ИшбархIила за­ма­на дебали мягI­ни­чебсили ва аргъбаибсили бетаурли саби нешла мез мяхIкамдирнила масъала. Дигесли саби нешла мезла шайчиб бузути гIялимтани чеалкIуси наслулис букьурли калахъес гIилмула хIян­чурби далкьарахъухIели. Илдазиб илдани, миллатла рухIла давла сарливан, нешла мезла кьадри-кьиматличила иргъахъули саби.

УркIи гьатIиралра рази­би­рахъули саби, нушала гIя­лимтани улкализир ду­ра­дур­кIути декIар-декIарти конкурсуначир бутIакьяндеш дирули, гIяхIцад сархибдешуни ди­рахъухIели.
Лебилра Россияла хал­кьани-ургабси, мезанала дав­­ла калахъес акӀахъубси «БекI­либиубси дев» бикӀуси пре­мия бедлугуси саби цахI­наб­си Россияла конкурслизир бутIакьяндеш дирути бегIлара гIяхIтигъунти проектунас. Илди дяхIчиаили диэс гIягIнити сари мезанала давла мяхIкамбирниличи, илди гьаладяхӀ дашахъниличи, нешла мезаначи диги алкIахъниличи.
2022 ибил дуслизир Россияла 61 субъектлизирад, илкьяйдали Белорусь Республикализирад 232 гIярза дакӀиб конкурсличир бутӀакьяндеш дарес багьандан. Конкурсла 7 номинация лерри.
Илкьяйдали, «БегIлара гIяхI­си гIилмула хIянчи» би­кӀуси номинациялизиб чедибикиб РАН-ла Дагъистанна Фе­деральный хIялумцIлабала Центрла (ДФИЦ) ХI.ЦӀадасала уличилси мезла, литературала ва искусствола Институтла лексикологияла ва лексикографияла отделла бекӀлириубси гIилмула хӀянчизар Сапияха­нум МуртузагIялиевна Темирбулатовани бел­кӀун­си «Дарган мезла диалектологический словарь» бикӀуси проект.