Буркьа секIайзибад сагаси би­рес – урхI­мешуахIенси ­кьис­ла­ уста, дубурла ши­ли­зи­вадси Мя­хIям­­­мад­шарип Кьур­бановла бегIлара ди­гуси санигIят саби. Тамашала, сай-саял бур­сивиубси кьисла устали гьарли-марли жа­гати секIал дирули, сай-вегIси музей абхьес хьуликIули сай.

Цаличи ца цIапIакунти хъулрачилси, дубурла буркьа шилизибси МяхIям­мад­ша­рипла хъали, ванзала чIябарличилси гьаргаларти пергер утни хIясибли гьамадли багьес вирар. МяхIяммадшарип – някъла уста сай, илини гьаларла ваяхIра дурчу. ГIядатла секIайзирад илини сунени пикридарибти тамашала хъа ваяхI детарахъу. ГIе, пикридиру, сенкIун гьариллизиб сунела мягIна бирар. Дуркьдиубти секIайзирад илини ишбархIила манзилличи далдикибти, жагати матяхI хIядурдирули сай.
Сунела хIянчилизир гIягI­ни­диркути секIал илини шилизирти дуркьдиубти юртаназир дургу, яра чили-биалра илала устадешличила балули, гьар-урла ваяхI илис савгъатдирули, дирцулира бирар. Илини кьисла устала багьуди касибси ахIен, барес гIягIниси ваяхIличила пикруми илала бекIлизир сари-сарил алкIути сари.
МяхIяммадшарип акIубси сай Усишав, гIядатла хъалибарглизив. Сунела хьунул Хамисличил берхъибси хъалибарг абикьур – урегал биштIати: урши ва шел рурси, илдачибад акIубтира 17 леб. Илди гьанна Дагъистанна дураб хIербирути саби.
МяхIяммадшарипра Хамисра биалли, даршани дусмазиб тIашси хала бегIтала хъу­либ хIербирули саби. Илар­ти лерил секIал гьалабла­ заманаличила гъайдикIули са­­ри: делкунти къаркъала ганзухъуни, урца бурхлиу убяхъибси тIал ва цархIилти ваяхI. МяхIяммадшарип дахъал дусмазив Волгоградла областьлизив букIунни узули калун. ИтхIели сабри илизиб ваяхI дурчес иштяхI акIубсира. Итарти мераначирад илини даргибти, ЧебяхIси ВатIа дергъла калунти тупала бургIлуми хибтири. Илди гьанна хъа ваяхIличи шур­датурли, пайдаладирули сари.
Илала дурабад МяхIям­мад­шарипла гьар-урла ваяхIла халаси коллекция цалабикили саби, мисаллис, сабигъуна агарси някъли белкIунси гIярабла морфологияла жуз, ил 150 дус биубси саби. Илала някъбазиб кьалтинти душнилизиб пайдалабируси гIягIниахъала леб. Устали гьарил ваяхIличила тIинтIли бурес вирар. Илини лебил шира, гьарил хъалира гIяхIил бала. Мар саби, гьанна бахъалгъунти адамти кункдешунагIиб ум­цIу­ли, шагьарлизи арбашули саби.
Сунела хIянчурби МяхIям­мад­шарипли савгъатдирули ва выставкаличи кадихьесра далтули вирар. Илала хьул леб, челябкьлализиб гьарли-марси устахана тIашбатес ва хъулиб музей абхьес, бегIла гIяхIси мерличи, баягъи сунела утнира кадихьили.