Гьалавван «Гьалмагъдеш» журналла бекI редактор Кьади ГIялисултIанов Дагъистанна пачалихъла университетла филологияла факультетла даргала отделениела студентуначил гьуниваиб. «Гьалмагъдеш» 70 дус биъниличил бархбасахъи, студентуначил ил журналла тарихличила ихтилатбарни сабри гьунибаънила мурад.
Гьала-гьала студентунала гьалав гъайухъун Дагъистанна мезанала кафедрала заведующий, филологияла гIилмуртала доктор, профессор М.Р.БяхIяммадов.
Илини дарган мезла агиличила, илди багьла-багьлали деткайхънила масъалала аргъбаибдешличила буриб ва студентуни гIяхIяйчил тянишбариб.
Кь. ГIялисултIановли багьахъур издание мурт, секьяйда ва сегъунти мурадуначил акIахъубсирил.
«Журналла редактортили бузули калунти саби Дагъистанна машгьурти поэтуни ва писательти: ГIяхIмадхан Абу-Бакар, Газим-Бег БяхIяндов, Сулайбан Рабаданов, ХIябиб Кьурбанов ва цархIилтира.
ИшбархIила гьамадси ахIенси замана «Гьалмагъдеш» журналли мез мицIирли калахънилизи ва гьаладяхI дашахънилизи халаси пай кабирхьули саби», — викIи ил.
Редакторла гъай хIясибли, баягъи журналлизи бахъхIи лукIули ва чула сагати произведениебачил дарганти тянишбирули калунтири даргала писательти ва поэтуни. Илини студентунира илкьяйдали «Гьалмагъдешлизи» лукIахъес ва журнал къулбасбирахъес жибариб.
Илала пикри нунира гIеббурцулра, сенахIенну дарган мезличил дурадулхъути газетабала, журналтала ва телевидениела передачабала кумекличилцун дирехIе нушани мез гьаладяхI ардукес.
Илкьяйдали дила кьас леб «Гьалмагъдеш» журналличил бархбас кабизахъесра, ила белкIани дурхьесра.
Баркалла багьахъес дигулра нушала преподаватель Муса БяхIяммадовлис ва «Гьалмагъдеш» журналла бекI редактор Кьади ГIялисултIановлис илцадра мурхьси бухIнабуцличилси ва тамашаласи гьунибаъни дураберкIнилис.