Ишдусла сентябрьла 22-личибадси Рос­­сияла Фе­де­­ра­цияла Пре­зидент В.Пу­тин­на ХIукму хIя­сибли Ахъу­ша­ла районна Уси­шала ши­ли­зивадси Сусулов ГIяб­дул­лагь МяхIяммадовичлис Гъаб­за­деш­ла орден бедиб.

«Украинализир, дявила хас­си балбуц дурабуркIути мер-мусаличир, сай вяхъили виъ­ниличи хIерхIеили, хъарбаркь таманбирухIели дакIу­дарибти гъабзадеш багьандан» — белкIи саби ил шабагъат­ла­ви­ру­си ХIукмулизиб.
Мегь бумжахъули, гIур биргIяхъули дебшлабирули бирар. Дявила хасси балбуцлизир гъабзадешла дебш кайсули сари нушала бургъантани. Нешанани ахIерли абикьурти, дудешунани къиян чехIебаахъили халабаахъибти, пикруми шалати, уркIи-хIял хIялалти, талихIла челябкьлаличи лайикьти, чарх-бекIлизиб ара-сагъти, къугъати нушала уршбас Донбасслизир кадиркути анцIбукьунани къиянти имтихIянти гьаладихьили сари. Илдани имтихIянти чедибдешличил дурцули сари. Илдала игитдешличила, гьар бархIи, сагати хабурти дашули сари.
ГI.Сусулов шаба­гъатла­вар­ниличила буруси кагъар редакциялизи ба­кIибхIели телефонна номер баргили, илала нешличи зянкъдяхъира. Наб бегIла гьалаб, илала гьунарличила багьес дигули ахIенри, уршила арадеш секьяйда сабира или пик­ририкIулри.
«Ставропольлизив госпитальлизив сай, гьанна аравирули сай, илала гIямрулис урехи агара», —или бурибхIели паргъаткариубра.
Гьанбиркуси ахIенри, нушала жагьилтани хала дудешунанигъунти къияндешуни чекасес чевкъар или. Илдас биалли, гьатIира къиянни саби. Адамтази, адамти кабушахъе­с багьандан, кахти, сагати ярагъ дуракаили сари. Гьанна илди, чузиб халаси гьунар лебти ярагъличил бургъули са­би. Тамаша ахIену, шанда хIяр­хIуба­чирра, кахти ярагъличирра, нушаб ахIерти уршбала уркIби чIумали сари. Хала дудешунала чIумати уркIбала хIи илдала тумазир дургъули сари.
Хасси дявила балбуц бехIбихьибхIейчирад 8 баз дикили сари. Дявила балбуцла ахир чебаэс агара. Сунела хъархIерагардешлис урехи хIебиахъес багьандан бургъес чебуркъубси Россияличи, хIякьикьат чули ункъли балули биалра, лерилра дурала улкни къаршили кадизурли сари. Дунъяличив маслигIятла, гIяхIси дев буруси адам агара. Дургъбала цIаличи киноличиван, гIур се бетарарал, арагIерли улкнас бекIдеш дирути адамти хIербикIули саби, Аллагь акаб чула бекIличи. Илаб бургъути уршбала бунагьла цIали бигаб саби.
Илар кадиркути анцIбукьу­на­чила пикрумани паргъатдеш лугули ахIен. Лебилра дунъяличирра, нушала улкализирра дявила хасси балбуцлизир детарутачила, сагати хабуртазиб, уркIилис паргъатдеш лебхуси гIяхIси хабар бакьес гьар бархIи хьулрикIулра.
Дявила хасси балбуцлис бекIдеш дарахъес сагали катурси гIярмияла генерал С.Суровикинни дурибти гъай­ли циила уркIи паргъатби­ахъуб. «Илар кадиркути анцI­бу­кьуни гьамадти ахIен, нуша че­дидикес гьалакдикIули ахIен­ра, нушани гьарил ургъан ахIе­ра­варес лерилра имканти пайдаладирулра», — викIулри ил къуллукъуни дузахъес ве­хIи­хьибхIели дурибти гъайлизив.
Империалистунани биал­ли гъайлизир арц сари дуйгIути. «Мил­­лигIярдунала кумек­­б­ирехIе, гIурра мил­ли­гIяр­дунала ярагъ дедлугехIе. Ну­шани Украиналис бургъахъес кумек­би­рехIе», — илди гъай сари гьар бархIи дурути.
