Дагъиста халкь­ла культура мяхIкам­бир­нила ва нешла мез гьаладяхI дашахънила фондли дуцIрум нешла мезла курсани дурадеркIибтири ДР-ла БекIла Грантла икьайчибли. ДуцIрумла хIябалра базла духIнар дурхIнани кIарахъала, даргала, къумукъла, лезгибала ва лакла мез дяркъур. Даргала кьукьяли 12 дурхIя цалабяхъиб. Илдазибад бахъалгъунтани нешла мез далули ахIенри. ХIязла жура курсанала бекI­либиубси хасдеш сабри. Кур­сани жумягIли хIяйна кIикIел сягIят дурадуркIутири. Цаибил сягIятличир хIязла гIягI­ниахълуми пайдала­дирул­ри, кIиибил­личир — азбарлизиб яра спортзаллизиб ролани хIясибли вяшбикIахъулри. ДурхI­нас илди тяхIяр-кьяйда тамашадизурлири, гIяхIди­зурлири ва, кьанхIе­биубли, халаси иштяхIличил курсаначи башулри. ДурхIни кадихьибти дурсри хъумхIертахъес жибариб проектла автор ва руководитель Шамсият Сул­тан­беговани, илкьяйдали хъу­либра нешла мезличил гъай­бикIахъес бегIтазира тила­дибариб. Школализиб хIе­бузули хьалли, нешла мез дяркъяхъес халати къайгъни дакIударибти педагогунасра баркалла багьахъур илини. Дарган мезла дурсри жа­ми­гIятла хIяракатчи, Урусла — Дарган мезла словарьла автор МяхIяммад Зайнудиновичли кадихьиб. Нешла мезличи дурхIнала пикри битIикIесли кадирхьулри илини дурсри.
Нешла мезла дурсрачи дурхIналацунра ахIи, илдала бегIталара иштяхI алкIулри. Чула дурхIнани дяркъурти дугьби хъумхIертахъес ибси мурадличил хъулибра илди нешла мезличил гъайбикIахъес къайгъибирулри бегIтани. Гьайгьайрагу, дурхIнази кIирка хIурпри дяркъяхъес гьамадси хIянчи ахIенри. Гьамадли хIебиалра дурхIнани 250 дев дяркъур ва илди бекIахъудила гIямрулизир пайдаладирес бирар. Гьар бархIи нешла мезличил гъайбикIалри гьатIиралра гIяхIсири, сенахIенну вегIла нешла мез бархбас бузахънила тяхIяр-кьяйда ахIен, илди мицIирси тарих, урхIмешули ахIенси культура ва миллатла рухIла давла сари. Мезли сунезир даршдусмала пасихIдеш, гIядатуни, буралаби мяхIкамли дихIниличирли, гьар бархIи нешла мезличил гъайикIни дебали мягIничебсили бетарули саби. Нешла мез дузахъниличирли тухумла ва арагIебли миллатла хасдешуни мяхIкамли дихIесра имканбикIур.
Шагьарла дурхIнала гъайла даража гIяхIбухъахъес ибси мурадличил Дагъиста халкьла культурала фондли нешла мез руркъяхънила баркьуди даимбиру.