Сергокъалала ши­ли­зив хIерируси Ра­базанов Шамил Мя­хIям­мадович 2017 ибил дусла ахирличи бикайчи Но­во­российск шагьарлизиб гьа­­вала-десантникунала ди­визиялизиб къуллукъбирули калун. Хъули чарухъи гIергъи, 2018 ибил дуслизив, ил вягIда хIясибли, Абхазиялизирти Россияла Ярагъладарибти ЦIа­кьаназиб къуллукъбарес хьу­лу­хъун. Ишдусла март баз­ли­чиб, Украинализиб Россияла гIярмияли хасси балбуц дурабуркIухIелира Ш.Ра­база­новли Абхазиялизиб – раз­вед­батальоннизиб къул­лукъ­би­рулри.

— Улкала Президентли РФ-ла Ярагъладарибти ЦIакьанала бургъантачи ДНР-ла ва ЛНР-ла Украинала миллатчибани гуж-гужли дуцибти шагьуртала ва шимала мер-муса азаддалтахънила шайчибси, хасси балбуц дураберкIахъес хъарбарибхIели, ца шайчир калес нушала яхI-ламуслира кьабулхIебариб, — буриб Шамилли. – ИлкIун Россиялизив хIерируси гьарилла (ургъаннацунра ахIи) чебла саби, мурул адамла кабизалачебдешличи лайикьси, хIурматла ва гъабзадешла баркьуди саби.
Вархьли викIули кьалли Шамил?! Илван, жявли гъабзадешла хIялумцIес, сунезир гIякьлу ва адаб-хIяяла дурхъати къилликъунала лишанти лерти жагьилти дебшлабиубли, гьунарла баркьудиличи хIядуртили бетаурти багьадурти абилкьуси Дагъистанна ванзаличи нушани ишхIели уркIи-уркIилабад пахурбарес дирехlе. Гьайгьайрагу, МяхIяммад НурбяхIяндовла гьунарли ГIярасайлизиб машгьурбарибси Сергокъалала ванзаличиб халабаибтала лу­гIи­лизивадси Шамил Ра­ба­зановра Украинализи, гьу­нар­тачи гьуцIти, чIу­маси ур­кIила хьуланани ви­тIа­кIиб­сири. Хъулиб цунси нешра (илала дудеш, милицияла хIянчизар – МяхIяммад жявли гIямрулизивад шалгIевухъун), нешличи риштIахIейчирад хъарси (гьанна 32 дус риубси) чулахъ рузира ратурли, арякьунсири Шамил Украинализи.
— Мурул адам ВатIайс къиян­дикибхIели гьарли-мар­ли умутчевси къакъбяхъли виэс гIягIниси сай, — викIи Ша­мил, нуни сунези нешличи, рузичи хIеруди бирули хъу­лив сен кахIелунсири или хьар­баиб­хIели.
— Нуша поездла эшелонтачир Украинализирти ДНР-ла ва ЛНР-ла мер-мусаличи даира, — буриб Ш.Рабазановли. – БегI гьалар, ну сунезив ургъуси батальонни Донецк, гIур Луганск, илди-алавти шими, махьурби ва шагьурти Украинала миллатчибазирад акьудалтнила шайчирти хасти далдуцуназир бутIакьяндеш дариб. КIинайс, нуша Запорожьелизи детаайчи, гьаладяхI дашули калунра. Хаслира къияннири «Азов» ва «Айдар» бикIути Украинала миллатчибала батальонтала дявила устадешличи ункъли бяркъурти бургъантачи къаршидеш дирес. Душмантала шайчибад нушачи къаршили бургъутазир ца пулемётчица хьунул адам булан лерри.
«Гуляй поле» бикIуси мерличир, дахъал шими-махьурби лер­тири. Нушачи хъарбарибсири илабси, душмантани буцибси, илди дебабиубси мер азадбатахъес. ГьаладяхI дашули, нуша хабарагарли, душмай алавбуцибси мерличир къаршидикира. Нушачи хIярхIубала заб чекьур. Илав ну тупла хIярхIя чегили хъуцIарлизивад вяхъибсири. Иличи хIерхIеили, нуша гьаладяхI дашес, автоматуназирад душмантачи иртес даимдиублири.
