Хайдакьла районна чедирти классунала бучIантала библио­тека­лизиб Багьудила Дуслис хасбарибси «Наследие кай­тагс­ких авторов» бикIуси тема хIясибли литературный экс­курс дураберкIиб.

Балбуцла сиптакартили бе­таур: Ма­­жалисла школала дар­ган мезла ва ли­тературала му­гIяллим, районна биб­ли­отекала гьаркьяси методист Ж.Мя­хIям­мадова ва библиотекарь З.ЖягI­парова.
Балбуц ибхьули гъайухъунси ГIяли Пашаевли урусла писатель, Россияла гIилмула педагогикалис хьулчи кабихьибси К.Ушинскийла гъай гьан­дикахъиб: «Мез — халкьла рухI­ла давла. ВегIла мез мяхI­кам­дарни, илдала хIур­мат­бирни — миллатла ва гьарил адам­ла чебла».
БегI гьалар дураибти тя­хIяр­­ли мез калахъни гьарил биб­­лиотекала чебла саби или буриб ГI.ГIябдуразизовани. «1990 ибил дусла майла 5-личиб районна библиотекализиб «Род­ники Кайтага» бикIуси ли­те­ратурала цалабяхъ акIа­хъуб­сири. Ила каберхур Хайдакьла бахъал поэтуни ва писательти. ИшбархIила манзиллизир илдала назмуртала кIел цахI­нар­ти сборник дурадухъи сари. Ли­те­ратурала цалабяхъла заседаниеличи, чула шантала пагьмуртачил тянишбиахъес, школабала бучIанти жибирути саби», — буриб илинира.
Хайдакьла районна бахъал писательтачила ва поэтуначила чебетаахъилира буриб балбуцличиб.
Цаванзалан, Шилагьи шилизирадси ДГУ-ла дагъистанна мезанала кафедрала про­фессор, филологияла гIилмуртала доктор ХIясанова Узлипат ГIусмановнани халаси пай кабирхьули сари хайдакьлантала гьаб-убла культура ва белкIагарти мез калахънилизи. 20-ибти даршдусмала бехI­бихьудлизиб сунела литературала хIянчи бехI­бихьиб Адам МуртузагIялиевли, Мя­хIям­­­мад АмиргIялиевли, Сул­тIан­мурад Зу­багIировли. Хайдакьла литература гьа­лабяхI арбикнилизи халаси пай кабихьиб Россияла журналистунала Союзла член, ДР-ла культурала хIурматла хIян­чизар, ДАССР-ла хIурматла му­гIяллим ва дахъал жузала автор МяхIяммад Герейхановли.
90 ибти дусмала Дагъистанна прозализиб ва поэзиялизиб бахъал нушала цаванзаланти къаршибиркули саби: Россияла журналистунала Союз­ла член, ДР-ла культурала хIурматла хIянчизар, Кар­та­лайла шилизивадси Агаси Ибиев, Жавгъатла шилизирадси Россияла писательтала Союзла член Хадижат ХIя­би­бова, Зубай­дат ХIясанова – ГъярацIала ши, Арсланбек Ал­­жанбеков – Жавгъатла ши ва цархIилтира», — буриб балбуцла сиптакартани.
Балбуцличи цалабикибта­с ва районна библиотекалис су­нела жузи савгъатдариб С.ГIяб­дул­керимовани. ВегI­ла мез, илдала давла хIедалуси адам­ли нешла мезла жагадеш иргъ­­­хIергъу илира гьанбушиб или­ни.