Ахътицад дубуртазиб
Гьава умуси бирар,
Гьава умуси мерлаб
Гъубзни хIялалти бирар.
Бамкьурси аргълизир заклизирти гъагулти зумадикIутигъунтири, ва берхIила нурани илди-ургарадли ванзаличи мургьила забван чейгулри. Илдани ванзаличирти вава-кьар пишдирхъяхъутиван билзулри. СенахIенну берхIиливан ванза ва иларти лигIматуни булхIедирахъу. БегIлара наб тамашабилзуси, илди нурани ЧевяхIсини зурбаси линейкала кумекличил варакьдарибтигъунтири. Бахълизивадли декIарулхъуси пасихIси адамван. ГIе, пасихIти адамти, марлира, тяп бац-берхIиван хIербикIули бирар алавси дунъяличи, адамтачи, гIямруличи…
Дила хIулбала гьала имцIаливан илди нуранани ца адамла сипат гьалабилзахъули бирар. Ил нуни жявлил валуси сай ва иличил рарх рузесра игъбарбиуб. Ил шалати дяхI-сипатличилси, кагибти баркь-бацличилси, хIялалти хIяланачилси, адаб-хIяяличилси, уркIи нурли бицIибси дарган сай. ГьатIира бархьаначи буралли, Даргазивцунра ахIи, Дагъистайзивра хабардерхурси журналист, пасихIси ва бахъли хIурматбируси дубурлан сай. Илини республикализир хабардерхурси гIяхIгъабзала ахъушан сунела дудешла марси юлдаш Запирла у бихухIели ургар ил илгъуна багьадур ветаурсира. Илдигъунти журналистунанигу ишцадра бархибси манзиллизиб адамтачи тяп берхIилагъунти ванати нурличил челябкьлаличи умутунала ва ишбархIила гIямруличи иштяхI алкIахъути пикруми гьаладирхьути, адамлизи бархьси гьуни чеббиркIахъути ва гIяхIтицун баркьудлуми дурадуркIахъес кумекли детарути макьалаби лукIути. Илкьяйдали илдигъунти лукIанти адамтас гьававан хIяжаттира саби. Илди Запиргъунти гьарли-марти биаллицун.
Республикала газетаби-журналтала бяхIяназив балкIдешличи къаршили ургъуси, рушбатчи-хIякимти балтIуси, бузерила гьабкьяби къугъаси девличил закличи ахъбирахъуси ва гьар бархIила гIямру дяхIимцIайзирван чедаахъес пагьму лебси журналист Запир Харбиловла у балбикили, баршибси чугурличиб жагали зайбикIуси гиван, дубурлантала уркIбазиб зайбикIуси саби. Ил, мискин адам гIевурцули, гьарил сагаси ибсиличил бучIанти тянишбирули ва игитти баркьудлумачила къугъати макьалаби гьаладирхьули, чеалкIуси наслулис патриот бяркъ лугуси лукIан сайхIели. Илдигъунти журналистунани кабихьибси гьуникад ахIенрив нушара муртрил дашес бурсидиубти.
Нуни Запир Харбиловличила белкI бирухIели гьалабра гьанбушили риэс асубирар, амма иш гьакIлисра иличила хIебурес хIерирус. БегI гьалав нуни Запир МяхIяммадович Дахадаевла районна Уркухъла шилизиб районна руководстволи ва дахъал шимала вакилтани бутIакьяндеш дарибси балбуцличив чеибсири. Мурталра тикрардирути цадехI гъайра дурули гъайбулхъулри лебилра. Запир Харбиловличи ярга баибхIели, ил къалабахIейкIули микрофонничи гъамиуб. Илис гьалар нуни районна ва республикала хIякимтала хатIабачила ва хIяжатагардешличил адамтачи хIербикIниличила гьачамалра ца гъаялра аргъибси ахIенри. Амма Запир Харбиловли, чизивадалра ва селизивадалра уруххIейубли, илди балтIулри ва илдала дархьагардешуначила бурулри. Лебилра заллизибти илис хъатбикIулри ва чули уркIи-уркIилавад гIевурцни иргъахъулри. ИлхIели наб якьинбиуб журналистла санигIят чебяхIси ва хIурматла биъни, чIумали кьасбарира ил санигIят чеббикIес. ГIе, итхIели бархьдешра кабизахъес вирусири ва гIяйибла вегI сеннира танбихIлахIеварили валтуси ахIенри.
