Халкьани-ургабси берклуми далкьарахъусила (поварла) БархIила байрам кабизахъурси саби 2004-ибил дуслизиб лебил дунъяла Шеф-повартала цахIнабикунала Ассоциацияла сипталичил. Ила кабурхути саби дунъяла лерилра улкназибадти гехIел миллион адам. Ил байрам дурабуркIуси саби 70 улкализиб. Байрамла бархIи гьар мерличир кулинарияла конкурсуни, устадешла дурсри, далдуцуни дурадуркIути сари. Гьайгьай, шадлихъла далдуцунира дурадуркIу ил бархIи бизити хурегуни дирантала хIурматлис.

Повартала байрам гьарил улкализиб хасси тяхIярли дурабуркIуси саби. Буралли, берклумала шайчиб Дагъистанра чисалра гIелахIебулхъан или гьанбикесли саби. Камли ахIен илцадра багаласи баркьудилизи ахъили, халаси хIурмат сархибти дубурлантира. ХIера, илдигъунтазирадли ца сари Дахадаевла районнизирадси Алпият Кьурбановара. Ил гьанна гIяхIцад дусмазир МяхIячкъалализир хIеррирули сари ва бизити берклуми дирниличирли машгьурриубли сари.
Бурули бирар, декIар-декIарти шимазибадти бегIтала дурхIни илди шимала гIяхIтигъунти къиликъуначилти бирар или. ХIера, Алпият Кьурбановала неш Муслимат КьярбачIимахьилизирадси сари ва дудеш ХIясан СутбукIла шилизивадси сай. Кьисматли илала нешлис гIергъиси замана ДугIахъарла шилизир хIерриахъес кьадарбиахъуб. РучIули калун ил УргIерила администрациялизи кабурхуси Урхьнишала урга даражала школализир. ТалихI баргиб Алпиятли хъярбукайчил. ХIебиалли, Алпиятла ургIерантачилра чIумаси бархбас лебли саби. Илкьяйдали, Алпиятлизи шелра шила вакилтала бегIлара гIяхIти къиликъуни минадиубли сари викIалра хатIа бетхIерар. Гьанна илини декIар-декIарти миллатунала адамти бизиси кьацIличил балхес имкантира даргили сари.
Алпият Кьурбановани бегI гьалаб палтарла уста ретаэс кьасбарибсири. Илгъуна гьуцIли сирхIян рурси Избербашлизи раахъиб ва илаб хасси багьудира касиб. Ил чумал дус чеббикIибси санигIят хIясибли рузули калун. Амма илала уркIи адамтас имцIали багаласи баркьудилизи ахъес хьулбикIулри ва «Зеленое яблоко» бикIуси тукейзир кассирли рузескарииб. Илар гIибратчерли рузуси рурсиличи туке администрацияли пикри бяхIчиаиб ва берклуми далкьарахъули рузахъес шурратур. Алпиятли илар сунела гьарли-марти устадеш чедиахъулри ва гьар журала хурег бирнилизир декIаррулхъулри.
Бархьси саби, хьунул адамли бегI гьалабси яргализир берклумала шайчир ахъти устадеш касес хIяжатси саби, сари чинар рузули риалра. Хъалибаргра гIяхIти берклумачил гIеббуцес хIяжатсигу черетаибси хъа регIли. Дубурлан рурсили 4 дусла бухIнаб, сунела сабухъчебси бузериличибли барх бузутала ва тукейзирадли берклуми исантала хIурмат сархиб. Илини Дагъистанна лерилра миллатунала хурегуни ункъли хIядурдирес балули сари. Иличи мастерла хIянчи хъардариб ва гьанна 3 дус ил санигIят бузахъули сари. Илини бекIдеш дируси 40 адамлизибадли цалабикибси кьукьяли бизити ва дахъал журала кьуцIри дуцIули сари. Нунира имканбакIалли «Зеленое яблоко» супермаркетлизирадли кьацI асес къайгъибирули рирус, сенахIенну илар илцадра бизити ва дахъал журала дирарну илди. Илгъуна пайдаласи санигIят чеббикIили ва бахълис устадешличил хIядурдарибти кьуцIри дуцIули рузуси Алпиятличи пахрухIебарес хIейрар. Сунела санигIятласи байрамличил бархбасахъи, ил уркIи-уркIиларадли мубаракрирулра ва гьатIира сабухъчерли рузахъес цIакьанира устадешра имцIадиаб эс дигулра.
Алпиятла рурси Хадижара нешгъуна рялхъя ва гIякьлучерси рурси сари. Ил 6-ибил класслизир ункъли ручIули сари. Нешгъуна хIурматчерси ва хIялалси бузерили илра черяхIрарибси ретарниличи вирхес вирар.