халаси хIурмат сархили сай. ХIушани пахрубарес дирудая ишгъуна – ВатIайчи дигичевси уршиличи». Лер Булатлис дедибти ВатIайс мардешличил, хIялалли, жавабкардешличил къуллукъбирни багьандан ва Россияла Федерацияла Конституцияла БархIилис, ВатIан Балтахъанна БархIилис багъишладарибти Грамотаби.
Булатла неш Зумрудли ва дудеш ХIяжимурадли хIябал урши-рурси абилкьули саби. Зумруд Исякьовна Ахъушала урга даражала хIябъибил школализир учительницали рузули сари. Сунечи барх бузутала ургабра Зумрудли хIурмат сархили, сунени бучIахъути дурхIначи дигичерли, илдази багьуди касахъес къайгъилизир, черетаили рузули сари.
Ара-сагъли чарухъаб сунела бегIтачи гIяхIгъабза урши Булат!
С.ГIябдуллаева
