Саби нуша-ургаб мицIирли агара биалра, чула гьунартачила адамтани даим гьанбиркахъути дубурланти лебти саби. ХIера, илдазивад ца сай иш дила макьалала игитра.
ГIябдуллаев Ацци Тахсурманович октябрьла 20-личив 1907-ибил дуслизив Дахадаевла районна Уркухъла шилизибси хъубзарла хъалибарглизив акIубси сай. Ил 10 дус виубхIели, цIуръавиуб. Шила школализир 5 класс делчIи, 1930 ибил дуслизив МяхIячкъалализибси Дагъиста индустриальный техникумлизи керхур.
ГIярмиялизивад шилизи чарухъун ва райфинотделлизив узиб. ГIур илавадли 1937 ибил дусла август базличив партияла райкомли следовательла хIянчиличи катур. Ва камси заманалис районна прокурорли узиб. Ульяновскла областьлизибси комиссарти хIядурбируси курсани хьараахъурхIели, политчастьли ЧебяхIси ВатIа дергъла бутIакьянчи ил гIярмияла генерал — Ватутин Николай Фёдоровичли бузахъуси Украинала I-ибил фронтла, гьавала 3-эсил десантла 3-ибил полкла парторгли катур. Чедиб гьанбушибси дивизия, сунезира хIябал полк лерти, акIахъубсири гьавала десантла корпусла 8-ибил базаличиб. Ил дивизияла кьукьяличил Ацци Тахсурмановичли 1943-1944-ибти дусмазир дурадеркIибти Пятихатскла, Знаменскла ва Корсунь — Шевченковскла дявилати далдуцуназир бутIакьяндеш дариб. Ил багьандан А.Т.ГIябдуллаев Гъабзадешла медальличил шабагъатлаварибсири.
Ацци Тахсурмановичли Украина, Румыния, Венгрия, ва Австрия акьудалтахънилизир бутIакьяндеш дарибтири. Дергъла замана ил хIяйна вяхъибсири.
Ацци ГIябдуллаев ЧебяхIси ВатIа дергъла I-ибил ва 2-ибил даражала, «ХIунтIена Зубарила» ордентачил, «Вена азадбалтахъни багьандан» ва «1941-1945-ибти ЧебяхIси ВатIа дергълизиб Германияличибад чедибдеш сархни багьандан» медальтачил шабагъатлаварибси сай.
Ил дергъ таманбиубли гIергъи, шилизи чарухъун. 1962 ибил дусличивад вехIихьили, 1984 ибил дусличи бикайчи Ацци Тахсурманович Дагъиста финансунала шайчибси Министерстволис бекIдеш дирули калун. Сунечи хъарси чебетаахъили таманбирни багьандан, илини бахъла хIурмат сархиб.
1997 ибил дусла майла 2-личив ил хапли гIямрулизивад шалгIевухъунсири. Гьар дус Ацци Тахсурмановичла хIурматлис шилизир волейболла абзани дурадуркIули дирар. Илкьяйдали Дагъиста БекIла ХIукму хIясибли, МяхIячкъалализиб ил хIерируси юртла бяхIлизи хIурматла уркьули баршибсири.
Ну МяхIячкъала шагьаркад къунзикIули, Къоркъмасла уличилси кьакьализи ваибхIели, Ацци Тахсурмановичла сурат лебси хIурматла уркьуйчи хIерикIули вирус.
МяхIяммадшапи Матаев
