Республикализиб авэсил дус Дагъиста культурала ва мезанала байрам ахъси даражаличиб бетурхули саби. ГIяхIси гIядатли бетаурли саби дикIехIелра, хатIахIедиркехIе ил байрамлис хасбарибси майдан Дагъиста пачалихъла университетла филологияла факультетлизиб дурабуркIнира.

ХIера, илкьяйда ишдусра октябрьла 22-личиб нушала факультетлизиб майдан гьаргбиуб. Балбуцла мурад биалли нешла мезаначи жагьилтала диги-иштяхI акIахъни, имцIадиахъни ва Дагъиста миллатунала культура машгьурбарни саби. Гьайгьайрагу, ил мурад сархнилизи­ мекелли халаси пай кабирхьули саби ДГУ-ла Дагъиста мезанала факультетла преподавательтанира. Ил нушаб марбирули саби нушала гьар бархIиласи белчIудила хIя­ра­кат­ли­зиб­ра.
Майдан ибхьули, цалабикибтачи дугьаизур ДГУ-ла ректор Рабаданов Мур­та­загIяли Хулаттаевич: «Гьар дус иш балбуц жагали ва шалали бетурхули саби. Дила пикрили, ил филологияла факультетла студентунала сархибдешра саби».
Ректорли лебилра байрамличил мубаракбариб ва студентуни гьаннала гIергъира багьудлумачи гъирачебтили биубли дигни аргъахъиб.
Илис гIергъи гъайухъун филологияла факультетла декан Мазанаев Шабан ГIябдулкьадирович: «Наб дигулра хIуша нушала улкаличи, миллатунала мезаначи, культураличи ва гIядатуначи дигили цадиахъубли. ИшбархIи ва жагIял хIуша специалистуни детаурхIели, нушала мезаначирти ва литератураличирти илди диги хIушани бучIантасра савгъатдирули».
Илкьяйда сунела пикруми дуриб профессор, Дагъиста мезанала кафедрала заведующий БяхIяммадов Муса Расуловичлира: «Ишдигъунти далдуцуни дура­дуркI­ни­ла мурад саби нешла мезличи, культураличи, литератураличи пикри имцIабиахъни, хаслира – жагьилтала ургаб. СенахIенну чеалкIуси наслулизи сецад ахIертил нешла мез багьахъес чебиркур».
Майдайчир пергер делхъ, далуйтицун ахIенри гьаладихьибти, илар лерри нешла мезличил дурадулхъути газетаби-журналтира: «Замана» газета, «Гьалмагъдеш», «Лачин», «Дагъиста хьунул адам» журналти.
Урус мезла ва нешла мезанала отделениела студентунас чула преподавательтала кумекличил гьарил миллатла давлачерти культура, мез, халкьла мухIлила пагьму, гIядатуни, литература ва хурегуни гьаладихьес имканбакIиб.
Балбуцла гIяхIлала ургаб лебри филологияла факультет белчIунти, чула сархибде­шу­начил машгьурбиубти специалистуни, ДР-ла гIилмула ва багьудила Министерст­во­ла вакилти, декIар-декIарти школабала му­гIяллимти ва директорти, филологияла фа­культетлизи каберхес пикри лебти школа­ба­ла бучIанти.
Байрам ахъси гьавличиб бетерхур. Ил ахирличи бикахъиб нушала дубурлантала лебилра дунъяличир машгьурдиубти делхъличил.
Умутбирхьулра ил гIяхIси гIядат гьанна­ла гIергъира даимбирниличи ва дус­ли­чи-дус бутIакьянчибала лугIи имцIа­бикI­­ни­личи. Нушаб биалли, нешла мез гIер­ду­цес, чеалкIуси наслулизир илдачи диги адикьес, гьаладяхI ардукес къайгъибарес чебиркур. Ил барес лерилра цIакьани дяхIчиаэсра хIядурлира.