Сен кумекхIебареса, Аллагь акартани, илди саби кьалли бургъули ахIен. Чула нясти миллигIярдуначил, Украинала биргIябиргибти халкьла някъбачил Россия гьунарагарбарес, пашбехъахъес, гIур чула някълизи буцес пикруми сари илдала.
ЧебяхIси ВатIа дергълизиб нушала бургъантани «Нуша дархьлира – нуша чедидиркехIе», — ибти пикрумачил чедибдеш сархибсири.
Гьамадли хIебирар чедидикес, улкализир дахъал секIал лер халкь гъузгъалдибирути или пикрирулхъули рирус цацахIели, амма нушачи къаршили кабизуртала дурутира, дирутира пикридарибхIели, илди чедибикес хIебирниличи чIумали рирхулра. Арцлис асесра бицесра вирути капиталистунала умуси уркIира, ВатIайчи дигира агара.
Секьяйда илди чедибиркура ГIяб­дуллагь Сусуловгъунти гъубзни ул­калис урехи хIебиахъес гьалабизурли биалли? ЧебуркъубхIели къа­лаван тIашкабизес хIядурти гъубз­ни, нуша цIакьтира или гап­хIе­би­кIули, чула гьунартачила хабурти хIедурули, гъай камли, баркьуди халали, някълизир ярагъличил улкала челябкьла калахъес дурабулхъули биалли.
Сусулов ГIябдуллагь МяхIям­­ма­дович 1989 ибил дусла апрельла 12-личив хабарла даргантала Усишала шилизив акIубси сай. Ил Усишала кIиибил школализив учIули калунси сай. УчIу­хIели гIибратли дурести бухъя-зегъаличил, мурталра юлдашунас кумекбирниличил, гIяхIси белчIудиличил декIарулхъусири. Азадли мушулбашнила шайчив спортлизи ахъибсири ва шилизир, районнизир, республикализир гьаларти мерани сархусири. 2006-ибил дуслизиб шила школа таманбарили, Ставропольла Юридический институтлизи учIес керхур. 2011 ибил дуслизиб институтлизиб белчIуди хъараахъурли, гIярмиялизиб къуллукъбарес арякьун. 2013 ибил дусличивад, вягIда бигьи, дявила десантла бургъантала къяянази керхурли къуллукъбирули сай. Командиртала хIурматличи ва баркаллаличи лайикьикили сай. «2020-ибил дусла январьла 24-личивад июльла 2-личи бикайчи Сириялизивра ургъули калунсири», — рикIулри илала неш МяхIяммадова Раисат МяхIяммадовна. Илди бурхIни нешли цацали дейгIи уркIиличир далулри. Донбасслизиб хасси дявила балбуц бехIбихьибси бархIиличивад итабра къуллукъбирули калун. Иларти къияндешунас мукIурхIекIиб, командиртала хъарбаркьуни тамандирули, сархибдешуначила гапхIейкIули ургъули калун.
ГIябдуллагьла дудеш Сусулов МяхIяммад ГIяб­дуллаевичли ва неш Мя­хIяммадова Раисат Мя­хIям­ма­довнани хIябал ур­ши хала­баахъиб. МяхIяммад ГIяб­дул­лаевич шила школализив физ­культурала учительли, Раисат МяхIяммадовна Ахъушала больницализир хирургияла медсестрали бузули саби. Мя­хIям­мад ГIябдуллаевич шила дурхIни азадли мушулбашахъес бурсибирули тренерли узулира калун. Илдала ца ур­ши Новосибирсклизив тухтурли узули сай, ца фермер ветаур, ГIябдуллагьли биалли ургъанна, ВатIан балтахъанна санигIят чеббикIиб. 2013 ибил дусличивад вехIихьили, ВатIайс марли къуллукъбирули сай.
ГIябдуллагь МяхIям­ма­до­вич Сусуловлис тухтуртала дармунти сабабдиубли, сунес чIумаси арадеш биубли, хъалибаргличи, шанти-тухумтачи, неш-дудешличи разили чарухъахъес нуша дулгулра.
Дявила хасси балбуц таманбиубли, дунъяличибра Россиялизибра даршудеш кабизурли, лебилра паргъатли хIербиубли дигулра.