Гьаларван «Дахадаевла район» МО-ла спортла стадионничир школала гIямрула дурхIнала футболла абзани дурадеркIиб. Илар бутIакьяндеш дариб районна гIяхIцад школабани: илди сабри 5-8-ибти классунала дурхIни.
Абзани дурадеркIилри «Школабазиб футбол гIеббуцни» бикIуси ДР-ла проект хIясибли.
Жигарла бутIакьяндеш дариб ва гьаларти мерани сархиб КIишала ХI.Сулайбановла уличилси школала никIа спортсментани. Жюрили каибти баянти хIясибли:
5-7-ибти классунала командабани 1-ибти мерани сархиб, 6-ибил классла команда 3-ибил мерличи лайикьбикиб. Илди районна руководствола шайзибад ХIурматла Грамотабачил шабагъатлабариб.
Футболла командаби хIядурдарес чула цIакьани ахIерахIедариб физкультурала дурсри кадирхьути МяхIяммадхIяжи МяхIяммадовли (ОБЖ-ла руководитель) ва Рабазан МяхIяммадовли (школала директор). ДурхIнала устадеш ахъдуцести маслигIятуни гьаладихьиб КIишала дахъал шалубар гимназияла физкультурала мугIяллимти Абубакар МяхIяммадовли ва ХIяжи БяхIяммадовли.
— Хаслира наб гапбарес дигахъира 5-ибил классла футболистуни Мурад МяхIяммадов, Закариге БяхIяммадгIялиев, ГIяхIмад МяхIяммадов, — викIи М-ХI.МяхIяммадов. – Илдани устадеш чедаахъибтира ца ити ахIенри, сенахIенну ил гьар бархIила къиян сабри. Каникултала манзилра илди гьаман школала майдайчиб камхIебири, учительра живарили, футболла хIязани думжахъи.
— Дила уркIи разибариб 7-ибил классла футболистуни МяхIяммадбяй ЯхIъяевли ва ТIагьир ГIяхIмадовли. Футболла хIязлизир дузахъути уюнти илдани устадешличил чедаахъиб. Илала дурабадра, илдани цахIнаб команда бетаахъесра, илар бутIакьяндеш дарести дурхIни декIарбаресра бажардибикиб. Ну вирхулра фотболличи дурхIнала гъира гьатIира бугабикIниличи, — сунела пикри буриб Р.МяхIяммадовлира.
ИшбархIи чедибдеш сархибти командаби ДР-лизир гъамли детурхути футболла абзаначи хIядурдикIули сари.
