Дагъистанна БекI С.Меликовла хIукму хIясибли, дахъал дусмазиб культурализиб барибси хIянчилис, Хайдакьла районна библиотекала хIянчизар Марият МяхIяммадовас «ДР-ла хIурматла хIянчизар» ибси у бедиб.
М.МяхIяммадовала бузерила гьуни 1986 ибил дуслизиб бехIбихьибсири. МяхIячкъалализибси культурала–багьудлумала училище таманбарибхIели, ил сунела шилизибси библиотекала заведующийла хIянчиличи рархьибсири. М.МяхIяммадовани бируси хIялалси бузери мурталра чихъли кьиматлабирусири шила шантани ва республикала руководстволи. Ил чуйнара Баркаллала кагъуртачи ва арцла шабагъатуначи лайикьрикибси сари.
2006-ибил дуслизир Марият МяхIяммадова районна бекIлибиубси библиотекала гьаркьяси хIянчизар ретаур. ХIянчила мер илис кIиэсил хъалили бетаур. Гьанна биалли, ил 32 дус библиотекарьли рузули сари ва адамти-ургар жузачи, литератураличи диги ва иштяхI имцIадикIахъули сари.
2013 ибил дусличирад Марият МяхIяммадова Хайдакьла някьишлизи ахъили, сунени балуси хIянчиличи дурхIни бурсибирули сари.
Илала хIянчурби районнизир, республикализир ва лебил Россиялизир детурхути выставкабачир гьаладирхьули дирар. Халкьла художестволати ваяхI калахънилизи ва Хайдакьла някьиш гьаладяхI ардукнилизи кабихьибси пайлис, ил ДР-ла культурала Министерстволи ва ДР-ла халкьла художестволати ваяхI дирнила шайчибси комитетли ХIурматла Грамотабачил ва дипломтачил шабагъатларариб.
Библиотекализиб барибси хIянчи багьандан, Р.ХIямзатовла уличилси Миллатла библиотекалира ил чуйнара шабагъатларариб.
Районна бекIлира М.МяхIяммадова мубаракрариб ва чеалкIуси наслулис ВатIан дигахънилашал бяркъ бедлугнилизи библиотекала хIянчизартани халаси пай кабирхьниличилара гьанбушиб.
«Хайдакьла район» МР-ла администрацияла пресс-служба