Ну кIинайсра вяхъира, гарчкайубра. Илгъуна агиличивхlелира нуни бяхъибти юлдашуни, цаибси кумек гIеббаахъили, БТР-личи бикайчил хъусбирхъутири. Илкьяйдали, бархкьябазибад бяхъибти хIябал бургъан нуни БТР-личи баахъира. Нушани илаб хIябал Украинала гIярмияла бургъанра ясирбуцибтири. Дяхъилизирад дахъал хIи ардякьи, бекIлизи къагъдеш дашесдиибхIелицун, ну багьлали вашули БТР-личи ваира, бархкьябала икьайчил илала ухIна ацIира. БТР-личив ну гьаланачи авлахъла госпитальлизи укибсири, илаб тухтуртани цаибси кумек гIеббаахъили гIергъи, вертолётличив Севастополь шагьарлизибси дявила госпитальлизи арукира. Чумал бархIи илав каркьили калунра. КIинайс, самолётличив Москвализи арукили, Бурденкола уличилси дявиласи госпитальлизи каркьибсири. Илав гIяхIцадхIи сагъирули калунра. РФ-ла Президентличил гьуниваибхIели, илини нугъунти цархIилтала лугIилизив ВатIайс мардешличил къуллукъбарни багьандан, някъ цIацIабарили мубаракварира. В.Путинна някълизирад нуни «Гъабзадеш багьандан» ва «Александр Невскийла» уличилси медальти касибтири, РФ-ла командующийли дила у белкIунси дявила ярагъличил (маузерличил) шабагъатлаварибсири. Майла 9-личиб, Москвала Красная площадьличиб дурабуркIуси Чедибдешла парадличи живарибхIели, нуни В.Путинничил, Александровский анхълизибси, валхIелуси ургъанна хIябличи вавни кадихьибтири.
Шамил заманалис, Сергокъалализи отпускличи вакIибхIели, иличи гьав­ва­кIибси нуни юртлизибси хъалила ца гIямзи кабуцибти, илала чедибдешунала бикьрумили сарти да­хъал шабагъатуначи: кубокуначи, грамотабачи, дипломтачи, ме­даль­тачи пикри бяхIчихIеэс хIейубра. Илди-ургар лерри ав­томатлизивад лишайзи иртнила, някъ-някъли вирхIнила шайчив чемпион ветаънилис дедибтира.
Игитунили алкIути ахIен – бетарути саби. Гъабзадешла рухIлиуб уршилис адаблашалси бяркъ бедибти бегIтала – неш Зугьрала ва гьанна мицIирли агарси дудеш МяхIяммадла, уми улкала тарихлизир мургьила хатIличил делкIунтили кавлан. Шамилгъунти гIяхIгъубзнала гьунартани ахъбуцили, чебяхIбарибси нушала Дагъистан гIурра дунъяличиб машгьурбирниличи дирхес дирехIе.
Иш белкIла игитличи лайикьти дургар ишди дугьбира:
Улкализиб Дагъистан
Машгьурбарибси дарган,
ГIярасайла капарай
Гъазали сархул сартан.
 
Диги наб ахъбикIули
Дагъистайзиб хIела у,
Игъбарли гIеббурцули,
ХIела бегIтала наслу.
 
ХIушагъунта Неш-ВатIан
Ахъбирулра гьар бархIи,
Лебтас ванабикIесли,
Умул заклизиб Берхlи.
 ВатIайс марси къуллукъра
Игитласун бирути,
Улкала гьарил буйрухъ
Ункъли таманбирулра.
 
Дагъиста ванзаличиб
АлкIаб, Шамил, хIугъунти,
Имамла дурхъаси у,
ХIурматличил бихути. 
 
Ламуслара, яхIлара,
Гъабзадешлара къала,
ХIугъунти гIяхIгъубзнала
МягIдан саб Сергокъала.