ЧебяхIси ВатIа дергъ таманбиубхIейчирад 77 дус дикнилис хасбарибси «Гьанбикунала анхъ» бикIуси балбуц гIеббуциб даргала районтанира.
***
Хайдакьла районна администрацияла, культурала, багьудила, арадеш мяхIкамбирнила учреждениебала хIянчизартани, школабала бучIантани ва саби гIяхIъулатала кьукьнани, балбуцла дазурбазиб, дебали халаси хIянчи дураберкIиб. ЖамигIятла мер-мусаличи илдани 120-личирра имцIали галга удатур.
Иличи че, шимазибти адамтани ва школабала бучIантани чула мер-мусаличир гIинцла, хъярла, бягIлила, махъла ва хурла галгуби удатур, дявила авлахъличибад чархIебиубти дудешунас ва хала дудешунас хасдарили.
«Чедибдешла БархIи гъамбикIухIели, нушала улкализир гьар дус ил бархIилис хасдарили дахъал галгуби удалтути сари. Школабала бучIантанира илизир бутIакьяндеш дирни дебали дигесли саби. СенахIенну, чула тарих хIебалути дурхIнас гIямрулизиб мер баргесра къиянни бирар. Ил багьандан, нушанира гьар дус ил акция гIеббурцули ва жигарла бутIакьяндеш дирули дирехIе», — викIи районти-ургабси Мажалисла школа-интернатла директор Кьасум НухIкьадиев.
***
Дахадаевла районнизибра балбуц гIеббуциб багьудила лерилра учреждениебани, сунелара дазурбазир декIар-декIарти шимазир 500-цад галга удатурси.
«Жагьилтас чула тарих балес чебиркур. Чебиуливан, балбуцлизир илдани жигарчерли бутIакьяндешра дирули сари», — рикIи районна бекIла заместитель А.ГIябдуллаева.
Цаибти галгуби удатур Меусишала, Трисанчила, Сагаси Уркарахъла, Шаласила, Морскоела шимазир.
***
Ахъушала районнизибра ил балбуц жигарчебли бетурхули саби. МухIела шантира «Гьанбикунала анхъ» балбуцличи бархбикиб.
«Шантани чула сурсатунас галгубала 200 мархIя ва илди алавдуцес хIяжатти секIал асиб. Илди 2100 кв.метрла чIябарличи удатур. Илкьяйдали, МухIела шилизи аркьуси гьунила дубла Сергокъалала вацIала хозяйстволи гьаладихьибти ясеньна 120 мархIя ва Дербент шагьарла «Анжелика» агрохолдингли дедибти павловнияла 70 мархIя удатур», — буриб МухIела шила бекI Ислам Муртазаевли.
Илдигъунти далдуцуни районна цархIилти шимазирра детурхар.
