Февральла 12-личиб МяхIячкъалализи гечли башуси «Чедибдешла поезд» бикIуси музей сабиур. Ил нушала республикализиб 4 бархIи кавлан. «Чедибдешла поезд» — тарихлашал ва багьудилашал халаси кьадрила проект саби. Ил балкьаахъурсири дунъяла КIиибил дергълизиб Чедибдеш сархибхIейчирад 75 дус дикнила, илкьяйдали Россиялизиб гьанбикунала ва асилдешла Дус дурабуркIнила дазурбазиб.

Ил проект гIямрулизиб бетурхахъуси саби Россияла гIилмула ва чебяхIси даражала багьудила Министерствола, «Россияла мегьла гьундури» ОАО-ла ва жамигIятла организациябала икьалаличил, «Невский баталист» бикIуси пагьмула командали ва «Красный квадрат» медиа кьукьяли.
Выставкаличир гьаладихьибти экспозициябани дунъяла КIиибил дергълизиб советский халкьла бебкIаагарти гьунартачила ва игитдешличила бурули саби. Поезд-музейла гьарил вагон декIарси темалис хасбарили саби.
Мисаллис, цаибил вагоннизиб чебаэс вирар дяви бехIбихьес гьалабси манзил. КIиибил вагоннизиб — ламартласи Германия Брестла къалаличи чебухъни, сабира советский халкьла гъабзадешла ва цIакьдешла бекIлибиубси лишанни кавлуси.
ГIергъиси вагоннизиб музейла гIяхIлани чедиу дергълизи аркьути бургъантала сипатуни. ГIур — уркIиличи бегIлара халаси асарбируси концлагерь.
Илала дурабадра, медицинала вагон, гIилмула вагон, Константин Рокоссовскийла хъали (ил Игит, советский ва польский дявила начальник, СССР-ла тарихлизив цайли цаси кIел улкала маршал сай: СССР-ла ва Польшала) гьаладихьили дирар.
БегIлара гIергъиси вагон Чедибдешлис ва нушала бургъанти дергълизибад чарбухънилис хасбарибси саби.