Чинаб-биалра дубурла шимазибадти уршбани мурталра гъабзадешла баркьудлуми дурадуркIути сари. Бурули бираргу, къияндикибхIели балуси саби гIяхIгъабзала хIял или. Илкьяйдали багьадуртала хIял багьес имканбакIиб ишди бурхIназир Украинализир хасти далдуцуни дурадуркIухIелира. Сунечи хъарбарибси ункъли таманбируси ургъан Дахадаевла районна Зубанчила шилизивадси Зугьраб ГIялиев «Дявила анцIбукьуназив декIарухъни багьандан» ибси медальличил шабагъатлаварили сай ишди бурхIназив.
Зугьраб ГIялиев, сай акIубси шилизиб урга даражала багьуди касили гIергъи, Саратовлизибси РФ-ла МВД-ла духIнарти къуллукъунала гIяскуртала институтлизи керхурсири. Иличи отделениела командирла, взводла командирла заместительла къуллукъуни хъардарибтири.
Школализив ва институтлизив учIухIели, илини жигарла бутIакьяндеш дирутири спортла декIар-декIарти абзаназир. Институтлизив учIухIели ил азадли мушулвашнила шайчиб спортла мастердешлизи кандидат ветаур.
Институтлизиб белчIуди хъараахъурли гIергъи, учебный батальонна взводла командир варили, къуллукъ даимбарахъес багьандан Дальневосточный дявила округлизи вархьибсири ил.
2013 ибил дусличивадли 2015 ибил дусличи бикайчи учебная ротала командир сайри, 2015 ибил дусличивадли 2017 ибил дусличи бикайчи Дальневосточный дявила округла ДухIнарти гIяскуртала учебный центрла начальник сайри. 2017 ибил дусла декабрьличивадли ишбархIиличи бикайчи Хабаровск шагьарла Миллатла гвардияла дявила частьла командирла 1-ибил заместитель сай.
Зугьрабли гIибратличил къуллукъбирниличил барх спортлизирра сархибдешуни дирахъули сай. Ил Хабаровскла крайла федеральный округла ММА-ла шайчив хIяйна чемпион ветаурли сай.
«Выпускник – школала пахру» ибси проект гIямрулизиб дурабуркIули, ил учIули калунси школали Зугьрабличила материал цалабяхъиб ва школала жаняхIлизиб стенд балкьаахъурли саби.
ИшбархIи Зугьраб ГIялиевли Донбасслизибти даршути халкь балтахънила баркьудила шайчибси хасси балбуцлизир бутIакьяндеш дирули сай. Иличи хъулиб хIерли саби бегIти, хьунул ва урши.
