«Дагъистан» РИА-ла редакцияла «Гьаргси хIукумат» бикIуси проект хIясибли дурабуркIуси яргаличилси пресс-конференция бетерхур. Иш гьакIлис ила живарилри Дагъистан Республикала пачалихъла финансунала шайчибси ахтарди бузахъуси Кабизла руководитель МяхIяч Ибрагьимов. Илини сунечи хъарси кабизли дусла духIнар дурадеркIибти хIянчиличила цацадехIти баянти дуриб ва 2023 ибил дуслизир дарестачилара багьахъур.
Илала гъай хIясибли, пачалихъла финансунала шайчибси ахтарди бузахъуси Кабизли чули ирзути къуллукъуни хIясибли республикала бюджетлати арц дархьли харждирниличи, илкьяйдали – масани исниличира, хIеруди бузахъули саби.
«Нушачи хъарси – арцла-бюджетла ва вягIдурти дилгьнила шайчиб закон бузахъни ахтардибирни. Ил мурадличил нушани хIясиббируси ва ревизияби дурадуркIути сари. ХатIабикибтас далдурцути тяхIуртачила бурасли, нушани бюджетла арц тIалабдирули дирехIе ва харжаначил дархдасунти лерилра хIянчи тIашиихIе, масъала арзайчи», — баянбариб М.Ибрагьимовли.
МяхIяч Ибрагьимовли бурни хIясибли, кIел дусла ургар Кабизли республикала бюджетлизирадти 2 миллиард къурушла харжани тIашаили сари, масани исухIели диахъубти хатIабачирли детаэс дирути.
Илала дурабадра, пачалихъла финансунала шайчибси ахтарди бузахъуси Кабизли кIел дусла ургарцун 286 миллионцад къуруш арцла деткахъни белгибарили саби, ва республикала бюджетлизи илди арц чардарахъили сари. ИлхIелира бегIлара дахъал хатIаби гьаргдарили сари масани иснила кьялилизир, гIягIнидеш агаркъира ва ихтияр агарли бюджетла арц харждирниличирли детаурти.
Ведомствола руководительли илкьяйдали буриб, гIергъитигъунти кIел дусла духIнар Дагъистаннизир бюджетла арц харждирнила шайчир диахъубти имцIатигъунти «хатIаби» гьаргдарили сари хъулри лушнила ва арадеш мяхIкамбирнила шайчирти кьялубазир или.
ГьанбиркахъехIе, пачалихъла финансунала шайчибси ахтарди бузахъуси Кабиз 2020-ибил дуслизиб акIахъубси саби.
