ХIера, гьанна урчIемал баз Украинализиб бетурхули са­би Россияли дурабуркIуси дя­вила хасси балбуц (СВО). Илизир бу­тIа­кьяндеш дирули бахъал нушала рес­пуб­ли­кала адамти леб. ЦабехI — бехI­бихьудличибадал, цар­хIилти — моби­ли­зация дура­бер­кIили гIергъи. Нушала МикI­­хIила шилизибадти гIяхIцад адамтанира илаб чула къуллукъ бе­тур­хахъули саби. Россияла Президент Владимир Путинна ХIукму хIясибли, чумра солдат медальтачил ва ордентачил шабагъатлабариб.

ИшбархIи наб сунечила бурес дигуси солдатцун ахIен. Ил илкьяйдали тухтур-хирург сай. Илини адамтала гIямру сари уцахъути. Россияла Президентла ХIукму хIясибли, хасси балбуц дурабуркIуси мерличир медицинала кабизла старший лейтенант, операцияби дурадуркIуси взводла командир, тупа иртуси манзил адамтала гIямру дерцахъни, медицинала хIянчи хIяжатси тяхIярли тIашбатни ва гъабзадеш дакIударни багьандан, СултIан МяхIяммадрасулович ВалибяхIяндовлис «Гъабзадешла Орден» бедиб. СултIан, тухтурла хIянчи ишбархIира даимдарили, сунени къуллукъбируси мерличив сай. Илини сунела санигIят гьалабяхI арбукес багьандан багьуди чеимцIабарес белчIудира даимбарили саби. Нуни илала неш Ирина Камаладиновна Кьурбановачил ихтилатбарира. Нешливан дурхIнала уркIи чилилра хIергъу. Бурасли, Ирина Камаладиновнара дуги-хIери хIеили, рузуси адам сари. Ил чеалкIуси наслулис бяркъ ва багьуди бедлугули, учительницали рузули сари, илкьяйдали шилизибси биштIатала анхъла заведующийла заместительлира. Наб дебали къиянни бирар адамтачил дургъбачила гъайикIес, хаслира илдала тяништи илаб биалли. Биалра газета бучIантас нуша-ургаб илдигъунти гъубзни лебниличила багьес хIяжатли саби, ва сеналра хъумартес асухIебирар.
– Ирина Камаладиновна, гьанбиркуру хIела урши Украинализиб дурабуркIуси дявила хасси балбуцлизи вархьниличила аргъибси бархIи? ХIела уркIиличи ит манзил се пикри бакIиба?
– Гьайгьайрагу, гьанбиркур. Февральла 24. Ну Лавашала шилизир, шахматунала абзличир сарри. Интернетлизибад дявила хасси балбуц бехIбихьили саби или аргъира. Илаб дебали бахъал адамти, хаслира учительти лебри. Адамтани чула пикруми дурес бехIбихьиб. Нуни итмаданал уршиличи телефоннизирад зянкъдяхъира. Нуни балусири илини Украинала дазула мякьлар дурадуркIути учениебазир бутIакьяндеш дирули виъни.
Илини набзи багьахъур, Россияла гIяскурти, дазу ахъили, хасси балбуц бетурхахъули, Украинализи духIнадерхниличила.
Амма чула гос­питаль дазула мерличиб саби ва сай Украинализив ахIен­ра викIи. Илини, мурт зянкъдя­хъяс­лира, сай дазуличив сайра или бурусири. Нуша пар­гъа­тагархIедиахъес багьан­дан сай илав виъниличила хIе­бу­рули вииши. Илини дявила госпитальла суратуни дурхьутири, нуша кьа­кьахIедикIахъес жии­кIу­сири. КIинайс илаб телефонна бархбас бетахъес асубирар или бурибсири. Итала гIергъи рах-рахли сарри зянкъ дашутира. Нуни хIебалуси номерличирад зянкъ дакIалри, нуни итмаданал телефон ахъбурцусири, ил мурталра дила мякьлаб бири. Нуни балусири дила уршила саламтачил дашути сарни зянкъ. Набчи илини берцахъибти бургъантани сарри зянкъдирхъути. Уршилис нуша паргъатдиахъес дигулри. Дебали къиянти, кьакьадешли уркIи цIа­цIабарибти дуги-хIери дер­кIира.
