Нариман МяхIяммадович ГIялиев акIубси сай 1939 ибил дусла майла 9-личив Лавашала шилизив. Ил виштIахIейчивад гIяртист ветаэс пикриикIусири. Лавашаб урга даражала школа таманаили, Нариман ГIялиев Ереванна художественно-театральный институтлизи учIес керхур. Илав, 14 дарган дурхIяличил варх 5 дус учIули, даргала цаибил студия таманаиб.
1961 ибил дусличивад вехIихьили, Нариман ГIялиев ГIямарла Батирайла уличилси даргала музыкала ва драмала театрлизив узули сай. 1965-1969-ибти дусмазиб илини Ереваннизибси художественно-театральный институтлизиб режиссёрти хIядурбируси факультетра хъараахъурсири. Илав учIухIели, Нариман ГIялиевли кIиибил даргала студиялизиб бучIутас даргала мезла дурсрира кадирхьутири.
ГIямарла Батирайла уличилси Даргала театрла гIяртист Нариман ГIялиевли 100-личирра имцIали спектакльлизир бутIакьяндеш дарибти сари. Даргантани хъумхIерту Нариман ГIялиевли дузахъути ишди удиб гьанбушибти игитунала ролани: Кассио (Шекспирла «Отелло»), Скапен (Мольерла «Скеапенна масхарала баркьудлуми»), Лабазан (Гамзатовла «Дубурлан хьунул адам»), Лука (Чеховла «Синка»), Азамат (Лермонтовла «Бэла») ва цархIилтира.
Театрла режиссёр сайливан, Нариман ГIялиевли гьаладихьибтири 60-цад спектакль, амма илхIелира сунела спектакльтала игитунала роланира дузахъутири. Илини гьаладихьибти спектакльтазирад даргантас имцIаливан гIяхIдизуртири ишдигъунти: «Дудешла хъулиб», «Дила хьуна неш» Хугаевла, «КьутIкьуси талихI» Р.БяхIяммадовла, «Вайбаркьла гье» Г.СалихIовла, «ГIяшикьти» ХI. Наврузовла ва гIяхIцад цархIилтира.
1967 ибил дуслизиб лебил Россияла театртала смотрличи гьалабихьибсири Сулайбан Рабадановла «Мерс» бикIуси спектакль. Илав бекIливиубси игит Батырла роль бузахънилис Нариман ГIялиев цаибил даражала дипломличил шабагъатлаварибсири. 1970 ибил дуслизив ил И. Байгишиевлара ХI.Наврузовлара спектакльлизив ГIялибей Багъатировла роль бузахънилис медальличил шабагъатлаварибси сай.
1976 ибил дуслизиб Даргала театрла режиссёр Нариман ГIялиевлис ХI.ЦIадасала уличилси ДАССР-ла пачалихъла премия бедибси саби.
Илала ишдигъунти пачалихъла шабагъатуни гIурра лер: медальти «Бузерилизив декIарухъни багьандан», «Бузерила ветеран» ва «Дагъистан Республикала гьаларти сархибдешуни багьандан» бикIуси орден.
Нариман МяхIяммадович ГIялиевли Дагъиста урибси гIяртистла, Дагъиста халкьла гIяртистла ва РФ-ла урибси гIяртистла ахъти уми хIурматличил дихули сай.
Нунира Нариман ГIялиев валуси сай. 1961 ибил дуслизив ну Сергокъалала педучилищелизив учIули вираси. Наб гIяхIли гьанбиркули ахIен, Сергокъалализиррил яра дуцIрумла каникултала замана Дибгашаррил нуни Даргала театрли бегI гьалар тIашдатурти спектакльти чедаибти. Гьанбиркур наб нуша, педучилищела студентуни, илди чедаэс Сергокъалализирад Избербашлизи дашулира. Спектакль таманбиубхIели, Дибгашила дурхIни Избербашлизив хIерируси нушала шан ГIяхIмад Даудовличир дуги беркIес кавлутири. ГьачамкIун, иличи дукьесра цIахбизурли бииши, шагьарла парклизиб дуги беркIибсири.
Нариман ГIялиевличил цаибил даргала студиялизив варх учIули вирусири нушала шан ХIябиб Наврузовра. Наб гьанбиркур, сунела цаибти спектакльти чедаахъес Даргала театр Дибгаша бакIили. Дибгашантани халаси хIурмат барибсири театрла гIяртистунала: бегI гьалаб театр нушачи бакIибхIели, гIяртистуни ва бахъал гIяхIли бахес багьандан, колхозли унц белгьунсири. ЦархIилван биэсра хIебири: дебали дигахъусири дибгашантас чула шан, театрла гIяртист Наврузла ХIябиб. Дибгашантазибад илини сабри бегI гьалаб чебяхIси даражала багьуди касибсира.
Гьанна наб гIячихъли гьанбиркули ахIен, се спектакль сабрил илхIели дила шилизиб чебаахъибси. ГIур, замана арбякьунхIели, багьурра нуни «Бэла» спектакльлизиб Нариман ГIялиевли Азаматла роль бузахъули биъни.
Нариман МяхIяммадовичлис ишбархIи ну гьанхIейкесра асубирар, амма ну гIулухъахIели Наврузла ХIябибли ну иличил тянишварибсири.
Дила макьалала ахирлизир нуни Нариман МяхIяммадовичлис арати гIямру, хъулиб баракат ва бузерилизир сархибдешуни дулгулра.
ХIяжимурад Ражабов
