Кьиблала шай­чиб­­си Кав­каз­ла хIурхъала кам­­си бу­тIа нушала районна да­­­хъал­гъунти шимала халкьлис гIяхI­­цад дусмазиб уху­си­ли кавлули саби. Хъя­ша­хIелла замана, 110 дусла гIям­ру­ли­чив­си хала дудешлизи даим дя­­хIили дуцибти илда­чи­ла хьар­­хъа­ру­хъун­сири.

— Урши, хIисабдирулрив икI­­ди дубуртала бурги? Илди се са­бабли ухутил баладу? Бу­рисра, илдазир нушала ха­ла бегIтани даим бузерила гьундурачибра, улкалис ва шантас мардешлизибра де­кIар­­булхъутала сипатуни чеди­у­тири. Ил багьандан, урши, бел­чIудила ва баркьудила гьун­­дурачивхIели, иличила хъум­мартидра…
ГIергъити шел-урегал дус ил­дала бурги дя­хIиличил мис­кин­­диубхIели, хала дудешла гIякьлу хъумкарта­хъур­си­ван билзан. Амма ишдусла дуцI­румлизир дурхIяхIелла дус­мазирван хIурхъала бурги цIу­ба лямцIличил ухули хIи­саб­да­­рибхIели, марлирагу, пикрума­зив хатIаиркули ургус или гьанбикиб. Дила ил пикри бузерила бархIила сягIятуназиб марра биуб.ХIянчила вакIили, ка­бинетлизи ацIиб­мад, вяхI­чи­ли кайили узуси дявила ва бузерила ветерантала Совет­ла председатель Мухтар ГIяб­дуллабековра мякьлабси кабинетлизив шимала бургала хIян­чи къелгIеббикнилизив узу­си Зайпуллагь Ибрагьимов­ра, дяхIличиб разидешличилра, чичи сабил пахруличил, «Чарх-бекI арали калаб, нушала чемпионти!» ибти тIама-гьа­ма­личил наб гьунибаибти.
— Се биубли? Чи са­би чемпионти бетаурти? – суа­лу­­хъунра.
– Марлира, гIергъиси за­ма­нализив хIу­ни секIал хIе­ба­лулри. Нушала узбили бе­­та­урти Кьурба МяхIям­ма­ди­ми­нна урши ХIя­бибра ХIяса Мух­тарра республикала тах шагьарлизибад чемпионти бетаурли чарбухъи саби. Агь, чус хIя­лалдиарти! – гIурра бикIар кIелра…
Марлирагу, гIебшни дехI­ди­хьибти бурхIнала цализир Мя­хIяч­къалализир Исинбаевала уличилси стадионни­чир­ Ре­с­публи­кала БекI В.Васильевла савгъат багьанданти гьести гIямрули­чибтала спортсменти-ургар кункси ат­летикала азбани детерхур. Илар бутIакьяндеш дариб нушала районнизибад­ти ХIябиб Кьур­­ба­новлира Мух­тар ХIя­са­новлира. Даширая, ил­дачила къантI-къантIли бурехIе.
ГIядатла хъалибарглизив акIубси сай Мухтар. Виш­тIа­хIей­­­чи­вад ил зилантачил му­шул­вашнилизивра, дуцIли­зив­ра, къаркъа иргьнилизивра гьалав чейули вири. Школала гIямрула дусмазивра спортличи диги имцIали лерси сайливан бахъли хIисабири. Бел­чIу­дилизивра гIелахIелхъи.