— Сен пикрибарибсири уршили сунела гIямру тухтурла санигIятличил дархдасахъес, илхIелира дявила тухтурла санигIятличил?
— СултIан виштIали левалли, адамтас кумекбирес дигулра викIусири. Нушаб малла ветарар или гьанбиркусири. ХIебалас сен илгъуна пикри алкIусирил. ХалавикIуцад тухтур ветаэс дигулра ибти гъай дикьулри. Нушаб ил санигIят касахъес, учIахъес къиянбулхъан или гьанбиркусири. Амма ил гIяхIти кьиматуначил имтихIянтира дедили, медицинала академиялизи учIес керхур. Бурасли, нушала кумек агарли ил белчIун. КIинайс интернатурара хъараахъур. Нушала республикализиб хIянчила мер баргес хIейрули, итаб тухтурти гIягIнили саби ибси багьахъни чебаибхIели, арякьунсири ва дявила тухтур ветаурсири.
— Хасси балбуц дура­бур­кIуси мерличибад бархбас бу­захъес дебали къиянни сабри. Иличила хIунира буради. ЗянкъдяхъибхIели, селичила сарри илала гъай?
– ИмцIаливан – ну ункъли сайра, кьакьамадикIудая. Илдигъунти ца-кIел гъай дурили билшахъуси заманара бири. «ХIу СултIанна неш саррив? Илини нуша дерцахъира, баркалла» бикIули, зянкъбикIутира бири. Илдани ил гIяхIил сай, арали сай или бурули бири. Дявилизир детурхутачила буруси ахIенри.
— Гьалавван ил отпускличи вакIибсири. Гьанна сагадан гIярмиялизив сай. Мякьяд ила или, хIерикIадив?
– Илала отпуск таманбируси замана контрактра таманбирусири. Нуша лерилра тиладидикIира хIевкьяхъес, хъулив калахъес. Нушази чарулхъас или, арякьи, кIинайс ну чархIелхъас, ишав ну имцIали хIяжатлира или багьахъур. Марлира, илини илабси аги балули сай. Дила уршили цалра адамла гIямру-жан дерцахъес имканбакIалли, ну пахрули рирцIулра. Се бирехIе…
— Сунес дебали лайикьси орденничил ил шабагъатлаварили сай. СултIан нешла пахрура сай. Секьяйда абилкьутив илдигъунти игитуни? ЦархIилти нешанас насихIят бурили дигахъира.
– Се буриша нуни… Дила пикрили, илала гIямруличи халаси асар бариб алав-гьалавтани, нушала школализиб бузути учительтани. Илала леб гIяхIти гьалмагъуни. АкIубси мер. МикIхIила шилизиб гьарли-марти гъубзни саби. Сай хъалибарглизив дурхIназивад халалгъуна виъни багьанданра илала хIял-тIабигIят илдигъунтили детаур дургар: биштIатачи хIеруди, сунела гьарил ганзлис жаваб бедлугни, мурул адамли бедибси гъайлис марли виъни. Илгъуна бяркъ саби нунира, сунела дудешлира бедлугуси. Наб бурес дигулра, нушала лебилра дурхIни гIяхIгъубзни саби. Илдани чула жан ахIерахIедарили, чучи хъарси бирули саби ил (Украина) мерличибра. Цалра нешлис дигути ахIен дургъби. Дигули ахIенра илди набра. Лебталалра дурхIни ара-сагъли чула бегIтачи, хъалибаргуначи чарбухъаб или рулгулра!