Адамти леб чебяхIси даражала багьудира касили, аспирантурара таманбарили, гIил­муртала кандидатунира док­тор­тира бе­таурли, чIянкIли чула санигIят хIясибли бузути.

Леб гьар шайчибад художестволашал, гIил­мули­зир, тарихлизир, культурализир, искусстволизир, фольклорлизир, мезлизир чула цIакьани, пагьмурти ахтардидирути, гьар шаликарли бузути, гIямрула, бузерила дахъал журалати кьялубазиб бажардибиркути, илди мутIигIдирути. Илдигъунтазивадли сай хъярбукан Юсупов Хизри ГIябдулмажидович. Ил — поэт, журналист, публицист, фольклорист, язы­ковед (мезла дахъал кьялубазив узан), тилмаж, рецен­зист, гIялим, словарьти цаладирхъян, художественный, гIилмуртала жузала автор, поэзиялизиб бузутала, бузес бехIбихьибтала насихIятчи. Хизри цархIилти кьяйда белкунси гьунчивад вати­хьибси адам ахIен. Ил катругуни диркькадарили, мурхьти къадурби царугдарили, кьячIикIуни — ласбулхъуни дархьдарили ватихьибси поэт ва гIялим сай.
Юсупов Хизри ГIябдулмажидович акIубси сай Дахада­евла районна Хъярбукла шилизив, Юсупов ГIябдулмажидла ва Аминат ГIялиевала хъалибарглизив, 1956 ибил дусла августла 12-личив. 1963 ибил дуслизив Хизри Хъярбукла урга даражала школализи вякьун, 1974 ибил дуслизиб ил таманбариб. Назмурти лукIес Хиз­ри виштIали левалли ве­хIи­хьиб­сири. Хизрини бузерила тIем-тIягIям жявли дагьур. Бу­зерила цаибил гъарш каиб СССР-лизи кабурхуси Узбекистанна ССР-ла Бухарский областьла Минбулак бикIуси шилизиб, дудешличил варх узули. Ишав Хизри дудешличил узбекунас юртани дирули узиб. Ил лацла ва мегьла уста­ра сай.
БелчIудиличи гъаргъси Хизри 1975 ибил дуслизив ДГУ-ла филологический факультет­лизи керхур. ГIярмияли илала бел­чIуди къябаахъиб. 1976-1977-ибти дусмазиб Казаньнизиб ВатIайс къуллукъбариб. ГIярмиялизивад чарухъи гIергъи, 1983 ибил дуслизиб заочно ДГУ-ла филологический факультет таманбариб.
Заочно учIухIели, Хизри Хъяр­букла художественный ком­бинатлизив ялчили ва комбинатла бухгалтерли узиб. 1983-1986-ибти дусмазив Къаякентла районна ДейбукIла гехIел дусла школализив учительли 1986-1989-ибти дусмазив Дахадаевла районна Урцакила гехIел дусла школализив директорли узиб.
Хизри Юсупов 1989 ибил дуслизив хъалибаргличил Мя­хIячкъалализи гечиуб. 1989 ибил дуслизив заочно Киевлизибси Рыльскийла уличилси фольклорла аспирантурализи керхур. 1989-1994-ибти дусмазив даргала радиовещаниела жагьилтала передачала редакторли узиб. 1994-1995-ибти дусмазив «Вдохновение» предприя­тиела руководительли узиб. 1995-2000-ибти дусмазив «Дарго» — гIяхIбаркьла фондла руководительли узиб. 1995 ибил дуслизиб Х.Юсу­пов­ла «Гьуни» бикIуси назмуртала цаибил жуз дурабухъун.
1996 ибил дуслизиб «ГIям­рула някьиш», 1997 дусли­зиб М.А.МутIали­мов­ли­чил барх «Хъяр­букла шила тарих ва культура» бикIуси монография, (ил жуз белкIес 3 дус узиб, 1994-1997), 1998 дуслизиб «Дунъяла тIем», 2000-лизиб «АвкIапIи» жузи дурадухъун.
2000-2004-ибти дусмазив даргала радиовещаниела кор­респондентли, тилмажли, дикторли узиб. 2004-2007-ибти дусмазив Хизри Юсупов дарган мезличил дурабулхъуси жамигIятла-политикала «Гьалмагъдеш» журналла редакторли узиб. 1992 ибил дусличивад журналистунала Союзла, 2009-ибил дусличивад писательтала Союзла член сай. Илини гIурра гIяхIцад жузи дураиб. 2006-ибил дуслизиб Хизри ГIябдулмажидовичли «Дар­гантала гIядатунала поэзия» темаличил диссертация за­щи­титьбарили, филологический гIилмуртала кандидат ветаур.
