ГIяхIси баркьудилисра, гьу­нар­лисра замана ва мер мурталра бируси саби. Илкьяйда бе­та­ру­ли саби ишбархIира. Бахъал саби Да­гъис­тан­на уршби ГIярасайла декIар-декIарти шагьуртазиб гъабзадешличил ва ла­мус­ли­чил хIурмат сархибти.

Дагъистаннизивадси гIяхIгъабза ургъан НурмяхIяммад ХIяжимяхIяммадовла гьунар нушаб гIибратли кавлан. Иличила халаси пахруличил бурибсири Россияла Президент В.Путинни.
Бахъал саби дарганти Россияла Игитла уличи лайикьбикибти. МяхIяммад НурбяхIяндовла гъабзадеш арагIебли ГIярасайлисра ва лебилра дунъялисра гIибратли бетаур. Донецкла ва Луганск­ла республикабазиб дурабуркIуси хасси бал­буцлизирра бахъал даргантани бу­тIа­кьяндеш дирули сари, илдала лугIи­ли­зиб — 20-цад цугланра леб, чулира асилдешличил къулукъбирути. Илдани ВатIа гьалабси чебла ламусличил ва гъабзадешличил ихъули саби. Илдала лугIилизив сай, бара гьалабван РФ-ла Президент В.Путинна ХIукмуличил, хасси балбуцлизир дакIударибти гъабзадеш багьандан, Жуковла уличилси медальличил шабагъатлаварибси Руслан Даудовра.
ЧебяхIси ВатIа, граждан ва Афганис­тан­на дургъбазибра гIяхIцад цугланти бургъули калунти саби. Мурталра гъабзадеш дакIудирули, урехиагардешличил бур­гъули, илдани хIила душман гIелавяхI ча­рирнила хIяракатлизи мекелли халаси пай кабихьиб.
БусягIятра Руслан Даудов хала бегIтани нушаб халаси къияйчил сархибси Чедибдеш калахъес ибси гьуцIли гьалавяхI вашахъули сай.
Руслан акIубси сай Ахъушала районна Цугнила шилизив. Илала дудеш БяхIмуд Даудов (сунела бунагь-хатIаличивад Аллагь чевверх) адамтас гIяхIдеш барес мурталра гьалакси, пергер дубурлан вири, сепайда, жявли гIямрулизивад шалгIевухъун. Неш Жавгьарат Даудова гIяхIцад дусмазир Цугнила урга даражала школализир математикала мугIяллимли ва директорла багьудила шайчирси заместительли рузули сари. ДурхIнас багьуди бедес халаси къайгъи дакIубируси пергер педагог, районна гьабкьяти мугIяллимтала лугIилизирадси сари.
Цугнила урга даражала школа таманаили гIергъи, Руслан сунела белчIуди даимбарес Дагъистанна шила хозяйствола академиялизи керхурсири, гIяхIти багьудлумачил илра таманаили, ВатIа гьалабси чебла ахъес арякьун.
Сунени къуллукъбируси Хабаровский крайла частьлизив ил мурталра гьабкьятала лугIилизив вири ва командованиела шайзирадти ХIурматла Грамотабачи лайикьирки. Ил сунечил барх къуллукъбирути солдатунас гIибратри. ГIярмиялизиб сунела чеблара хIурматличил ахъили, вягIдара бигьи, чячянтала Шали бикIуси шагьарлизив контрактник кьяйдали къуллукъбирули сай.
Февральла 24-личирад цархIилти бургъантачил варх илинира хасси балбуцлизир бутIакьяндеш дирулри. Кьяшлизивад вяхъили, Севастопольла дявила госпитальлизив калун. Илар дакIударибти гъабзадеш багьандан, ил командованиели чебяхIси шабагъатличи гьалаихьиб.
Дирхулра, Руслангъунти гIяхIгъубзни Дагъистаннизиб гIуррара лебниличи.