ГI.Тахо-Годила уличилси Да­гъис­та Миллатла музей­лизиб, ишди бурхI­назиб, сирхIяла халкьла яшавлизир дузахъули калунти, дур­хъати чIян­кIила диштIати бутIназирад, дирбубли дарибти, жагати ваяхIла выставка бетурхули саби.

Илар чедаэс вирар, биштIати рурганти, сириличи, столличи, буруш-гIя­на­лаличи чедуршанти, гIянулбала къуп­ри, чутхъни, гIурра цархIилтира ус­­тадешчерти някъбани акIахъубти жагадешуни.

Илди лерилра секIал, Ахъушала районна музейла директор Зубалжат Мирзаевани, халкьли дархьдатуртала даражализирти, Ахъушала районнизи кадурхути диштIати махьурбазир даргили сари. Дахъал дусмала, бамсриагарси илала бузерили, хIербикIути тамашабирахъуси, выставка акIахъублири.

Выставкали чебиахъули саби, секьяйда гьар секIал мяхIкамбирути, устадешчебти буилил нушала хала нешани. Илдани селра лайбикIуси ахIенри, устадешчерти някъбачил биштIаси чIянкIила кесекра жагаси секIайчи шурбулхъахъусири.

Дербентлизибад, сирхIяла махьур­базибад булугуначи, гIур илабад Грузиялизи аркьуси «АрхIяла гьунчирад», («Шелковый путь») сирхIяла хьунул адам­тачи диутири илди дурхъати чIян­кIи. Дурхъати, архIяла, дарайла, харала чIян­кIи­лизирад, сирхIяла хьунул адам­тани, мекъ-сяхIбатличи дихути, цIи­куртани челгьути палтар ибутири. Палтар дирсибхIели калунти чIянкIила ке­се­куназирад, бурибти художникуналай­чиб­ра халаси пагьмуличил, жагати се­кIал алкIахъутири.

Бурес чебиркур, гIяхIял хьураварес тавханара, жамигIятла урга, яра архIяличи дурабулхъухIели, чегьес жагати палтарра сирхIянтала мурталра дирутири. Жагали бегI­­биубли мекъ-сяхIбатличи,  архIяличи баш­ни, илдала культурализиб бузахъуси, гьан­­нара бузули лебалси гIядат саби. Ил­кьяй­­да илдани, чула хIурмат-кьимат ахъли ди­­хIутири.

СирхIяла хала нешанала дарайла хIев­ни, художественная самодеятельностьла бутIа­кьян­чибани челгьули, арбякьунси даршдусла 70-80-ибти дусмазир чедаэс вирусири. Илди Кубачила хьунул адамтани ва цIикуртани, гьаннара дузахъули лерти, хIевначи мешутири.

Дубурти дархьдатурли, дурарти мер-му­саличиб чула яшав даимбарибти сир­хIянтани, чула гIядатуни, палтар, культура, далай-делхъ детахъахъили сари или децIрикIусири. ХIя­кьи­кьатлизир биалли лерилра детахъили хIе­диъниличи разилира. Сир­хIян­тала дурхъати палтар лернилис бикьридеш дирули сари, дахъал диштIати чIянкIила кесекуназирад дарибти, выставкаличи гьаладихьибти, жагати ваяхIлира.

Выставка ибхьухIели Ахъушала районнизибадти сир­хIян­тани чегьурти палтарли, дарибти делхъанани, делчIунти далуйтани, илдала культурала давлачебдеш лебилра Дагъиста халкьанас гьаргбирулри.

«СирхIя, гьанналис чилилра гьарг­хIе­барибси тамашала дунъя саби, илар дебали жагати секIал даргес вирули сай», — рикIули сари Ахъушала районнизибси музейла директор Зубалжат Мирзаева.

СирхIяла хьунул адамтала някъла устадеш, ГI.Тахо-Годила ули­чилси, Да­гъис­та Миллатла музейла хIянчизартани ис­кус­стволизибси (импрессионизм) бикуси ху­дожникунала бетуцличил цуг­бур­­цули саби.

Ил бетуцлизив чеввикIибси художник сайри Казимир Малевич, суненира лебтанилра балуси «ЦIудара квадрат» суратбарибси. Наб биалли, Нидерландиялизивадси художник Пит Мондриан,  сирхIязи вакIили, музейлизир  гьаладихьибти лерилра жагати секIал черкадяхъили, илди сунени суратдарили сари или гьанбикиб.

Илкьяйдали К.Малевичла «ЦIудара квадрат»-личиван, П.Мондрианна авмузантачиван, хIулбала хIер кайсули хIерикIес вирули сай СирхIяла хала нешанани акIахъубти, дахъал ранганарти, жагати секIултачи. Илар, чула ургар далдикибти, дахъал ранганарти квадратуни, хIябмузанти, авмузанти даргес вирули сай, хIятта бурибти художникунасра илдала пагьмуличи ва устадешличи баэс багьандан гIяхIцадхIи гIурра бузес чебиркур или гьанбиркули саби.

СирхIяла устадешчебти хьунул адамтани саби-алавси дунъя дахъал ранганарсили чебиули саби. Марлира, илдани дарибти жагати ваяхI, дуцIрумлизир азир рангли вавалидяхъибти дубуртала сагначи мешули сари. Илди жагати секIултани, хIербикIути дунъя дигахъес бурсибирули саби.

Выставкаличиб наб, селрайчибра гьалаб, някъли дирбубли ня­кьишдарибти, чедир цIуба ва бу­хъутIа рангла халати вавни суратдарибси, цIяба-хIунтIена, да­райла, гIяна къап тамаша­би­зур. Някъла буреба-тIузла устадешла ВатIайзир, Кубачир халараибси риасра, илгъуна журала ня­кьиш нуни бегI гьалаб сабри чебаибси.

Кубачила хьунул адамталайзибад декIарбулхъуси, саби-бегIси устадешличил дарилри, сирхIяла хьунул адамтани, чутхъала удирти чубкира.

18-19-ибти даршдусмазиб азадси сир­хIяла жамигIятли (об­щество) лебилра сунезиб хIер­би­ру­ти халкь саби-ургаб бутIа­цугли хIер­бируси низам кабизахъурсири. Илдала ургав талхъанра лагъра левси ахIенри. Гьарил шила шантала гIядлу-зе­гъа­ли­зиб дурхIни руркъутири. Гьарил сирхIяйс, сунечила вайси хабар калахъесичибра, веб­кIес гьалабли чебиусири. СирхIяла диштIати ма­хьурби, цаличирад ца, ахъли вявъибхIели ба­кьесли, мерладиубти сари. Къияндикиб­си­лис кумекбарес сирхIянти мурталра хIя­дурли бирар, рахли къияндикалли унрубани кумекбирниличи, мурталра бирхути сирхIянти, урехиагарли, бирхаудиличил хIербирули саби. Илдала яхIра ламусра дунъяла умцантачир мургьила гилавкаличил умцути сари.

СирхIяла хьунул адамтани чIянкIила бутIназирад дарибти суратуначи хIери­кIухIели иргъули саби илдала пикрумала азаддеш, пагьмула гьарза-халадеш, чус дигути хIялани чедаахъес урехиагардеш, халкьла пагьмула дазуагарси бягIудеш.

Выставка чебаили гIергъи хIеръира, чи саял Нидерландиялизивадси Пит Мондриан.

Марлира, нушала хала нешани, дунъялизиб машгьурбиубти художникунас гIиб­ратли биэсти, художникуни биъниличи рирхаурра.

Выставкаличиб гIур чинабалра агарси жагадеш гьалабихьилри.

Муъминат Хаттаева