Нушала улкаличи къаршити Западли дурадур­кIути дал­ду­цунала (санкциябала) за­мана хIукуматла органтани хайри лугуси бузери (бизнес и пред­принимательство) гIеб­бу­­цес пикрибарили Россияла Пра­вительстволи дахъал хIук­мурти кьабулдирули сари.

Хайри лугуси бузерилис хIукуматла органтани сегъуна кумек гIеббурцулил тIинтIли буриб гьалабван «Дагъистан» РИА-лизиб бетерхурси конференцияличиб.
Иличир ДР-ла инвестициябала ва баркьудила адамти гIеббурцуси Агентстволис гьуни чебиахъуси ХIяжимурад Абашиловли, баркьудила адамтала ихтиюрти далтахънилизив узуси Мурад ТIалхIятовли, Дагъистан Республикала Халкьла Собраниела экономикала, инвестициябала, баркьудила адамтала Комитетла председатель Сефер ГIялиевли, адамти жагабирнилизир дузути предприятиебала Ассоциациялис гьуни чебиахъуси Амрина ГIябдуряхIмановани бутIакьяндеш дариб.
Балбуц къелгIеббикулри Да­­­гъистан РИА-ла бекI редактор М.МяхIям­ма­дов­ли.
«Бизнеслизиб бузути адамти, чучи халати жавабкардеш чесибти адамти саби, илдани чули бируси хIянчилис, сархуси хайрилис, чучиб бузути адамтала хIянчила меранас ва алапалис жавабкардеш дихути сари. Къиянси замана илдала бузерилизирра далагардешуни алкIан, ил багьандан гьарра шайчибад илди гIеббуцес гIягIнили саби», — цабутIаван буриб Мурад ТIалхIятовли.
Лерилра цаван Западла улкни, нушала улкаличи къаршили кадизурхIели, лерти дархдасуни дехъубхIели, улкала экономикалис гьамадли хIебирар, амма исуси мерличи дирцути секIал сеналра ляркьян. Компьютерти, машинаби, дурхъати ваяхI агарли, яхIбарес дирехIе, беркес кьацI биалли, гьар бархIи гIягIниси саби. Берк-бержличил улка урехиагарли гIеббуцили саби. Шила хозяйстволизиб бузути баркьудила адамти гIеббуцес багьандан Россияла Правительстволи гьарра шайчирад лайикьти шуртIри алкIахъули сари», — буриб Сефер ГIялиевли сунела гъайлизиб.
Цалабикибтала ургар ибкьси агила манзиллизиб эко­­но­микалис кумекбарес багьан­дан далдуцес чараагарти тя­хIур­тачила гъай детаур: хайри лугуси бузерилизиб бузути адамтачи ва предприятиебачи, дус кабикайчи чехIеруди бузахъути органтазиб ахтардлуми­ дурадеркIес ихтияр агара, ил­ди адамтала арадешличи къяч­хIедилкули диалли. Илкьяйдали сурсатунала шайчибра баркьудила адамти гIеббуцили бирар, камси процентличил гIе­гу­дилис (кредитлис) арц де­кIар­ди­ру.
ДяхIчиаибти санкциябала асар, гьаланачи гьанбиркуливан урехиласили убхIебухъун. Ибкьти аги-кьяйдаличил дарх, са­гати имкантира гьаргдирули са­ри. Илдигъунти пикруми дурулри брифингличиб гъай­би­кIу­тани.
Инвестициябала ва баркьудила адамти ­гIеббур­цу­си­ Агентстволи акIахъубли «Центр-мой бизнес» би­кIуси ка­биз леб. Илаб баркьудила адамтачил иргъахънила хIянчи ду­ра­буркIули саби, хIукуматли хайри лугуси бузерилис кадизахъурти кункдешуначила бурули саби.
Ил центр Гагаринна кьакьализиб 120-ибил юртлизиб мерлабиубли саби, телефон 8(800)700 99 00. Гьалабихьибси номерличи зянкъдяхъили, яра саби лебси мерличи гьаввакIили, чедаахъибти кункдешуначила багьес вирар.