ГIяхIцад дусмазиб нушала республикала шими газличил гIердурцнила шайчибси ма­съа­ла регионна гьалаб тIашли саби. Да­гъистанна мер-муса газличил гIер­хIе­дуцни бегIлара аргъбаибси масъалали бе­таурли саби, сенахIенну заманаличи бал­бикили, хъярхъли гьалабяхI башуси XXI ибил даршдуслизир, арагIер шими газ агарли датес асубирусив или гьан­бир­ку­хIе­ли. РФ-ла Президентличилси халаси пресс-конференцияличиб «Дагъистан» РИА-ла руководитель М.Мя­хIям­мадовлира ил масъала ахъбуциб ва улкала БекI Владимир Путинни ил гьунчибикахъес чеасиб.

ХIера, «Газпром» ПАО-ла руководстволи Дагъистан Республикализи бегI гьалаб бузерила архIя дураберкIиб. ДР-ла БекI Сергей Меликовли Холдингла Председательла заместитель Владимир Маркеловла бекIдешлиубси кьукья кьабулбариб, ва илдала бутIакьяндешличил республикала исполнительный хIукуматла чебяхIси орган Газпромла компаниябачил барх бузнила хIекьлизибси со­ве­щание дураберкIиб. Илала дурабад, декабрьличиб бетерхурси пресс-конференцияла баянти хIясибли, РФ-ла Президент В.Путинни кьабулдарибти тя­хIяр-кьяйда гIямрулизир детерхахъес хIя­жатли биъниличира пикри бяхIчиаиб.
Дагъистан газличил тамай гIеббуцнила, газ буртIути станцияби имцIадарнила, чебла ва газлис бедлугуси арцла кьадар халабикIнила масъулти хIерзили дахъ­хIи калири. Гьайгьайрагу, ДР-ла БекI С.Ме­ли­ков­ли республикалис дебали мягI­ничебси масъала ахъбуцили, ил арзес къайгъни дакIудирули сай. Улкала Президентли илди масъулти ирзниличи хIеруди бу­захънира дигесли саби.
Дагъистан газли гIеббуцнила дара­жа 90 процентличи гъамли биалра, 2027 ибил дусличи бикайчиси манзилла бухI­наб 6 гьатIи муниципальный район газличил гIер­дуцес пикрибарили саби. «Газпром» ПАО-личил барх халкь газличил гIеб­буц­нила шайчибси программа гIям­ру­лизиб че­диб­дешличил бетерхахъес бажардибиалли, 2025 ибил дуслис Дагъистанна мер-мусаличир, бегIлара камли, газла линияби лушнила хIянчи ахирличи дикахъесра асубирар. Газ буртIути станцияби хIедиънили, гIяхIцад районтазир къиянти аги-кьяйда кадилзули сари. Теплицаби тIашдалтутас тIабигIятла газла чеимцIаси кьадар харжбирес чевкъули саби. Газ хIебиъни багьандан, инвестицияла проектуни хIясибли, республикализир чумра теплица делшес имканхIебакIиб. Халати проектуни гIямрулизир детерхахъес багьандан, газ буртIути станцияби булан делшес чевкъули саби. Пайдалабируси газлис хIелугули, цалабикибси чеблаличила гъайикIалли, ишаб декIарси программа хIяжатбиркур. Дурусли буралли, газ буртIути станцияби лушниличил дарх, арц дедлугнила тяхIяр-кьяйдара цазаманализир низамличи дикахъес вирар, сенахIенну сагати бутIни хIерудилиур сари.
Программа гIямрулизиб бетерхахъес бажардибиркниличи ва районтала халкь газличил гIеббуцес имканбикIниличи дирхехIе.