ХӀи дедлуган (донор) латинский мезла дев саби, суненира «пешкешбирни» ибси мягӀна иргъахъуси. Марлира, донортани хӀи дедлугули, цархӀилти адамтас гIямру пешкешдирули сари. Пикридухъенаягу, сецад жан мяхӀкамдарилил, гӀягӀнихӀели, пайдаладарес лерти донортала хӀили!
Дебали гӀяхӀси саби гьар дус апрельла 20-личиб хIи дедлуганна БархӀи дурабуркIнира. Байрамла тарихлизи халтIухъалли, чебиули саби: 1832 ибил дусла апрельла 20-личиб Петербургла жагьси акушер Андрей Мартынович Вольфли виштӀаси варкьибси хьунул адамла гӀямру дерцахъиб. Ил хьунул адамла хӀи дура ардашулри, амма Андрейли, илис мура хӀи картӀили, рерцахъиб.

Гьаннала заманара гьар бархӀи миллионти адамти мицӀирли кавлули саби, хӀи дедлугантала кумекличибли. Илдазивад цали ветаур меусишан Тахсурман ГIяхIмадхановра, сайра нушала Дубуртар Улкализи гIяхIладли бакIибтази (туристунази) жагати мер-муса чедиахъули, машиналичив узуси.
Тахсурманни буриливан, илини гьанна гIяхIцадла замана хӀи дедлугули сай: «КӀел-хӀябал базли гьачам хIи дедлугулра. ЦацахӀели камли дедесра чевкъули бирар, рахли замана убхӀебухъалли. Сен-биалра чекайзурли илди заманаличир дедлугес кьасбирулра. Дила пикрили, илкьяйда нуни вирусицад кумекбирулра тухтуртас адамтала гӀямру мяхӀкамдарахъес. Ну тухтур ахӀенра, амма рахли илкьяйда тухтуртас багалавиэс вирули гIергъи, сен гIебхIебиахъуси ил кумек?»
Бархьси саби, адамтала гӀямру дерцахъес кумекбарес дирули диахӀелли, сен хӀебируси? Нушазибад халаси-декIар хӀянчи гӀягӀнили ахӀенгу, бекIлибиубси — хӀи дедлугуси станциялизи укьни.
ИмцӀаливан дила дугьабиз жагьилтачи саби: хӀушала ахъри лебли биалли, мурталра кумекбиреная. Чили бала, белики, хӀушала хӀили хӀушала юлдаш, тухум верцахъес кумекбарес.