ШалгIеббухъунси ха­­мис бархIи, хал­кьа­нала цадешла БархIи дурабуркIниличил барх­­басахъи, Дагъистанна БекI Сергей Меликовли бу­зе­рилизиб декIарбухъунти да­гъистанлантас РФ-ла ва ДР-ла пачалихъла шабагъатуни дедиб.

Сергей Меликовли Ва­тIан багьандан вегIла жан ахIерахIедирнила ва иличи дигила саркъибси гIибрат сайливан МяхIяммад Абакарович Саламов гьанушиб.
Бурес гIягIнибиркур, рес­публикалис къиянси ман­зил­хIели, халкьлис урехи хIе­би­ахъес, ахIерси ванзаличиб даршудеш ва паргъатдеш калахъес багьандан, гъармукабас ва хIиллакартас гьалаизурли, илини сунела гIямру кьурбандарибтири.
Регионна БекIли шаба­гъат вебкIибсила урши МяхIям­мадгIялизи бедиб.
Илала цайли цаси урши МяхIяммадгIяли Саламовла гъай хIясибли, дудеш кавшибси ит мусибатла бархIи — 2010-ибил дусла августла 2-личив – дудеш рурсиличивад хъули чарирулри.
«Дудешличил мусибатла анцIбукь кабикибхIели, нушала хъалибарглис дебали декIлири. Дудешла узикьар биалли, ил вебкIнила хабарли декIли зягIипикахъибсири ва сагъирули ца дусцадхIи калунсири», — пашмандешличил дудеш гьаниркахъули сай МяхIяммадгIялини.
Илала гъай хIясибли, Мя­хIяммад Саламовлис гъамтачил ва узи-уршиличил гьунибаъниби дурадуркIес дигахъи. Бурес гIягIнибиркур, илини гьарил сунечи дугьавизурсилис кумекбири. Илала пикри хIясибли, эгер хIуни чис-биалра кумекбарес вирули виадли, чараагарли ил барес хIяжатси саби.
Гьалабван наб дудешла юл­дашуни къаршибикиб. Илдани дахъал ванати дугьби дуриб чула юлдашличила. «Дагъистаннизиб лебилра мурул адамти МяхIяммадгъунти биалри, нушала республикализир гьар секIал далкадирки», — бикIи илди. Дудешлис гIяхIли дигахъи. Илди нушачиб гьар мурталра бири», — викIи ил. — Итди, 90 ибти дусмала ахирлизиб, паргъатти ахIенти бурхIназив ил ахIерси шила ва шантала кьисматличила дебали пикриикIусири. Дудешли набзи чуйнара ибсири, эгер нушани нушала ши ва шанти хIебатахъахIелли, ил чилилра хIебиру или.
Бурес чебиркур, Мя­хIям­мад Абакарович Саламов Къарабудагъкентла районна Губданила шилизив гIядатла хъубзарла хъалибарглизив акIуб­си сай. ДекIар-декIарти дусмазив халати къуллукъуначив узули калун, илдала лугIилизиб – Губданила шила бекIлира.
МяхIяммад Абакаровичли ва илала хабчабли авал дурхIя абикьур – хIябал рурсира ца уршира.
М.Саламов веб­кIили гIер­гъи Гъабзадешла орденничил шабагъатлаварибси сай.