Гьалабван Дагъис­тан­на пача­лихъла университетла фи­ло­логияла факультетлизиб дар­гала студентуначил фи­ло­логияла гIил­мур­тала доктор Темирбулатова Сапия­ханум МуртузагIялиевна гьу­нираиб. Гьу­ни­баъни хIядур­ба­риб ва бузахъи ДГУ-ла ка­­федрала заведующий, фило­логияла гIилмуртала доктор Муса БяхIяммадовли.

Илини С.М. Темирбулатовани дарган мез руркънилизи мекелли ха­ласи пай кабихьниличила бу­риб. Хаслира тIинтIли буриб илини хIядурбарибси ва 2022 ибил дуслизиб дура­бу­хъунси гIилмула халаси хIян­чи­личила – «Дарган мезла диа­лек­то­логияла словарь»-личила, сунезира кIел азир­ли­чирра имцIали дугьбала статьяби кадерхурси. Илди статьябазир 50 азир­ли­чирад духъи бегIлара дузахъути, вецI­ну урегра лугъатла авцIанну хIябра говорла дев лер.
ГIур гIялимлизи гъай бедиб. Ил акIубси сари Хайдакьла районна Санчила шилизир. Илис риштIахIейчирад ручIес ди­гусири, амма илала нешли пурбанбирули ахIенри, гьайгьайрагу, дудешли илис ручIахъес ихтиярбариб. Университетлизи карерхес гьалаб Сапияханум Мур­тузагIялиевнани сунела шилизибси гехIел классла школа таманбариб, ва Ма­жа­лислизибси школализиб белчIуди даимбариб. Сапияханумли Дагъистанна пачалихъла университетла филологияла факультет хъараахъур. Сари акIубси Санчила шила школализир рузес рехIрихьиб. КIинайс аспирантурализи карерхур ва ункъли таманбариб. Ил гIилму гьалабяхI арбукес гъазализир сари. Сапияханум МуртузагIялиевнани дахъал хIянчурби делкIун. Илди сари «Отраслевая лексика даргинского языка», «Кайтагский диалект даргинского языка», «Библиография по даргинскому языку», «Современный даргинский язык» (коллективная монография), «Дарган мезла диалектологияла словарь» ва цархIилтира. Гьаннара ил Россияла гIилмуртала академияла ДФИЦ-ла мезла, литературала ва искусствола Институтлизир гIилмула бекI хIянчизарли рузули сари.
Гьунибаънила ахирличир илини студентунала суалтас чедетаибти жавабти дедиб.