Нушала жамигIят дебали гIяжаибси цахIнабик саби. Чула къушумлизивадси ахIенси адам илдани дебали къиянни кьабулвиру, яра бекIлил тяйдили валта. Дила пикрили, ил адамтала дагьрила шайчибси урехи саби.
Чучи мешуси ахIенси секIайзибад бахъалгъунти дебали урухкIар. Ил жамигIятла зягIипдешла лишан саби. Нуша лерилра иш дунъяличи цаван «умули» ляркьутира. ГIергъити гIямру алав-гьалавти адамтазирад дигахъу. БекIлибиубси – гIяхIси бяркъ бедни.
Амма леб адамти акIубхIелил цархIилтазибад декIарбулхъути. Илди саби чулахъуни, алкIукад зягIипли акIубти, леб гIямрулизиб сегъуна-биалра анцIбукь кабикили чулахъбиубтира.
Гьачам, ну телевидениелизив узуси замана, набчил рарх рузуси журналистли чулахъуни дурхIни хIербируси заведениеличила передача бирухIели, илис кумекбарес вякьунсири. Илаб лебри бегIтани лайбакIибти дурхIни. ХIянчизартала гъай хIясибли, бахъалгъунти пачалихъла хасти заведениебазиб илкьяйдали зягIипли кавлули саби, бухънакабаайчи, эгер гьести гIямруличи абаайчи хIербиэс имканбакIалли. Марлира, илдигъунтас къуллукъбирес гьамадли ахIен. Гьарилла уркIила чIумадеш хIебиур.
Бахъалгъунти чулахъбиубти яра илкьяйдали акIубти, селалра авараагарли, гIямру детIили, хъярхъли итил «дунъяличи» Аллагьли ардукахIелри или, пикрумазиб хIербирули бирар. Амма илдала ургаб леб «гIямру дигути», чули сегъуна-биалра бетуцлизиб гIядатла адамли сархес хIейрути чедибдешуни дирахъути, гьатIиралра гьалабяхI башес, сагасилигIиб умцIес гьуцIти. Илдигъунтачила нушани гьаман иргъулра, хаслира — Интернетлизибад.
Стивен Хокинг. Ил дебали машгьурси гIялим, астрофизик сай. Илини делкIунтачи цархIилти гIялимти бархли чула бузерилизиб хъарихъули саби. Ил 21 дус виубси замана тухтуртани биркIанти вяшхIедикIнила (паралич) диагноз кабатурсири ва хIериэс калунти кIел дус сари или, бурибсири. Илди дебали хатIабикиб.
Питер Динклэйдж. Ил адам хIушани «Игра престолов» бикIуси кинолизив чеэс дирудая. Машгьурси гIяртист дахъал цархIилти кинобазивра вирар. Питер акIубси сай бегIтазибад гIебисуси «халахIейкIни» («карликовость») бикIуси изайчил.
Ник Вуйчич. Ил адамличила хIебалуси, мажахIят, лев виэс. Нушала Россияла телевидениебазир дурадулхъути машгьурти ток-шоубазира ил чуйнара живарибсири. АкIубси сай ил дебали камли къаршибиркуси «синдром тетра-Амелии» бикIуси изайчил. Амма Ник ил изай мутIигIхIекIахъиб. ИшбархIи ил адам семинарти, лекцияби дурадуркIули, бахъал адамтачил гьунивиули сай. Илини дахъал жузира делкIун ва дураиб.
Илдигъунти дебали бахъал леб, гIямрулизиб талихIчебли, гIядатла адамтиван хIербирути. БекIлибиубси — уркIилизибси кьуват ва гъира, бекIлизир дагьри ва багьудлуми лерни.