Хизри ГIябдулмажидович 2008-дусла февральличивад вехIихьили иш­бар­хIи­личи бикайчи ХI.ЦIадасала уличилси мезла, литературала, искусствола ДНЦ РАН-ла инсти­тут­лизив гIилмула бекI­ли­виуб­сигъуна хIянчизарли узули сай.
2017 ибил дус — Москвализиб бетаурси Естествознаниела Россияла Академияла конференцияличив Хизри Юсупов гIилмула хIурматла докторли викIиб. 2018 ибил дуслизив ХI.ЦIадасала уличилси ИИЯЛ ДНЦ РАН-ла гIялимтала Советла членни викIиб. Сегъунси игьдибарал Хизричи бихьибси, сегъуна хIурматал илала барибси!
Хизри Юсуповли 70 гIил­му­лати хIянчурби делкIи сай. Илдала бухIнабуц, бяхIчибиз саби — гIилмула — хIя­лумцIнила бетуц. 12 назмуртала жузи дураили сай, цархIилтачил дарх 5 жуз дуракаили сай. Филологический гIилмуртала кандидат Хизри Юсуповли мекелли халаси гIилмуласи хIянчи бариб даргала лите­ра­турный мез ва илала бутIни лексикология ва лекси­ко­графика гьаладяхI ардукес, давлачердиахъес.Даргала лексика гьалабяхI арбукес, чебицIахъес 15 гIилмулати хIянчи делкIун студентунас, учительтас, преподавательтас, гIилмула хIянчизартас дагаладиэсти. Хизри Юсуповли бурес агарли халаси хIянчи бариб лексикографикализибра. Илис багъишладарибти 15 гIил­мула хIянчи делкIун, суненицун 5 словарь цаладяхъиб: урусла-даргала словарь (2005 д.); школабас урусла-даргала словарь (2009 д.); 3. Литературала терминтала словарь (2014 д.); дарган мезла орфографичес­кий словарь, ХIя­биб­ Кьурбановличил барх (2011 д.); дар­ган-урусла словарь, 40000 дев­личилси (2017 д.). Ишди сло­варьти цаладяхъес 10 дус узиб ил.
Хизрила хIянчурби поэ­ту­на­ни, писательтани, гIил­мур­тала кандидатунани, доктортани, журналистунани ахъли кьиматладарибтири. Илди гIяхIцад леб. ЦацабехIтала уми гьандуршис: ГIябдула ВяхIидов — писатель, литературовед, пагь­му­чевси литературный критик, гIилмуртала доктор, про­фессор. Илини Хизрила назмуртала жузас мурхьти кьима­туни дедили сай. Ибрагьим Ибрагьимов — учитель, журналист, писатель. Чула гIямруличила гьанбикуни лукIули сай. КIилалра гьалар-гьаларти белкIаначила гьанбуршули сай.
МутIалим МутIалимовли — сабухъчевси гIялим, фольк­лорист, поэт сайлин гапирули сай. Сегъунси сабухъчебси бузери сабил?! Сегъуна гьунар сабил гIилмуртала кандидат Хизрила?!
Студентунас-выпуск­ни­ку­нала квалификационный 50-60 бяхIла хIянчурбас рецензияби лукIули сай.
Хизри Юсупов халадеш агарси, гIядатласи, адамтас икьалабарес хIядурси гъабза сай. Илини сагали назмурти лукIес бехIбихьибтасра кумекбиру. Иличи дугьабилзан гьар журала сани­гIятла хIянчизарти, бучIанти, учительти, студентуни, преподавательти, гIилмула кандидатуни, доктортира балли, диссертация лукIанти. Хизри Юсуповла гьар шаликарси пагьмуличи адам тамашахIейэс хIейрар. Илис — журналист, поэт, публицист, литературовед, словарист (словарьти цаладирхъян), гIялим-лингвист, гIялим-лексикограф, гIялим-языковед, фольклорист, редактор, этнограф, художественный ва гIилмула дахъал жузала автор викIаслира хатIахIеркус.
Гьанна Хизри ГIябдул­ма­жидович филологический гIил­­муртала докторла у сархес узу­ли сай, иш темаличил «Дарга­ла литературала мез акIни, кадизни ва гьала­дяхI ардукьни». Гьардизаб хIела пикруми-кьа­са­ни.
Адамла кIелра хъуцIар­ли­чиб цаца малаик лебти саби бикIар. Белики, илди малаикунани икьалабирули бурги Хизрис. Адамтала бегIлара халаси хазна-бузери саби. ХIянчи чебетаахъили бирадли, ил (хIянчи) хIед гIергъи башар, чедихIяртли бирадли, хIезибад гьаббулхъан. Ил багьан­дан сари хIянчи Хизрис гIергъи дашути, ва илини чедетаахъили дирути. Ишдигъунти хIянчи гьатIира дахъал дирахъес Аллагь­ли хIед арадеш габ, Хизри, хIела хъалибаргличил арали ва разили калаби. Амин.