Июньла 11-личиб Дагъиста халкьла урибси художник Тимур ГӀябдусаламович Кьагьиров 50 дус вирули сай.
Т.Кьагьиров МяхӀячкъалализив, 1974 ибил дуслизив акӀубси сай. ВиштӀахӀейчивад суратикIес илала иштяхӀдулхъулри, сунела дудешла узи, суратчи Хасбулат Юсуповла устаханализив вахъхӀи узули кавлули вири.
14 дус виубхӀели, ГДР-ла халкьани-ургабси 21 ибил выставкала дипломат ветаур, 16 дус виубхӀели биалли, илини «ВДНХ-ла жагьси бутӀакьянчи» бикӀуси хӀурматла медаль касиб.
1989 ибил дуслизиб дурхIнала художественная школа таманбариб, 1994 ибил дуслизиб М.А.Джемалла уличилси Дагъиста художникуни хIядурбируси училище тамандариб. Бурес чебиркур, ил училищелизир Тимурла учитель сарри Галина Пщеницына, машгьурси Россияла педагог, Россияла художникунала Союзла член. Илини Тимурлизир «портретла» жанрличира диги акӀахъуб.
Училище таманбарибхӀели, дахъал суратуни дирули вехӀихьиб Тимур. Мисаллис, илини тикрардариб Ф.А.Рубола «Взятие Гимры», В.Д.Поленовла «Одалиска», А.Ткачевла «Лодка в камышах» ва цархӀилти суратуни.
Буралли, Т.Кьагьировли Дагъиста тарихличи, илала машгьурти адамтачи, культураличи халаси пикри бяхӀчииъни ва диги дакIудирни аргъесли саби илала хӀянчурбазиб. Дахъал лер суратуни, сарира жура-журала Дагъиста шимас хасдарибти («Харбукский мотив», «В Согратле», «Солнечный день в с.Вихли» ва цархIилти). Илдачибли багьес вирар художникли се бурес дигулил.
ДекIарли бурес вирар Тимур Кьагьировли дарибти портретуначилара. Училищелизиб ил жанрличи акӀубси диги даимбирули илини дебали мягӀничерти, адам пикриулхъахъути портретуни лукӀули сай: «Горец в тулупе», «Портрет дочери», «Бабушка», «Горец» ва цархIилтира.
Гьанна Тимур Кьагьиров Россияла художникунала Союзла член сай. Илала дахъал суратуни лер Россияла, Канадала, Германияла, Францияла, Испанияла, Англияла, США-ла, Турцияла, Чехияла ва дахъал цархӀилти улкнала музейтазир, хӀукуматла ва вегIдешла коллекциябазир (дучибти суратуни).
Илис бузерилизир сархибдешуни, хъулиб баракат дулгехIе.
МяхIяммад Мирзаханов