Илала гIергъи Запир Харбиловла макьалаби нуни халаси иштяхIличил дучIира, илцадра гIямру ункъли дяркъурси ва илди сипатдарес бугаси пагьму лебси, гьарил вайсилисра гIяхIсилисра бархьси кьимат бедес балуси илала бучIанти-ургаб халаси хIурмат лебнира аргъибсири. ИтхIели, ил чиди-биалра районнизи яра шилизи лявкьниличила багьаллири, адамтани обкомла секретарь лявкьухIеливан балкIси гьунчи кабизурти урухбирутири ва бархьдеш дигути чучи малаик хьуравирусиван хIулбуркIутири.
Ну районна газетализир рузухIели, мурталра макьалаби дихули рашусири республикала газетализи. Редакцияла бекI редактор ГъазимяхIяммад Юсупов, отделла редактор Запир Харбилов ва цархIилти хIянчизарти чебаэс хьулрикIусири, илдани дурути, риштIахIели учительтани дурутиван, дигиличил кьабулдирутири. Илдала уктемдеш агнили, адамтачил къугъали ихтилатбикIес балнили, гъайла устадешли тамашарирахъусири. ГIергъити дусмазир илдачил рузес кьадарбиъниличира разили рираси.
Нуни белкIунси гьарил макьала гьала-гьала Запир МяхIяммадовичлизи чебиахъусири. Илини сегъуна кьимат кабалтал, имтихIяйчив студентван, хIерли рираси. Илини сен-биалра бикIуливан, адам чеввикахъес се-биалра буруси ахIенри. Илини гьарил хатIаличила ва гьарбизурси белкIличила сунела пикри бурусири, гIур хатIа хIебарахъести гIякьлуми дурутири. Илкьяйдали ил наб, ну гьар шайчирадли гIеррурцуси хIянчизарцунра ахIи, дулекIла узиванра гъамсили ветаур. Дила узби-рузби ва дудеш гьарахъси ДугIахъарла шилизибрину, иличи дила зугIлумачила, челукьутачила бурули, дугьарилзусири. ИлхIелира илини ну уркIичеррирусири ва сунела риштIаси рузизиван къугъали се барес хIяжатлил гIеббурусири. ХIера, илкьяйдали наб бузерилизив ва гIямрулизив умутчевси къакъбяхъли ветаур. Набцунрив, гьатIи? Лебил редакцияла агьлура илини сунела дигуси кулпетван мяхIкамбирутири ва чизилра вайли хIеръахъесра валтуси ахIенри. Нуша илис «мицIирси энциклопедия» дикIутира, сенахIенну илини сегъуна-дигара темала чебкад ва хIянчиличи къячбилкуси суайс итмаданал жаваб лугулри. Илкьяйдали ил нушала гьарли-марси гIямрула ва санигIятласи мугIяллим ва къакъбяхъ ветаур.
Запир МяхIяммадович акIубси сай Дахадаевла районна Кьункьила шилизив. Илала дудеш Харбил МяхIяммадов колхозла ва кIинайс Кьункьила шила Советла исполкомла председательли итхIели узули калунси КПСС-ла член сайри, Запир урегал баз виубхIели, гIярмиялизиб къуллукъбарахъес 1940 ибил дуслизив арукибсири. Илала узи Байрам биалли 1938 ибил дуслизив сайри ВатIайс къуллукъбарахъес живарибсири.
Дудеш гьаниркули ахIен Запирлис. Неш Диви Харбилова ГIяштила участковая больницализир дахъал дусмазир санитаркали рузули калунсири. Илини, дудешла агри хIебагьахъурли, къяна-шилтахъ агарли, хIериахъес бурсиварибсири ва къияндикибсилис кумекбирес, азгъиндеш дакIухIедирусили халаваахъибсири Запир.
