Сергокъалала районна ГIяялизимахьила урга даражала школала 11 ибил классла учIан ГIябдуллагь БяхIяммадовли лебил Россияла «Багьес. Дигахъес. Пахрубирес!» бикIуси проектлизиб чедибдеш сархиб.
Ил проект гIям­ру­лизиб ду­ра­буркIуси саби «Ар­хIя­бачибра ха­ласи» ибси федераль­ный прог­раммала дазурбазиб. Илала мурад — жа­­гьилтас (14 дус­­личибад бехI­би­­хьили) ва хъа­либаргла командабас улка – тарих, культура, гIя­датуни мурхьли дяркъяхъес имканти гьаладирхьули сари. БутIакьян­чибани декIар-декIарти хъарбаркьуни тамандирути сари, ахирличир биалли, туризмалашалти архIяби алкIахъути сари. Лебтанилра барх «Россияла халкьла карта» хIядурбиру – мерани, тарихуни ва гьаргбаркьуни цаладяхъили. Илизиб чедибдеш сархибтани улкакад багьудлуми чедирцIахъути архIяби дурадеркIахъес сертификатуни кайсу.
ГIябдуллагь БяхIяммадовли чумал бутIа ахъили, бегIлара гIяхIти бутIакьянчибала лугIилизи керхур. Илгъуна сархибдешличил нушанира ил уркIи-уркIилавад мубараквирехIе. Край руркънила шайчибси иштяхIли ва школала сиптабани лебил Россияла даражала гIяхIти хIясилтачи секьяйдали ахъурцусил чебиахъуси мисал саби ил.