ГIергъити бурхI­на­зир нуни ца суай­чи пикри бяхI­­чиаира: Дагъиста хьунул адамти ва ил­дала гIямру.
Гьалабла замана хьунул адамтала къиянти гIямру сарри. Мурул дурала мер-мусаличив узусири, ил багьандан хьунул адамтас хъулирти лерилра хIянчи чучи чекасес чевкъусири, дурхIни лебли биалри, илдира абилкьутири. Хъулир дирути хIянчила дурарад, аргъ-бархIила шуртIри гIяхIдиубхIели, хьунул адамти хъумачибра бузутири. Илдани чула лерилра цIакьанира къайгънира хъалибарг абикьес, дурхIнас бяркъ бедес, илдази гаши-дягIи хIедагьахъес дяхIчиаибти дири. Илдала чучи хIерэсра сеналра замана хIебири.
Гьанна хьунул адамтани багьудлумира касили, гьамадти хIянчурбачиб бузули саби. ИтхIели, жяв замана биалли, илди багьуди касахъесра балтути ахIенри. Школа таманаили гIергъи, бусягIятал шери бедлугутири. Дахъалгъунти анцI­бу­кьуназиб рурсилис хIейгуси мурул адамлис, гуж-зулмуличил шери редлугусири, халаси давла лебни хIисаблизи касили. Бахъалгъунти рурсбази хьаралра биуси ахIенри гIямрула вархкья бегIтани чеввиркIухIели.
БусягIятла замана хьунул адамтас хIербирес ва бузес къияндешуни агара. Школа таманаили, университетлизи каберхурли, белчIуди даимбарести шуртIри лер. Багьудлумачил бегIбиубхIели, чула санигIят хIясибли бузес имканбикIули саби. Хъали-цIа дуцахъесра, илдази хьарбаили, ихтияр сасили, чус дигуси адамлис шери бедлугули саби.
Хъулирти хIянчи диресра бусягIятла замана гьамадли саби. Хьунул адамлис кумеклидирути дахъал гIягIниахълуми (техника) лер гьанна дураили: хясасупI (пылесос), палтар ицуси (стиральная) машина, духовка ва цархIилти. Ил багьандан бекIахъудила къуллукъунира гIягI­ниси тяхIярли гьунчидиркахънилизир гIяхIцад кунк­де­шуни акIуб. ИшхIелла замана хьунул адамтас хIер­биэс дебали гьамадли са­би.