Запирли мурталра гьанбуршули бирар секьяйда нешли сай учIахъес ва цархIилти зилантазивадли селизивадалра гIелахIелхъусили ветаахъес къайгъни дакIудирутирил. Гьачамра сегъуна-сабил жуз агарли буили саби уршила ва ил булегила гьарахъси шилизи жуз кабухес рякьунси сари дубурла ахъти шурмала ва мурхьти къадубала гьундурачирадли дуги-хIери рашули. УркIила ванати дугьбачил гьанбурши Запирли сунела бегIти. Дургъбазивад дудеш лявкьниличи халаси манзиллизив хIерли кали, нешли сунела цIакьанира гIямрура ахIерахIедарили, сунес лерилра гIямрулизиб къуллукъбарниличила дахъал хабурти дури. Илала дудешла кагъурти дархли дири дургъбазирадли дархьибти. ХIера, илдазирадли кам-камти баянти учIаннисра гьаладирхьехIе.
1941 ибил дусла декабрьла 28-личиб Харбилли Байрамличи лукIули сай: «АхIерси узи, Байрам, дуцIарти саламтала гIергъи наб дигулра хIела арадеш биубли, фашистунас чIумаси бяхъ чегахъили…». Харбил Крымлизив ургъухIели, кьяшлизивад вяхъибсири ва Краснодарла госпитальлизив 45 бархIи калунсири. Илини узичи лукIули сай кагъар: «Дяхъи сагъбиубли саби. Тяп унцван аравиублира. Советский ВатIан батахъес, советский халкь берцахъес, Германияла фашистунас чIумаси бяхъ чегахъес гIурра дергълизи аркьулра. Фашистунира дарбадягъинбарили, хъули разили чардулхъехIе ва муккаттала бужули кадирехIе.
АхIерси узи Байрам, хIела кагъар агархIели кьакьавикIулра. КъаршидиркехIе. ХIела балуй някъ цIацIабирулра.
ХIела узи Харбил МяхIяммадов, 1942 ибил дусла мартла 28».
ГIурра узичи кагъар: «АхIерси узи, Байрам! Цалис ца дигути узби чехIедаили калишара? ЧехIедаили кали хьалли, пикри аги, хIу ара-сагъли хъули чарухъадри. ХIед чейгуси хIярхIя наб чегаб, узи. Дила кьаркьала кепеклизилра хIебирис. Лерилра таманра дирар, черра аркьян, хIу хъули чарухъадли. Душман тIутIукьякьяварили нура чарулхъас. Цаладиркниличи вирхулра. Къугъали хъули чарухъаби, узи».
Харбил МяхIяммадов гIурра вяхъиб. Ил яргалис Сочила госпитальлизи каркьиб. Илабад хьуна рузи СяхIибличи бархьибси кагъарлизибад: «ХIябал дус дургъбазив душмантачи къаршили, уркIецIиагарли ургъес бурсикайублира. Дяхъира арабиубли саби. ХIушала кагъар бакIайчи ну ишав кахIевлас. Дергълизи укьес кьас саби.
ДелкIести дахъал сари. ХIелукIас. Вари, хъуммартабая. Гьаниркахъабая. Шилизивадли дуравхъи, хIябал дусла бухIнаб СССР-ла улка ласбарира. ГIяхIтира вайтира чедаира, дигуси узи Байрам варгес хIейубра.
Рузи, СяхIиб, кагъар таманбирулра. Дила Запир ункъли хIерварая. Душманра тIутIуварили, камси заманала ухIнав нура хъулив вирус. ГIур халаси тавра бицIесцад хIушаб хабуртира дурис».
1943 ибил дусла майличив сержант Харбил гIурра вяхъибсири. ИлхIели МяхIячкъалала госпитальлизи ваахъибсири. Илавра шиличила, шантачила, гъамтачила хабурти аргъес хIясратлири. Хьуна рузи ПатIимат Рабадановачи лукIули сай илини: «Дагъиста центр МяхIячкъалализирад дахъал саламти дурхьулра. ПатIимат хIечи, ада-абачи, лебилра рузбачи, рузбала кулпетуначи. Дила мурад – лерилра хIуша ара-сагъли диъни саби. Нура бецIванра, МяхIячкъалала госпитальлизиб бамсриихъулра. Вайси селра агара. ХIушала аги сен сабил багьес дигулра. Рабадан, Казим хъулиб лебалу? ШяхIба, Байрамла кагъурти дашулив? Илдала адресуни дархьая. ХIуша чедаэс дигахъира…».
