«Творчествола кеп кайсуси адамлис цархIил лазат лебси ахIен». А.Чехов.

Художник – гьан­на­ла заманала ис­кус­­стволизи ахъиб­­си, суратуначи хIер­би­кIутала уркI­бачи асарбарес ба­жар­ди­иркуси адам сай. Гьаннала за­манала худож­ник­ли, де­кIар-декIарти тяхIяр-кьяй­да­ пай­даладарили, че­рикI­ла­ се­кIулти алкIахъули вирар, ца­­ца­­хIели нушани хIер­гъу­ти ва анцI­дукьестиван ка­дил­зу­­ти. Амма, илгъуна та­ма­шала сурат чебаибхIели, дахъ­хIи хIер­дикIули, «илизиб се са­бил леб» или пик­ри­дул­хъули ди­рехIе.
Гьаннала заманала искус­стволи художестволашал хIя­кьи­кьат сипатбирули саби. Ду­русли буралли, нушала хIя­кьи­кьат художникли сунела су­ратуназиб чебиахъули саби. Гьарил художник сунела пик­руми-хIерани аргъахъес, цар­хIилтани хIебарибси, се-биалра сагаси секIал акIахъес къайгъилизив вирар. Художникли адамла кьаркьайзир ка­диркути хIяланачила мурхьли иргъуцад, илцадла халаси асар­ра биру. ХIера, адамтачи асар­барес бажардирикибси ху­­дожник Нурсиятличила саби иш белкIра.
ХIясанова Нурсият Шамиловна акIубси сари 1987 ибил дусла декабрьла 10-личир, Лавашала районна Кьакьамахьилизир. Шила школа таманбарили гIергъи, ДГПУ-лизи карерхур ва технолог-экономистла са­нигIят касиб.
Казахстаннизир гьундури ва гумурби лушнила компаниялизир бухгалтерли рузули калун. БусягIятла замана Нурсият МяхIячкъалализибси «ВатIан» ОАНО-ла школализир технологияла ва сурат бирнила дурсри кадирхьули, рузули сари. Илкьяйдали «Гьаннала заманала художник» ва «Пагьмуртала зурхIяб» бикIути кружокунира, дурхIнас ва школала мугIяллимтас декIар-декIарти устадешла дурсрира дурадуркIули дирар.
Дагъистанна гуманитарный институтлизиб сурат бир­нила искусствола препода­вательти руркъуси курс таманбариб. 2020-ибил дусличирад А.Акберовала «Арт Лаб» би­кIуси школализир ручIули, ба­гьуд­луми чедирцIахъули сари.
Гьайгьайрагу, дубурланти рухIла давлаличибли, халати дагьриличибли, бузери дигахъниличибли цархIилтазибад де­кIарбулхъути саби. Илдани ди­ра­хъути сархибдешунани Дубуртар Улка, Россиялизибцунра ахIи, арагIебли дунъяличибра машгьурбирули саби. Буралли, дяхIимцIала кьисбарили дакIахъибти бутIназирад ва дурхъати къаркъуби (фианит, горный хрусталь, сваровские камни) пайдаладарили суратуни дируси адам Дагъистаннизив гьанналис виубси ахIенри. Нурсият ХIясанова республикализир илдигъунти суратунала цаибси автор ретаур. Нурсиятли къугъати суратуни, адам хIяйраниэсти пергер секIулти алкIахъули сари.
Н.ХIясановани 2021 ибил дуслизиб Москвализиб бе­тер­хурси «Россияла искусст­во­бала жумягI» бикIуси халкьани-ургабси фестивальличир бутIа­кьяндеш дариб ва «Авангард­ное искусство» кон­курсла «Экс­­прессионизм» но­­минация­лизиб цаибил мер бу­циб. Илини фестивальличир декIар-де­кIарти темабала хIян­чурби гьа­ла­дихьилри.
Сар­хибдешуни дирахъути даргантачи пахрубируси нуни иличил бархбас кабиза­хъурра ва камси ихтилат дура­­беркIира. Ил сунечила гап­хIе­ри­кIуси, сунела багьудлуми дурхIназир тIинтIдирули рузуси адам риъни аргъира.
— Дурхъати къаркъуби ва дяхIимцIа бутIни пайдаладарили, суратуни дирахъес сели хьулрухъахъунри? ибси дила суайс – Нуни декIар-декIарти суратуни дирутири ва гьанналауб хIебиубси секIал акIахъес даим пикририкIусири. Ярмаркабачир художникунала хIянчурби чедиухIели, сагаси секIал акIахъес гъирачеррарира ва дурхъати къаркъубачилти суратуни дирес рехIрихьира или жаваб чарбатур илини.
Суратуни дирухIели, къаркъа кьисбирнила техника пайда­лабирули сари Нурсиятли. Гьачамлис илала суратуни сунела гъамтани ва барх бузутани сари исути. Челябкьлализир республикала дурабти адамтанира илди тIалабдирниличи дирхехIе. Нурсиятлис гIуррара дахъал сархибдешуни, чIумаси арадеш, гIямрулизиб талихI дулгулра. ХIела суратунани дагъистанлантала ва россиялантала хъулри жагадираб!