Ризкьила кьякь чина бегIалра жагали челябкьян ва умутчебси сабухълис хьулчили бетарар. Пагьмула гье чинар пайдаладараллира, черяхIти сархибдешуни дирниличи умутбихьес вирар. Илис бикьридеш дирули сари гIярбукIантанира.
Илди селизи ахъаллира, чедибдешуни дирахъес устадеш дургули сари. ХIера, мургьи-арцла ваяхI дирниличибли илди дунъяличиб машгьурбиуб. Хабардерхурти художникуни сецад леба гIярбукIанти-ургаб? Творчестволизиб чула кьисмат баргибти Мунги ГIяхIмадла, ГIяхIмадхан Абу-Бакарла умицун гьандушаллира аргъесли саби Кубачила шилизир пагьмуртала гье ЧевяхIсини сахаватли дегIи диъниличила.
Спортлизир чедибдешуни диахъесра гIярбукIантас имканти лерниличила бурули саби ил шилизивадси багьадур урши хоккеист ветаънили. Дубурланти мушлукьяби биъниличила жявхIейчибадли гIячихъси саби. Амма хоккейлизирра илдани чедибдешуни дирахъни лебгIеб дигеси анцIбукьлизи халбарес вирар.
ХIера, Дахадаевла районна Кубачила шилизивадси 21 дусла гIямрула Малик ГIялишлалов Москвала ЦСКА клублизив виъни, лебилра дагъистанлантанира бархли пахрубаресил хабарли бетаур.
2016 ибил дусличивад гIярбукIан урши дурала улкназив тренировкабачи вашусири ва сунела устадеш чедиахъутири. Арбякьунси сезоннизиб М.ГIялишлаловли Северная Америкала лигализиб (NALH) «Джонстаун» клублизи керхурли, 47 матчлизир 26 (4+22) очко сархиб.
Ишди бурхIназиб хоккейла ЦСКА клубли защитник (балтахъан) Малик ГIялишлаловличил вягIда къулбасбарили саби.
ЦСКА-ла хоккейла школала вяркъурси сай ил. Илини сунечи бихьибси игьдибар марбариб ва чебаахъиб дубурлан секьяйда залумсили ва дебшлавиубсили виэс вирарал.
ГIярбукIан багьадур Малик ГIялишлаловлис спортлизир гьунби гIяхIдираб, чедибдешуначил дубурланти мурталра илини разибираб, ил айкьурти бегIтас баркалла биаб эс саби нушаб калунси. Халаси спортла ахъанайтачи вааби, гIяхIгъабза дарган!