Школализив учIухIелил, чебяхIси даражала багьуди касес кьасбарибсири илини. Ат­тес­тат касибмад, Смоленскли­зиб­си физкультурала институт­лизи керхур. Вузла спортменти-ур­гар дура­дур­кIути абзаназив гьа­лаирки. ЧебяхIси даражала багьуди касибмад, дубурлан урши акIубси шилизив, гIур Ростовла областьла Ре­мон­т­ненский районнизив физ­куль­ту­рала мугIяллимли узусири. ГIур Мухтар, гIям­ру­ла ралликьяна Райзанатличил, акIубси шилизи чарухъун. Ит­ма­дан урибси спортсмен тренерли узес вехIихьиб. Гъал дус­ла бухIнаб илини районна ши­мазибадти чумилра гIулухъа рай­оннизиб, республикализиб ва улкализиб чемпион­тили бета­ахъур­. БусягIят багьадур Мух­тар, ка­ратэ дигутала секцияби ду­захъули, бехIбихьудла классунала бу­чIанти-ургав вирар.
Сунела гIямрула лерилра шалуби спортличил дархдаса­хъун­си Мухтарла узигъуна ур­тахъ сай ХIябиб Кьурбанов, рай­онна «Цаси партия­ла» жа­вабла секретарь. Илди спорт­лизибра, гIямрула ва бу­зерила гьундурачибра ца дукIла унциван бирар. Иш мер­­личиб ХIябибличила къантI­ли. Уркухъла шила ца гIям­­­зилаб, мурхьси къадалаб, су­нес Къубаццила шинкьа иру­си мер­личиб ца-кIел адам базесигъуна шара леб. Шилис хIябал километрлара-сера гьарахъси ила, шала пIякь­диркути сягIятуназив, яни-дуцI­рум хIеи­ли, дуцIли аркьуси адам Сир­хIязи автомашинабачил башутани ва илабад архIяли дурабухъунтани хIисабиру. ГIе, гIе, вазес вашуси ХIябиб сай ил. «Янилизив миъба бицIибси ил шарализив визуси хIу зягIип­хIер­куду?» – суалухъунра.
– ДуцIикIуси адам вир­гIу­си ахIен. ДяргIибти шиннизив визуси нуни гIемч-хъехIличила бакьибси ахIен. ХIерхулрив, ваши ца бархIилизив набчил хIура, – пиширхъули иру илини.
– Бални хIясибли, хIу гьанна урегцIали дус вирулри. Чум дус илкьяйда визулрив? – хьар­баира.
– ГIулухъали вирути дусмачивадал, — диур хIуни хьардиути или, ХIябиб, пиширхъули, набчивад гьарахъикиб.
Мухтарличил республикализир дура­дур­кIути абзаначи укьес хIядурикIули уилри ХIябиб, нуни илди суалти лугу­ти бурхI­нала цализив. Кабинетлизивад ил ду­рав­хъунхIели, чиди­лли­рил иб: «Ириъра рес­публикализир дурадуркIути гьес­ти гIям­­рула адамти-ургарти абзаначибра цаибил мер сар­хиб­сири илини. Ишдусра гьалаиркниличи вирхулра».
ХIерая, ишди бурхI­на­­зив­ра, 1500 метрличи ду­цIу­хъи, ХIя­биб цаибил мер­ли­чив! Гьарахъ­деш­личи тIяхI­ба­шути-ургав Мух­тар­ли­­чил цугикеси хIейуб, ва чемпион ве­таур. Илини диск ва яд­ро иргьнилизир ва 100 метр­­личи дуцIбикIнилизир хIябъ­иб­ти мерани дуциб. Улкала де­кIар-декIарти мераначибад бакIибти 300-цад гьес­ти гIям­рула спортсменти-ургар Мух­тар­ла сархиб­де­шу­ни, гьайгьай­ра­гу, гIиб­ратли дурестира са­ри. ХIе­рая, дила дарганти, ну­ша-ургаб сегъунти багьадурти лебал. Ил багьандан диэс ви­кIулра дахадаевлантала дур­хъати ва жагати гIямрулис бикь­румиван хIурхъала бурги бу­сягIятра лямцIкадикIути. ГIе, гIе, Мухтарра ХIябибра, илди лямцI­лизир гIячихъли чедиулра хIушала кIилалра дурхъати къел-хIерзи. Дерхъабая!