Тукейзи рухIнарухъи дир­цути масаначи, апте­ка­ли­зирти дар­мун­тачи, теле­визорла пере­да­ча­бачи хIеррикIули пикрибарира, Уз­­­бекистайзир дарибти юр­гъанти, гIянулби, дя­хIуш­канти, цар­­хIилти хъа ваяхI нушала тукен­та­зир да­хъал лерли диъни, ап­те­ка­базир гIяхIцад дармунти лер Та­тар­с­тайзир дуракаибти. Лебил Та­тарста халкь абикьесцад гьунар леб «Камаз» машинаби ду­ра­кайули илаб бузуси заводла. ЦархIилти эко­но­ми­кала кья­­лубазибра Татарстан ду­нъяла гьа­ладяхI ар­дя­кьунти улкначил абз­би­кесли гьалабяхI арбякьи саби.
Нушачиб, Дагъистайзиб биалли, ишра или буреси бузуси завод яра фабрика агара. Дагъистан Республикала экономикала шайчирти баянтазибра нушачир шила хозяйство, тIутIи, хъумала духълуми, цIедеш дашахъни гьа­ладяхI ардякьи сари или бурили са­би.
Нушачиб бузутас лугуси алапара, пен­сияра, лебилра ул­каличил цуг­ду­циб­хIели, бегIлара камтала даражаличир сари.
ЦархIил шайчибад пикрибаралли, гьаннала замана Дагъиста халкь, гьанналауб гьачамалра хIебиубливан эркинни хIер­бирули саби. Чула яшавлизирти шуртI­ра­чи халкьла ахъти тIалабуни лер, халаси къиян кабихьили, бамсриахъни се сабил хIебалули тIашдатурти, саби-бегIти юртани шинничил, хутIличил, газличил, къу­лайти гьундурачил гIердуцили дигули саби халкьлис.
Илди къулайдешуни гIер­дур­цути шагьарла кабизуни халкьла тIа­лабуначи далдикили дузес хIеди­ру­ли диъниличилара ишаб бурес че­биркур.
Аги илкьяйда биуб­­хIе­ли, сели­зиб са­би гьа­тIи Да­гъиста эр­­киндеш ва баракат?
Нуни пикрибариливан, ил хьунул адамла акьудеш хIебалути, хIедумсути някъбазиб саби.
Гьари пикрибарая, секьяйда бузулил Дагъиста хьунул адамти ва республикала экономикализи илдани сегъуна пай кабирхьулил.
Хьунул адамти бузули саби арадеш бихI­нилизиб, багьуди бедлугнилизиб, адамтас къуллукъуни дирнилизиб, ва­чар-ча­кар­лизиб, нуша дузуси «Этно­ме­ди­ахол­динг­ли­зиб» бузути хьунул адамти бахъал саби, му­­рул адамтачибра. Илкьяйда саби гьарил эко­номикала кья­лилизиб.
Илала дурабадра, илдани чула хъалибаргунази хьурабируси баракатлизиб саби, Дагъистан саби лебсиван эркинни хIер­бирнила дигIяндеш.
Нушала хьунул адамтани дирути берклумала бизидешличила, гIергъити дусмазиб нушачи башути бахъал туристунала ур­габ хабардерхурли сари. Илдани дарибти чуду-хинкIани, (ккурцани), дахъал жураба­ла, дарес гьамадти, деркес бизити хурегунани, жагаси Дагъиста тIабигIятличил къяйли, дурала туристуни нушачи имцIали битIикIули саби.
Нушала тукентазир дайхъала хIя­дур­дарибти (полуфабрикаты), химия барх­хIеибти, умути хурегуни сецад-дигара даргес вирули сай. Илдала дурарадра, тукентазир, базуртачир хIед дигуси журала, дигусигъуна кьадарлизир мурабба, компотуни, зукьити консерваби, дахъал журала пIялцIикIуни лер. Лер сецад-дигара дубурла дармандирути, дерахъубти кьар. Сецад лера гьар-чинаралра дирцули, халатас ва дурхIнас, хьунул адамтани демхурти динди, мячайти. Сецад ибули хьунул адамтани палтар, саби-бегIси устадешличил, лерилра илдира, дахъал цархIилтира хьунул адамтала устадешличилти някъбани дарибти сари.
Илдани хъумала духълуми, цIедеш дашахъули сари, хIяй­ван-къача, гIяргIя-дагъа адилкьули сари. Лерилра къиян кабихьили сархибти берк-берж диэс гIягIниси тяхIярли пай­даладирули сари.
Хъали-цIа ибгес, хъулиб умудеш барес, мурул адамли тIа­лаббарибси бе­кIахъ баракатличил харжбарес нушала хьунул адамти бажардибиркули саби. ДурхIнас духуси бяркъ бедесра илдани балули саби.
Чула бузерилизиб илгъуна кьиматличи имцIали лайикьбиркули саби дарган хьунул адамти. Ил багьандан ахIену, даргала чуду, даргала хIева, даргала мекъ, даргала гIя­хIял­деш, даргала сабур Дагъистайзир гIибратлати сарливан ду­риб­ти.
Заводуни, фабрикаби нушачир хIеду­зу­ли диалра, лугуси алапа, пенсия халати хIедиалра, хьунул адамтала гьарил шайчиб устадеш лебти някъбани Дагъистайзи баракат кабирхьули саби.
Баркалла рикIулра, чула къайгъиличил Дагъистан эркинбирути, дузес хIедумсути хьунул адамтала някъбас.

Муъминат Хаттаева