Мезла гIилму, кабиз, грамматика руркъуси адам сай филолог. Нушала дарганти-ургабра леб мезла гIилму руркъути гIялимти. Илди саби Муса Расулович БяхIяммадов, ХIясанова Узлипат ГIусмановна, Кьурбанова Муъминат МяхIяммадовна, МутIалов Расул ГIусманович, ХIябибуллаева ПатIимат ХIябибуллаевна ва цархIилтира. Гьар бархIи жура-журала сборникуназир дурадулхъули сари илдала макьалаби, гIилмула шайчирти хIянчурби.
Наб бурес дигулра мезлизир рузуси, ДГУ-ла филологияла факультетла Дагъистанна мезанала кафедрала доцент, филологияла гIилмуртала кандидат Кьурбанова Муъминат МяхIяммадовначила. Ил пергер, малхIямти хIял-тIабигIятла, бузерилизир сарерхурси, хIянчизартачил ралгунси адам сари. Университетлизир ручIухIели, илини набра дурсри кадирхьутири.
Муъминат МяхIяммадовна акIубси сари декабрьла 24-личир 1954 ибил дуслизир Сергокъалала районна Миглакьасимахьилизир. Ил кIиибил класслизир ручIухIели, хъалибарглис Сергокъалализи гечбиэс чебуркъубсири. Илаб риштIаси рурсили белчIуди даимбариб. ГехIел класс тамандарили гIергъи, районнизибси педучилищелизи карерхурсири. 1975 ибил дуслизир белчIуди хъараахъурли, МяхIячкъалализи гечриубли, ил хъали-цIализи ахъибсири.
1983 ибил дуслизир Муъминат МяхIяммадовна ДГУ-ла филологияла факультетла урусла-дагъистанна отделениелизи карерхурсири. Илаб гIяхIси багьуди касили, 1996 ибил дуслизир Дагъистанна мезанала кафедрализир кIел дус лаборантла хIянчи бузахъули калун. КIинайс кафедрала заведующий, филологияла гIилмуртала доктор, профессор Мусаев МяхIяммадсягIид Мусаевичла бекIдешлиур гIилмула хIянчи балкьаахъес рузули калунсири. 2008-ибил дуслизиб ил хIянчила чебкадси защита барили, филологияла гIилмуртала кандидат ретаур.
Арбякьунси жумягIлизиб Муъминат МяхIяммадовначил ихтилатра бетаур.
— Чумъибил дуслизир рехIрихьибсири преподавательла хIянчи бузахъес?
— 2008–ибил дусличирад ишар рузусира.
— Мез руркъути гIилмула хIянчизарти гьар бархIи чекабизурли бузути саби. Сегъунти хIянчурби дурадухъи хIела гIергъити дусмазир?
— Нушала кафедрали «Вопросы Кавказского языкознания» бикIуси журнал дурайуси саби. Гьар дурабулхъуси номерлизир дила статьяби лер. Ил сборникла редколлегияла члентала кьукьялизира карурхусира ну.
Дузули лералли, илди лукIес, мез руркъес нушаб хIяжатси саби. Дурадухъунти макьалабала лугIилизир лер: «Лингвистическая терминология даргинского языка» (монография); «Лексико-семантическая характеристика компаративных фразеологических единиц»; «Краткий словарь лингвистических терминов даргинского языка».
Илдицун ахIенну, дахъал лер М.Кьурбановала гIилмула хIянчурби. Лерилра ишар гьандушесра хIейрар.
Муъминат МяхIяммадовна, хIу ва лебилра филологуни байрамличил мубаракдирулрая. ГьатIира багьудлуми мурхьдикIули, гIилмулизир гьаладяхI дашули калабая! ЧIумаси арадеш ва хъалибарглизиб талихI дулгулра.