Пагьмучебти адамти, мицIирли лебай, чула у цархIилтала уркI­ба­зиб даимлис минабиахъес ба­жар­дибиркули саби.

Ил­ди­гъунтазивадли сай­ри дар­гала пагьмучевси писатель, тил­маж ва гIяхIси адам Ильяс ХIя­жи­мя­хIям­мадович ХIя­са­новра.
1947 ибил дуслизиб ХIямшимала шилизиб школа таманаили гIергъи, Ильяс ХIясанов Сергокъалала педучилищелизи керхурсири. Илис гIергъи И.ХIясановли белчIуди Дагъиста пачалихъла университетлизиб филологияла факультетлизиб даимбарибсири. ДекIар-декIарти замунтазив ил школализив учительли, «Ленинна байрахъ» (гьанна «Замана») бикIуси газетализив журналистли, «Лачин» журналла редакторли, писательтала Союзла секретарьли, писательтала Союзла даргала секцияла руководительли узули калун.
Суненира даргала литературализи сагадешуни хибси, илгъуна гIур­ цархIил пи­сатель хIелас нуни. Илини сабри даргала литерату­ра­лизиб бегI гьалаб «Шатур» бикIуси роман-эпопея белкIунси, су­­незирра Дагъиста тарихлизир кадиркути анцI­­б­укьуни хьулчи­ли дуцили, халкьлис гIяхI­­дешлис вяшикIуси апаракла сипат гьарг­б­и­руси. Роман-эпопея урегал повестьлизибад цалабикили саби: «Ша­тур», «ЧеббицIни», «ЧIакнала наслу», «Лавашала хъябуртачиб», «ГIергъиси апарак», «БерхIила нургъби». Илкьяйдали Ильяс ХIя­са­новли «ТаманхIебиубси кагъар», «Тинатин», «ЧяхI-чяхIила ма­кьам­ти», «Хала вацIала дяхIцIи» ва цархIилти повестуни дел­кIун­ти­ри.
Наб ил гIядатла ахIенси адамличил дяхI-дяхIли тянишриэс имканбакIибсири студенткали рирухIели.
Писатель бегI гьалав чеибхIели, ил наб гIямрулизив камли къаршииркуси, жузлизивси игитличи мешуикибсири. Сунела заманализиб илала «Шатур» бикIуси роман-эпопеялира халаси асар барибсири набчи. Дила курсовой хIянчила тема сабри Ильяс ХIясановла «Тинатин» бикIуси повестьла бекI мягIналашалти, тематикалашалти ва художестволашалти хасдешуни» ибси. Ил сабабли зумали писатель узуси хIянчила рашули рираси, курсовой хIянчи белкIес багьандан гIягIниси материал бучес или. Нушала ихтилатуни илцадра тамашала дири, гьаннара гьандиркули сари илини кадирхьути гIямрула дурсри, гIердурути насихIятуни. Илини гIямрулизир кадиркути анцIбукьуни сунеласун, адамличи дигили бицIибси тамашала хIерличил чедиусири, гIядатла адамли цархIиллизир чедаэс хIейрути къиликъуни хIясибдиресра балусири. Нуша имцIаливан литератураличила, гIямруличила, сунени делкIунти произведениебачила ихтилатдикIира.
Повестьла игитунала хIял-тIаби­гIят­личила, илдигъунти игитуни акIахънилис хьулчилидиубти аги-кьяй­даличила, ил произведениела бекI мягI­наличила лякьир­ди­кIира. Ильяс ХIя­жи­мя­хIям­мадовичли сел­ра сунела хIерудила дураб хIебалти, илини биштIаси лишан, вава, галга, къаркъа хIясиббири. Дебали дигахъусири илис тIа­бигIят. Илини дунъяла классикала литература, Дагъиста ва даргала литература гIяхIил далутири.
Писательла гIям­ру­лизиб ли­те­ра­тура бекI­­ли­биуб­си­гъу­на хъарихъ, ил ур­кIи­чеввируси ва цIакьани дедлугуси мягIдан сабри. Адамдешла черяхIти къиликъуначир делшунти писательла гIямру сунела пикрумазирад, сунени лукIути ва нушала гьалар гьаргдирути тамашала белкIаназирад де­кIарли хIердарес хIейрар. ГIям­рулизир кадиркути анцI­букьунира илини сари лертиван, гьарил девлизи мурхьси мягIна бухIнабуцили, учIусини илдазибад пасихIси дарс ду­расесли чедиахъутири.
