Ахъушала шилизибси тарихла-крае­ведческий музейла директор Зубалжат Мир­зае­ва­чил къарширикибхIели, илини буриб: «Бутрила ши­лизи архIя дураберкIира. ХIурматла, гIяхIлас мурталра разити, па­сихIти адамтала хъа­либаргличил гьу­нираира. Ил­дачила газетализи бел­кIес гIяхIсири».
Илкьяйдали, ну тянишриубра Бутрила шилизиб хIербирути хIурматла адамтачил — Ражабов МяхIяммад Ражабовичличил ва Кьадиева Рукьият Кьадиевначил.
Илди барх 53 дус хIербирули саби. Цаличи ца дигиличил, балгундешличил хIеркабирули, авал урши-рурси абикьурли, гIямрула дякьличи дураиб.
МяхIяммад ва Рукьият акIубти саби Бутрила ши­ли­зиб. КIилилра гIяхI­ти кьиматуначил Бутрила шилизибси урга даражала шко­­лара таманбарили, МяхIяммадли чебяхIси да­ра­жа­ла, Ру­кьиятли ургабси даражала, хасси багьудира ка­­сиб.
МяхIяммад Ражабович Дагъиста пачалихъла университетлизи керхурли, физикала факультет та­ман­барили, мугIяллимла санигIятличи вегIиубли, ХIин­тIала школализиб сунела бузерила гьуни бехI­би­хьиб­сири. ГIур Бутрила шилизибси урга даражала школализив физикала дурсри кадирхьули узули калун, бамсриахъес хъули арукьяйчи. МяхIяммад Ражабовичли сунени кабир­хьуси предметличи диги акIахъес, илдази сага­дешуни абхьахъес, илдас гIяхIси бяркъ бедес къайгъилизив узули, сунела бузерила гьуни ахирличи бикахъиб. Илала бузерила стаж хIябцIали дусличибад бухъи саби.
МяхIяммад Ражабовичли бучIахъути дурхIнани физикала предметла шайчирти районна кьадрила олимпиадабазир бутIакьяндеш дирули, гьаларти мераначи лайикьбиркули бири. Школализив узухIели, МяхIяммад Ражабов Ахъушала районна бухIнабти бегIлара багьудичебти физикала мугIяллимтала лугIилизив вири. Илини «Нетрадиционное мышление» би­кIуси технический кружок бузахъусири. Ил кружок Дагъиста школабала-ургаб бегIлара гIяхIтигъунти кру­жо­кунала лугIилизи кабурхусири. Илизир бутIа­кьяндеш дирути дурхIнани, «мотоблок» бикIуси хъумачир декIар-декIарти хIянчи дируси, «Элект­ро­пастух», суненира 14 000 Вольтла напряжение лугуси секIал, илдала дурабад дурхIнани чула багьуди ахтардибирес кумекбируси «Экзаменатор» ва Поповли бегIла гьалаб дунъяличиб барибси, гьарахъси мерличибад гьаваличибад бархбас кабилзахъуси приемник-передатчикла бузуси модельра дарибтири. Илди гьаладихьибтири Дагъиста школабала пагьмучебти бучIантас хасбарибси выставкаличи. Ил выставкаличир кружокла бутIакьянчибани ДР-ла багьудлуми тIинтIдирнила шайчибси Минис­терствола шайзирад цаибил даражала авал Диплом сархибтири. Кружокла бутIакьянчибани балкьаахъурси хIянчи ахъли кьиматлабарили, «Юный техник» бикIуси журналла редакцияла шайзибад чуйнара Баркаллала кагъуртачи лайикьбикиб.
МяхIяммад Ражабов хъуливра акьули уули ахIен, илала бекIлибиубси хIянчи бетаурли саби даргала миллатла халкь хIербирути мер-мусаличила, илдала тарихличила баянти дурчни. Дахъал дусмазир М.Ражабовли дучили лер гIяхIцад макьалаби, даргала миллатла «Даркка» бикIуси пачалихъла цалабяхъличила (талканстволичила) бурути, сарира цаибти дусмачибад бехIбихьили 1700 ибил дусличи бикайчи буибси саби или марбирути. Ил «Даркка» бикIуси талканство бехъубли гIергъи дакIубиубли буили саби «Ахъуша-Дарга» или бурули сай МяхIяммадли. Иличила дахъал гIяраб мезличил делкIунти белкIани даргили сай. Сарира Дагъистайзирцунра ахIи, гIярабла улкназирра Ираннизир ва цархIилтира мер-мусаличир делкIунти. Гьалабла манзиллизиб Дагъистайзир гIярабла мезличил лукIутири. М.Ражабовли дучибти белкIани хIясибли «Даркка из глубины веков» бикIуси жуз лебли саби дурабухъахъес хIядурбирули. Даргала миллатла тарихличила багьес дигути, иличи иштяхI акIубти ил жуз дурабухъунхIели тянишбиэс бирар. Илгъуна хIянчи бетерхахъес багьандан халаси пасихIдешра, сабурра, багьудира, сунела миллатличи, халкьличи, тарихличи, ВатIайчи дигира диэс гIягIнили сари. Илала мурхьси пикриличил барибси, халкьлизи ва чеабиуси наслулизи миллатла тарихличила багьахъес, иличил тянишбарес дураберкIибси халаси бузери ахъли кьиматлабарес гIягIнили саби.
МалхIямси, сабурла, сунела гIямрула вархкья гьар шайчивад гIевурцуси Рукьият Кьадиевани экономистла са­нигIятличи регIриубли, Бутрила шилизибси колхозла бух­галтериялизир ва гIур Бутрила шила Советлизир секре­тарьли рузули, дахъал дусмазиб хIялалси бузери барили сари.
Чула авалра дурхIялизи чебяхIси даражала багьудира касахъиб. Гьанна илдачибад акIубтани колледжуназиб ва школабазиб бучIули багьуди кайсули саби. ДурхIначибад акIубти абикьахъес, илдас гIяхIси бяркъ бедес къайгъилизиб саби МяхIяммад Ражабович ва Рукьият Кьадиевна. Саби бузули калунти коллективтала ва Бутрила шила халкьла-ургаб илдала хъалибаргли халаси хIурмат сархили, баркаллаличи лайикьбикили саби.
ГIямрулизир гьарбизуни имцIадикIули, гьаннала гIергъира чула дигутани разибирули калаб!