ДР-ла урибси учитель, Россияла писательтала ва журналистунала союзунала член Ибрагьим Ибрагьимов бахъал бучIантани валуси сай.
И.Ибрагьимов ахъси даражала педагог-сагакьянчи сай. Илини даргала литературала дурсрачир урусла литературализирад мисалти садикути сари, школала программализи кахIедерхурти жузи дархли дучIахъути сари. УрхIмешуахIенси мугIяллим Ибрагьим БяхIяммадовичли имцIаси сунела замана дурхIни руркънилис харжбирули сай, илдазир адуцала ва адаб-хIяя адилкьули сай. Дахъал дусмазив классла руководительли узуси учительли гIяхIцад духути, къайгъичебти, ВатIайчи дигичебти уршби ва рурсби бяркъурти саби.
Ибрагьим Ибрагьимов авцIайчирра имцIали жузла автор сай, илдазирад дахъалгъунти лебилра адамтачи хасти, кьиматчерти секIайчи биштIати руркънилис хасдарибти сари. Илини даргала мезли делкIи, печатьлизир дураиб ишди повестуни: «ХIила душман», «Жинс даимбирули саби», «УркIецIиагарли чеббицIни», «Марисуд, Жамиля», «ГIяхIси хабар», «ХIяблизи дигIяндеш ухIебалта»… ва дахъал цархIилти хабуртира.
Ибрагьим БяхIяммадович Ибрагьимов акIубси сай 1957 ибил дусла апрельла кIиличив Дахадаевла районна КIишала шилизив. Шилизиб урга даражала багьуди касибси ил ДГУ-ла филологияла факультетлизи учIес кархули сай. Ил хъараахъурли, 1971 ибил дуслизивад вехIихьили, КIишала урга даражала школализив учительли узули сай.
ЛукIес вехIихьибси сай гIулухъали левалли. 1975 ибил дуслизиб илала «Неш» бикIуси хабар печатьлизиб дурабулхъули саби. ГIур «Шила гIямру» ва «Ленинна байрахъ» газетабазир, «ЗурхIяб» ва «Литературала Дагъистан» журналтазир дурадулхъес дехIдихьили сари илала фельетонти, очеркуни, рецензияби ва хабурти.
Нушала библиотекала край руркънила ва миллатла литературала отделлизиб учитель ва писатель Ибрагьим Ибрагьимов 65 дус виънилис хасбарибси «ГIямрула хIябкьяйличив» бикIуси жузала выставкара абхьили саби.
Ибрагьим Ибрагьимов даргала мезлира урус мезличилра лукIуси писатель сай. КIелра мезличил дурадухъунти сари илала ишди удир гьандушибти жузи: «Юмор кищинцев», «Месть беспощадна», «В западне», «Выстрел у придорожной сакли», «Могила не схоронит тайны», «И сон сбывается однажды», «В лесной глуши», «Легенда о бедном Таймазе», «Тлеет любви огонек» ва цархIилти.
Бурес чебиркур, И.Ибрагьимовла хабурти урхIмешули ахIенти сари. Илала хабуртазир адамличи ванадеш, илала кьисматличила пикруми чедаэс вирар. Иличибли бурес вирар, Ибрагьим Ибрагьимов литературализив хапли, ва хабарагарли дакIуухъунси адам ахIен или. ГIямрулизиб илини сунела мер буцили сай.
ХIурматла Ибрагьим БяхIяммадович! ХIу акIубси бархIиличил уркIи-уркIилавад мубараквирулри! ХIебла берхIиван шаласи, разиси талихIра, хьанцIси закван умуси гьавра, чIумаси арадешра ва умутра каммадиаб хIела гIямрулизир!
Дерхъаб пагьмура, гIямрула кьасанира!
