«Сунени дегIунти гье чедакIибти дурхIначи саби мугIяллимли пахрубируси», — викIусири машгьурси химик Дмитрий Менделеев
ХIязлис ахIен мугIяллимти музурбар къаркъубазирад жагадешла ваяхI дирути мургьи-арцла устначил цугбурцути. Илгъуна тяхIярли пагьмучебти педагогунанира бархIиличи-бархIи секIал хIебалути дурхIни гьарли-марти устни бетарахъути саби. МугIяллимла санигIят мурталра бегIлара хIурматла ва, цазаманализиб, бегIлара къиянси бузерилизи халбируси саби. Буралли, илдала устадешлизибад, багьудлумала бягIуси авидлизибад дигахъуси саби нушала улкала челябкьлара. МугIяллимти агарти биалри, мажахIят бииши машгьурти гIялимти, инженерти, тухтурти…
ДурхIназир багьудлумала гье делгIули, 35 дусличирра имцIали мугIяллимли рузуси Залкеприева Раисат Багьаудиновначила саби иш макьала. Ил Сергокъалала районна ГIяялизимахьилизир акIубси сари. Шила школа таманбарили, ДГУ-лизи карерхурсири ва 1986 ибил дуслизиб ил ункъли хъараахъурсири. Бузерила гьалар-гьаларти гунзри Ахъушала районна Урхьучимахьила школализир кацIиб. 1994 ибил дусличи бикайчи илаб хIянчи бариб, гIур – Сергокъалала 1-ибил школализи шуррухъун.
Раисат Залкеприева 1994 ибил дусличирад Сергокъалала 1-ибил школализир дарган мезла ва литературала мугIяллимли рузули сари. Школализир рузути дусмазир сари санигIят ункъли бяркъурси ва жавабкардеш дихуси педагог сарливан чебаахъиб, барх бузутала, дурхIнала ва илдала бегIтала хIурматличи лайикьрикиб. Гьарил дарсличир методикала декIар-декIарти тяхIяр-кьяйда пайдаладирули, дарс тамашаласи бетаахъес ва дурхIнала пикри битIакIес кьасбирули сари. Р.Залкеприевани бучIахъути дурхIнани районна ва республикала олимпиадабачир, конкурсуначир бутIакьяндеш диру ва гьаларти мерани кайсу. ДурхIначи дигичерси, уркIилис кьабулси баркьудилис марси, сунечи хъарси ункъли таманбирули рузуси Раисат Залкеприевани школала гIямрулизир жигарла бутIакьяндеш диру, илкьяйдали семинартачирра конкурсуначирра бутIакьяндеш диру, устадеш дехIсурдарес ибси мурадличил цархIилти мугIяллимтала дурсрачи рашули рирар. Илини «Нешла мезла бегIлара гIяхIси мугIяллим – 2012» бикIуси конкурсла районна бутIализиб 1-ибил, «Нешла мезла бегIлара гIяхIси мугIяллим – 2015» бикIуси конкурсла районна бутIализиб 2-ибил, республикала даражала конкурсла «Национальный» номинациялизиб 3-ибил мерани касибтири. Илкьяйдали «Нешла мезла бегIлара гIяхIси мугIяллим – 2021» бикIуси республикала даражала конкурсличирра бутIакьяндеш дарили, гIяхIтигъунти мугIяллимтала вецIлихълизи карерхурсири.
ДурхIнас бяркъ бедлугнилизиб ва белчIуди кайсахънилизиб нушала улкала декIар-декIарти регионтазир гIяхIцад къияндешуни алкIули сари. ИшбархIи нешла мез руркъни бегIлара къиянси масъалали бетаурли саби. ДурхIназир нешла мез руркъниличи иштяхI акIахъес къиянни саби, амма Р.Залкеприевани дарган мез ва даргала литературала руркънилизир далдурцути декIар-декIарти тяхIяр-кьяйдали, дурсрачир пайдаладирути педагогикала технологиябани гIяхIти хIясилти чедиахъули сари. Нешла мезличи дурхIнала пикри битIакIес багьандан, мугIяллимли дарс-хIяз, дарс-лекция, дарс-КВН, тестани, квестани, дарс-сапар, багьираби дурадуркIули рирар.
Раисат Залкеприева биштIатачил ва халатачил гьамадли гъай дургуси, хамдеш-халадеш агарси, малхIямси хьунул адам ва гIяхIси педагог сари. Илини этнопедагог Тажидин СягIидовла хIурматлис хасбарибси «Саидовские чтения» бикIуси республикала гIилмула-практикала конференцияличир, «Пути повышения эффективности преподавания даргинской литературы в школе «НИИ институт педагогики имени А.А.Тахо-Годи» бикIуси конференцияличир, илкьяйдали Национальность.ru проектлизир бутIакьяндеш дарибтири. 5-6 дус школала мугIяллимтала методикала цахIнабикла руководительли калунсири.
Иличил бархбас кабизахъес ва камси ихтилат барес имканбакIиб.
— Раисат Багьаудиновна, хIуни бучIахъути дурхIнани олимпиадабачир, конкурсуначир бутIакьяндеш дирути дургар?
— Гьайгьайрагу, дирути сари ва гьаларти мерани кайсу. Нуни ручIахъуси ца рурсили республикала даражала олимпиадаличиб 2-ибил мер касиб ва ДГУ-лизи карерхур.
— МугIяллим ретарус ибси пикри севан бакIибси?
— Нушала хъалибарглизиб авал мугIяллим леб. Халасигъуна рузи 40 дус мугIяллимли рузули, гьанна пенсияличир хъулир сари, узи ГIяялизимахьила школализив узули сай, ца рузи Лавашала районна ЭбдалгIяяла школализир гIяхIцадхIи рузули сари, дила нешла рузи мугIяллимли рузусири. Нушала бегIтани нушази чебяхIси даражала багьуди касахъес халаси къайгъи барибсири.
— Нуни чебиуливан гьаннала жагьилтас нешла мез дяркъес дигули ахIен. ДурхIнала бегIтира илди чинар ва селис гIягIнидиркути бикIули саби. Илала хIекьлизиб хIушала школализиб сегъуна аги кабизурли?
— ГIе, бархьли рикIулри, дурхIнас дарган мез дяркъес дигули ахIен. Се дирути нушаб илди мез бикIути бегIтира бирар, сен хIедалути, дяркъес гIягIнити сари бикIутира бирар. Школабазир дарган мезла дурсри камдарили сари. Классунази бегIла гьалаб лябкьути дурхIни урус мезли саби гъайбикIути. Жагьти бегIтани дарган мез я чули дагьес къайгъибирули ахIен, я дурхIнази илди дагьахъес пикри агара. Урус мез гьамадкадилзули гъайбикIули саби. ДурхIнази нешла мез дяркъяхъес, сегъунти-биалра хIясилти сархес къиянни саби. Нушала школализиб дарган мезла дурсрачи хIебашути агара, амма, башули хьалли, мез хIедалути бахъал саби.
Баркалла, Раисат Багьаудиновна, замана баргили ихтилатбарнилис.
Раисат Залкеприевани багьуди гьалабяхI башахънилизи белгиси пай кабирхьули саби. Илала къайгъни пикрила дурар кахIелун ва арбякьунси дуслизиб илис «РФ-ла багьудила хIурматла хIянчизар»-ла у бедиб.
Раисат Багьаудиновнас, гьаннала гIергъира сархибдешуни дирахъес чIумаси арадеш булгехIе.
ПатIимат Мирзаева
