Февральла 21-личиб Дагъиста пачалихъла университетла филологияла факультетлизиб лебилра халкьани-ургабси нешла мезла БархIилис хасбарибси, мажлис бетерхур. Филологияла факультетлизиб ил гӀяхӀси гӀядатла бетаурли саби, сенахӀенну ишдусцун ахӀен ил дурабуркIусира. Дагъиста мезанала кафедрали акӀахъубси саби ил байрамла балбуц, сабира дусличи-дус жагали ва разили бетурхуси.

Мажлис бехӀбихьиб 14 студентли. Илдани 14 мезличил назмурти делчӀун, ил лугIилизиб – дарган мезличилра. Назмурти тамандиубхӀели, бусягӀятал макьамтала агурби зайдухъун ва студентунани жагати делхъ дариб. Лебилра дунъяличиб машгьурси «лезгинка» ансамбльла пагьмуртани балбуцла гIяхIли разибариб.
КIинайс нешла мезла БархӀи секьяйдали акIубсил къантI-къантIти баянти гьаладихьиб. 1999 ибил дуслизиб ЮНЕСКО-ла бекӀлибиубси конференцияличиб пикрибарибсири илгъуна байрам кабизахъес. Ил байрам дурабуркIуси саби 2000-ибил дусла февральличибад бехӀбихьили.
Балбуц абхьиб ДГУ-ла филологияла факультетла декан Шабан ГIябдулкадырович Мазанаевли. Илини баркалла багьахъур балбуцлизир бутӀакьяндеш дирути студентунас, ва байрамла мягӀничебдешличила буриб.
Илкьяйдали мекелли жагати пикруми дуриб ДГУ-ла филологияла фаакультетла Дагъиста мезанала кафедралис бекӀдешдируси Муса БяхIяммадовлира.
Илала дурабад, мажлисличи бакӀилри ДГУ-ла проректорти МяхӀяммад ХIясанов ва Мадина МяхIяммадова, Дагъиста писательтала Союзла председатель, Дагъиста халкьла писатель МяхӀяммад ГIяхIмадов, табасарантала «Дагъиста хьунул адам» бикӀуси журналла редактор Сувайнат Кюребекова.
Илкьяйда, разили, шадлихъла аги-хIяйзиб бетерхур дебали мягӀничебси нешла мезлис хасбарибси байрам.