ГIямрулизир та­ма­шала анцI­бу­кьуни ка­диркули дирар.

Гьанбиркур наб «Ермоловла хинкIи» бикIуси макьала. Или­зиб дила шан, гьанна нуша­чил агарси Рабадан Гъуруев Мол­давиялизив гIярмиялизив ви­рухIели,командирли хIерейс хин­кIачи тIалабварили сай. ХIе­рикIалли, тяп сунела нешли дирутигъунти хинкIи: берубси диъ, анкIила хинкIи, битибси жерши.
— Тяп нушалагъунти сари, — викIули сай Рабадан.
Хъа вегI дукаряхIили, ишгъуна хабар бурили сай:
— Ну, жагьси лейтенантли вирухIели, Дагъистаннизи, буралли Буйнакъск шагьарлизи къуллукъбарахъес вархьибсири. ГIебшни частьлис картошка хIядурдарахъес Ахъушала районна Тельманна уличилси колхозлизи вякьунсири. Колхозла бухгалтер ГIябдулла Гъуруевли хIерейс кьацIли укахъес жиирули вираси. ХIела нешли, Рабадан, даим ишдигъунти хинкIи дирутири. ДурхIнасра дебали дигахъутири.
Иличи мешуси анцIбукь бе­та­урхIели гьанбушибсири икI белкI.
Дила унраличив хIерирули сай кIел уршила дудеш, Ра­ба­дан­хIяжи бикIуси ца пергер жа­гьил адам. Някълизиб ка­гъар­личил ца бархIи ил набчи гъа­миубли, викIули сай:
— Муса МяхIяммадович, хIела Брянск шагьарлизив валуси адам теву?
—Брянск, Брянск…, гIе, тев ца урус урши.
— Ма гьари, иш кагъар бел­чIен.
— Се кагъар саби?
— Брянсклизи контракт­никли арякьунси дила урши ГIя­лила кагъар саби, белчIен.
«Дудеш, ца бархIи набчил та­машала анцIбукь бетаур. Нушала часть цархIил мерличи ар­кули, гьунчирри. Нушаб шин гIягI­нидикиб. Гьунила дублабси ца юртлизи вякьунра. Гьести гIям­рула мурул адам дураухъун.
— Се хIяжатли, урши?
— Нушала шин кадерхурли вакIибсира.
— ГIяхIси барилри. Чинавадсири хIу?
— Ну Дагъистаннизивадси сайра.
— Дагъистан, Дагъистан… — илини се сабрил гьанбиркахъулри. — Дагъистаннизив дила гIяхIси тяниш тевси сай.
—Район баладу?
—Ахушинский, село Капши­ма.
— Белики, Акушинский, село Гапшима?
— ГIе, гIе, тяп ил саби.
—Чи бикIара?
— Муса МяхIяммадов.
— Тамаша. Ил дила унра сай, тухумра.
— ХIебиалли, ишди фа­шис­туни-нацистуни бекI­ба­рили, хъули чарухъунхIели, дила ду­цIар­ти саламти дура. Савгъат бур­хьасигу, ил хIед бекI­мах­булхъан.
— ХIед чи бикIара? — шинни бицIибси канистр ахъбурцули хьарбиулра.
— Наб Александр Шабунин бикIар. Нуша Москвализир тянишдиубтира».
— Валусив? — хьарбиули сай РабаданхIяжини.
— Нуша гьарил байрамлис цали ца мубаракдирули зянкъдикIутирагу.
Рахли хIед иличи зянкъдяхъес дигадли, хIера иш Александрла телефонна номер. Иличила хабар нуни хIези кIинайс къаршидикибхIели бурис.
АлхIят бархIи гумайла кадиили лерли, дила чеасла гьанбикиб. РабаданхIяжи, хIези Шабунинничила бурес чеасибсири. Нуша къаршидикибтири Москвализибси Гельмгольцла уличилси больницализир. Ихтилатлизиб сенрил дила нешла — Марьям ибси у бикьулра.
— Дила хала нешлисра Марьям бикIусири.
— Сен-сен, хIу урус, хIушала «Марьям» ирули хIебираргу, «Мария» — бикIули бирар.
— Дила хала дудеш ингушкачи хъайчикайибси уили сай. Ну виштIахIели, илини суннатлаварибсири. ГIур ну дудешла нешличи арукибхIели, илини набчил христиантала тIалабуни ду­радеркIили, михъирличи къанч чебяхIкахъили сари. Итил дунъяличиб се бирарал… — викIули сай Александр Шабунин.
— Уршили гIур се лукIули?
— Се лукIуси? Дявила авлахъличив ахIен, илавад гьарахълира ахIен. ГIягIнидеш би­алли, нуша хIядуртира или лу­кIули сай. Аллагьли бихIяб саби…