Илини селичила-биалра пик­ри буру­хIели, лехIирхъуси адам, тамашала, илис гьалаб че­­хIебаибси дунъялизи ухI­най­у­­хъу­сигъунари. Илис сабри ле­билра иличи гьуцIти, илала урхI­мешули ахIендешли, адамтачи дигили сунечи битIи­кIу­хIели.
Ильяс ХIясанов рухIлашал давлачевси, пагьмучевси писатель, критик сайливанра тянишсири бахълис. Иличи гIядатла адамти, жузала авторти, литературализиб чула перола бугадеш ахтардибарес хьулбухъунти даргала литературала хIекьлизир, лукIнила тяхIяр-кьяйдаличила, дигIяндешуначила насихIятуни гIердурахъес, критикалашалти макьалаби делкIахъес или дугьабилзутири. Цалра адам сунела хIерудила дурав хIетурсири И.ХIясановли, гьарилличил ванали ихтилатикIи, илис хIяжатси гIякьлула гъай, насихIят хIебурили хIевъи, гьариллис сунени вирусигъуна кумекбири, ванаси девличил илди гIеббурци, жузлис рецензия лукIи. Ил девличи дебали чекалзи, тIалабкарси вири, пагьмучев редактор ва тилмаж сайри. Пагьмучевси тилмаж сайливан, И.ХIясановли даргала театрлис А.Дюмала «Клодла хьунул» («Жена Клода») бикIуси пьеса, Н.В.Гогольла «Хъайчикайъни» («Женитьба»), Х.Андерсенна «БиштIатала хабурти» («Детские рассказы»), «Дагъиста халкьла хабурти», А.Аджаматовла хабурти ва цархIилти произведениеби дарган мезличи шурдатурсири.
ГI.ВяхIидовли И.ХIясановла творчество кьиматлабирули, «Ахъанайтачи» бикIуси жуз­лизиб белкIунсири: «Писательли нушаб урхIмешули ахIенси, цархIилтазибад де­кIар­­булхъуси белкI гьалабирхьули сай. БегI гьалаб илала декIардеш произведениела ху­дожестволашалси каргьнилизиб гьаргбирули саби…». УрхI­мешули ахIенсили, гIядат­ласи ахIенси виънили сарри писательла устадеш, пагьмула жагадеш, илала рухI­лашалти дигIяндешунира гьарг­дирути.
Бахълис ахIертили детауртири Ильяс ХIясановла дарганеллаби. Ил публицистикала сагаси жанр писательли пикрибарибсири. Ил жанрла хасдеш селизиб сабил хьарбаибхIели, илини набзи бурибсири, дарганелла журналистикализибад литературализи гьабатурси ганзиличи мешуси саби или. Иличибли писательлис жагьил лукIаннис литературализи гьуни гьаргбарес дигулри.
— ГIядатла адамличивад пи­сатель селичивли декIа­рул­хъуси? — ибси дила суайс, гьачам илини ишкьяйда жаваб чарбатурсири: «Сепайда, ПатIимат, бурес агарли къиянти сари литераторла гIямру. ХIуни хIу даим чедив — бунагь агарихIив — зубарталара дубурталара дазуличив, бизити маркалара ургайчив вихIес кьадарси саби:
Рушбат агарси саби.
ХIиллара.
Кьисмат язихъси саби.
Хурегра.
Диги агарти сари.
ТалихIра.
Дунъя хIечил барх саби.
Аллагьра…»…
ХIера, илгъуна адам ва писатель сайри Ильяс ХIясанов.
ИшбархIи нуша-ургаб ба­хъалгъунти даргала пагьмучебти писательти агара. Ил­дала лугIилизив Ильяс ХIя­са­новра. Ишдус И.ХIясанов акIуб­хIейчирад 85 диркути сари. Гьай-гIяйиб, бахъ жявли гIямрулизибад арбашулигу пагьмучебти писательти ва поэтуни. Амма илдала произведениеби инсаниятлис кахIебурхуси давлали детарули сари, ва илдани даимлис адамла гIякьлу мурхьти ва духути пик­румачил чебирцIахъули кав­лан…