Дургъби тамандиубли, чедибдешличил Байрам хъули чарухъун, Харбил чархIевхъун… Запир халакаиб ва дудешван ВатIайчи дигили вицIибси, нешван гъабзадешчевси ветаур.
ГIяштила урга даражала школализиб 1956 ибил дуслизиб багьуди касибси гIулухъа, Каспийсклизибси цаибил ТУ-лизи учIес керхур. ВатIайс къуллукъбарили гIергъи, ИцIарила шилизив урус мезла ва литературала, историяла учительли узули калун. Таманбариб Запир Харбиловли 1969 ибил дуслизиб Дагъиста пачалихъла педагогический институтра.
1966 ибил дуслизив Запир МяхIяммадович «Ленинна байрахъ» газетализив литработникли узес вехIихьибсири. ИлхIейчирадли чумра чедетаили ва къугъали илини делкIунти макьалабани газетала бяхIяни жагадариб. Чуйнара дубурла гьарахъти шимази командировкабачи вякьи, адамтала изу-зугIяйчила аргъбаибти макьалаби делкIун илини, халкьла лебдешличи хъямбашути, чула къуллукъуни пайдаладарили, зяхIматчиби биргIябиргути хIякимти пужбариб ва къияндикибтас кумекдиэсти тяхIурти далдуцахъиб. Журналистунани кьяйда бархьдеш кабизахъес ва бахълис кумекбарес гьарилли хIерни якьинбариб.
Чуйнара жагьилти журналистунала, студентунала, школьникунала ва цархIилти адамтала гьалавра гъайулхъули чеибсири ил нуни. Илини буруси гьарил дев лехIирхъутала уркIбази дегъси ванзализи ряхIмула маркаван минадирули диънира багьеслири. Хаслира чеалкIуси наслулис гIямрулизир багаладиэсти баянти гьаладирхьулри.
Сунела гIямрула марси гьалмагъ ва исбагьи Дирвайчил Запирли къугъати дурхIни абикьур, гIямрула бягIуси гьунчи дураиб. Рурсби — Зайнаб ва нешла у бихуси Диви. Уршбас Харбил ва Заирхан бикIар. Лебтазилра чебяхIси даражала багьуди касахъиб ва гIяхIти хIянчурбачиб хIурматличил бузули саби. Леб Запирла ва Дирва уркIби шаддирахъути дурхIнала дурхIнира.
Запир МяхIяммадовичла бамсриагарси бузери ахъли кьиматлабариб улкалира. Илис ДАССР-лара Россияла Федерациялара культурала урибси хIянчизарла уми дедиб. Лер дахъал грамотаби ва шабагъатуни, амма Запир Харбиловли бегIлара гIяхIси шабагъатлизи халбирули сай сунени адамти-ургаб сархибси хIурмат ва уркIи-уркIиларадти диги. Гьайгьай, лукIуси адамлис халкь-ургаб хIурмат сархес гьамадси ахIен. Илала белкIаназирти хатIабачила имцIали адамти гъайбикIули бирар, гIяхIти шалубачила ахIи. Амма Запир МяхIяммадовичгъунти лукIанти бахъал-декIар хIебирар. Чула гьарил баркь-бацличи ва лукIуси гьарил девличи чекабизурти, хIялай гIямру дуркIули, алавтас гIибратли бетаурти.
Ишдусла ноябрьла 7-личив Запир Харбилов 80 дус вируси сай. ГIямрули гьаладихьибти къияндешуначи хIерхIеили, адамтачи дигили вицIибси ил гIяхIгъабзас, юбилейличил бархбасахъи, арати ва талихIчерти гIямру, кулпетла игъбар ва дурхIнала дурхIнас даршуси зак дулгехIе.
ХIурматла узи Запир, хIу редакцияла къакъбяхъ вирусири мурталра, хIела гIяхIти баркьудлуми лебилра хIянчизартас гIибратли детаур. Гьаннала гIергъира хIу, хIела къугъати дурхIначи ва илдала баркьибтачи хIилнаиркьули, дахъал дусмазив, изала-зугIяла чехIедаили, хIериубли дигулра.
